عالم البنات النسائي كل ما يخص المرأة العربية من ازياء وجمال والحياة الزوجية والمطبخ
بسم الله الرحمن الرحيم
السلام عليكم ورحمة الله وبركاته
الموضوع واضح من العنوان , وأتمنى منكن أخواتي أن تسطرن تجربتكن للجميع حتى يستفدن منها , وهذا الموضوع يخص النادمات ( المقصرة – التي استعجلت الطلاق – المغرورة – المتأثرة بكلام الآخرين .. الخ )
وراح أبدأ بنفسي مستعينة بالله العظيم .
كنت عايشة عيشة حلوة ولله الحمد على كل شيء , وكان زوجي إنسان رائع وكويس وما كان فيه غير عيب واحد ( يصلي مرة في البيت ومرة في المسجد ) عدا ذلك فالشهادة لله , كان مثقف ويحمل شهادة الدكتوراه , وما يطلع من البيت وما عنده شلل , وما كان يمد يده علي أو يسب ويشتم , وكان دايم يلمح بالأخطاء الي يشوفها , وما كنت مهتمة أني أعدل شيء , ولا كنت أطبخ ولا أغسل ملابسه ولا كان لي أي دور بصراحة , لأني عايشة مع أهله وعندهم خدامات , ومع الحمل والوحم ساءت نفسيتي , وبدت المشاكل , وكنت أنوم عند أهلي بالشهور , وهو يحذرني بس كنت واثقة من أنه ما راح يفرط فيني وهذا أعتبره نوع من الغرور لأن كل الي حولي يقولون أنتي ألف واحد يتمناك ولو تشرين بيدك جاك أمراء , وكلام الناس والصديقات أثر فيني , وفي يوم طلب مني أني أرجع للبيت وأكتفي بالي راح من النوم عند أهلي وقلت له قدر حملي , وقال : أنتي قبل الحمل وأنتي تنامين كثير عند أهلك وحتى السفر تتركيني أروح لحالي للخارج عشان تنامين عند أهلك , ورفضت وطلبت أجلس أكثر , وللأسف صار تحدي بيني وبينه وصار الطلاق .
لي الآن ثلاث سنوات وما قدرت أنساه , وكل من جاني كبير في السن , وما فيه أمراء زي ما قالوا لي الناس , وضحكوا علي صديقاتي , والمشكلة أني رفضت كل الي يتقدمون وصعب يلمسني رجال غيره , وما أقدر أستوعب الموقف هذا , وغير كذا يوم فكرت أرجع لقيته خطب وتملك بعد الطلاق بخمس شهور .
النصيحة لكم أخواتي ما تطلبون الطلاق لسبب تافه ولمجرد التحدي ولا تعتمدون على الشكل , لأن الرجال يتحمل ويجمع ثم ينفجر فجأة , وهذا الي شفته بعيني , وكنت عايشه بوهم أنه يحبني ومستحيل يفرط فيني .. أتمنى كل وحدة حاسة بالندم تكتب تجربتها عشان نستفيد من بعض .
ولا تفشلوني لأن هذي أول مشاركة لي , وشكراً للجميع .
