عالم البنات النسائي كل ما يخص المرأة العربية من ازياء وجمال والحياة الزوجية والمطبخ
اخواتى الغاليات دي فضفضة منى معكن وأتمنى تشاركوني باراءكوا الجميلة ودعواتكن
واتمنى ان كل اخت لم تتزوج بعد تشوف تاخر زواجها من المنظور ده صدقونى هترتاح كتير
اخواتى اعترف أنى كنت كاى فتاه تخطت الثلاثون بعده سنوات تمنيت كثيرا ان يرزقني الله بالزوج الذي أتمناه ويكون لي أسره صغيره جميله وأطفال أربيهم تربيه الإسلام ويبقوا من أحسن الشباب لكن لحكمه لا يعلمها إلا الله تأخر زواجي للان
وكثيرا ما كان الهم والحزن يصاحبنى لتأخر زواجي فانا والحمد لله لست قبيحة الشكل والحمد لله يشهد لي الجميع بالخلق والأدب وعلى درجه مقبولة من الثقافة ولست مثلا سليطة اللسان
فما هي حكمه ربى من عدم زواجي للان ؟؟
ومابين حزني وحيرتي تصادف إن كان في ضيافتنا احد الأقارب الذي وبدون اى كلام سابق في هذا الموضوع وجدت هذا القريب يقول لى” تعرفي ان ربنا بيحبك “
و انتى بتخدمى اهلك كل السنين دي يعنى ربنا راضى عنك ان شاء الله .
عندها توقف بي الزمن وشرد فكرى فى كلامه ياااااه ده صحيح عنده حق
كفاية لما بابا بحكم سنه تكثر طلباته منى فاحضر له ما يريد كفاية اسمع منه ربنا يديكى الصحة ، ربنا يسترك
يااااااااه حلو قوى الدعاء بالستر ده مش بس ستر الجواز لا الستر فى حد ذاته حلو قوى
ويلاحقني كلما مريت إمامه بالدعاء لي بالصحة والستر وراحة البال وصلاح الحال
الأحسن من كده انه بقى دايما يقولى انه راضى عنى والحمد لله
” حاجه تريح القلب “
ياااااه ده صحيح ربنا بيحبنى قوى
عارفين بعدها بقيت والحمد لله أكثر تقبلا لتاخر زواجي يمكن كمان مبسوطة لاحساسى إن ربنا بيحبنى لانه اختارني عشان أساعد بابا وماما ونضحك سوا ، نهزر ، نتناقش ، نتكلم
عارفين حاسة إن ربنا بعتلى قريبنا ده عشان يوصلى رسالة على لسان ذلك القريب
صحيح بتمني جدا ان ربنا يرزقني الزوج الصالح اللى أتمناه ويكتبلى معاه الخير بس مبقيتش زعلانه زى الأول بالعكس اصبحت اكتر صبرا والأكثر والأغرب أنى بقيت اكتر طاعة لوالدي هو أنا مكنتش بعصيهم بس مبقيتش بتضايق لو زادت طلباته بالعكس بس ربنا يرضى عنى
