ارجو تفسير حلمي الله يفتح لك أبواب رزقه ورحمته يارب

حلمت اننا ببيتنا القديم وان ابي عقد قرانه على بنت جيراننا وهي كانت صديقه لي
ثم رأيت ابي لابس قميص البيت وقاعد يصلي على بساط في الحوش وكأنه منحرف قليلا
عن اتجاه القبله
وكان عنده رجل يحكي لرجل اخر عن تفاصيل ملكة الوالد
ثم رايت ابي راكب سيارتنا (جمس)وواقف عند باب بيت جيراننا (اهل البنت)
وكأن ينتظرهم وكأنهم طالعين لمكان
وشفت البنت طلعت وهي لابسه عبايه كتف ونقاب وبيدها لعبه الكترونيه
وانا كنت اناظرهم من عند باب بيتنا
بعدها انا تجهزت وكأني بطلع معاهم ومعي اثنين من اخواني وكنا واقفين
بالشارع وكان بيدي كاسيت وشريط حق كمبيوتر العائله القديم لونه اصفر
واشياءثانيه مااذكرها اعطيت اخوي الكاسيت والشريط يمسكهاوانا اقول بنفسي فشله
الناس يشوفوني وانا شايلتها بيدي ووقفت في موقف السيارات وانا
واخواني وولد جيراننا اخو البنت وهو تقريبا بنفس عمري
وكنا ننتظر ابوي عشان نروح معاه
ولم اكن لابسه عباية وكنت عادي مو مستحيه من الولد وفي اثناء انتظارنا
كان فيه ناس يمرون ومعاهم دبابات يمرون وبعدها سمعت صوت مخيف
وطلع دباب وعليه رجال قزم وكان يحاول يطلع مع مرتفع وحنا نناظر فيه وكل ماطلع نزل على ورا
وفي الاخير قدر انه يطلع
وفجأه وقفت قدامنا سيارة هايلكس كلها بيضاء
وكان فيها لابس ثوب بني محمر ولاف الشماغ على راسه وفهمت ان الوالد ارسله عشان ياخذنا
لما شفته يناظر فيني استحيت منه ورحت للبيت
انا واختي وطلعنا للدور الثاني ووقت طلوعي مع الدرج كنت افكر بنفسي واقول ماراح اخلي ولد جيراننا
يشيلني ويدخلني السيارة (لأني في الحقيقه معاقه لااستطيع المشي)وفي الحلم امشي عادي
واقول ماراح اخلي جسمة يلتصق بجسمي (اقصد وقت مايشيلني)
بعدها شفت اخوي ارتحت انه هو بيشيلني
لماوصلت للدور الثاني دخلت غرفة امي وكانت اختي تدور عباتي
وبالكاد لقيناها ولما لبستها كانت مشبوكه بخيط من عند الكم اليمين لكني حاولت وقطعته
وكان اخوي يدور لي طرحه لما كنا نازلين مع الدرج قلت لاخوي طف الانوار الاالحمامات وانتي بكرامه
والغرفه اللي مقابله الشارع
لما وصلنا الحوش اعطاني اخوي طرحه وكانت صغيرة وممزقه وتركتها واخذت بطانيه صغيرة حقت مواليد
وحطيتها على راسي وقلت لامايصلح وكنت اقول لاختي اعطيني طرحتك وكان فيها لون احمر وقالت لا
قلت انتي تطلعين عادي بس انا مااقدر اطلع بدون طرحه
قالت لا
قمت انا ابكي بحرقه ولما شافتني بكيت قالت خلاص خذيها بس انا مااخذتها
بعدها سمعت الاذان وكأنه اذان المغرب
وانا ابكي من تصرف ابوي واقول الحين بيرجعون ولافكرياخذنا معاه
ارجو التفسير
الحلم محيرني كثير
رايت الحلم الظهر
غير متزوجه
عمري 27
الحاله الدينيه احاول قدرالأمكان ابعد عن المعاصي محافظه على الصلاةالحمدلله ولااسمع الاغاني من فضل الله علي
قبل النوم ماادري كنت افكر او لا
للعلم جيراننا اللي في الحلم منقطعين عنهم من زمان

وعندي حلم اخر لكن مااقدر اكتبه هنا لانه مرتبط بقصة حصلت لي
كيف الطريقه جزاكم الله خير