اخيرا اكشن ولادتي

السلام عليكم ورحمه الله وبركاته


واخيرا ولله الحمد ولدت
فالبدايه كنت خايفه من الولاده ومابي اولد وكنت اخاف كل ما ادخل شهر يديد لين ماوصلت الشهر الثامن وكانت المفاجأه ان الحبل السري ملتف على رقبه البيبي 4 لفات انا انصدمت وقت ماقالت لي الدكتوره وقمت اصيح قلت لها يعني بولد قيصري قالت لا مب شرط
هذا كله يعتمد على نبض البيبي وقت الولاده وانا من هذا اليوم وانا نفسيتي مدمره المهم فنص الثامن قامت اتيني اوجاع رحت المستشفى وقالوا احتمال ولاده مبكره وعطوني ابره لرئه الجنين تميت اعاني من اوجاع لين مادخلت التاسع
مر اول اسبوع عادي والرحم مافتح رغم ان الآلام كانت قويه قالت الدكتوره ان شاء الله خير الاسبوع الياي ويكون فتح وانا عاد صرت اعد الايام وكلي خوف على البيبي ليضغط عليه الحبل السري اكثر
المهم رحت موعدي يوم الاثنين وكشفت علي الدكتوره وقالت فاتح نص بس هي خلته واحد المهم رحت البيت وبدت عالعصر تنزل مني السداده افرازات بخيوط دم وبدا ايني عوار كل نص ساعه فرحت المستشفى الصبح وقالت لي 2 سم بس رحمي من النوع القوووي مايفتح بسرعه
وكنت متفقه مع الدكتوره على ابره الظهر بس عيبهم بالمستشفى ان دكتوره التخدير موجوده بس من الساعه 9 الصبح لين 2 الظهر المهم قالت لي الحين الساعه 9 ولو بدينا نعطيج طلق صناعي مابنلحق نعطيج الابره قلت لها والحل
قالت تعالي باجر الساعه 6 الصبح عشان نبتدي نعطيج طلق صناعي لين الساعه 9 يكون الرحم صار لين وفتح وحمى الطلق قلت لها اوكي ورحت البيت وماتحركت من السرير عشان ما ايني طلق واولد بدون الابره
تميت سهرانه طول الليل اصيح واحظن عيالي واحس اني مابشوفهم مره ثانيه ونفسيتي مدمره عالاخير
المهم 5 ونص رحت المستشفى ولين ماسوا الاجراءات وتبديل شفتات وبدوا يعطوني تحميله الطلق كانت الساعه 8 ونص قالولي لاتتحركين ساعه كامله خلج نايمه على ظهرج تميت ساعه وبديت احس بالطلق وبدا يبان بالتخطيط
وكان محتمل فحصتني الدكتوره قالت بعده 2 بس صار واااايد لين وبيتوسع يت الساعه 11ونص وانا احاتي الوقت يمر وبعدني ماخذت الابره تميت ادعي وكنت يايبه وياي ماي قاريه عليه قران تمت اشرب وامسح فيه بطني
وادعي ربي انه يسهلها علي وعلى البيبي ويطلع بالسلامه بدون مايتأذى كشفت علي الدكتوره وقالت صار 3 ويت دكتوره التخدير وعطني الابره وبدا مفعولها على طول تخدرت وماقمت احس بالطلق يت السستر وعطتني طلق صناعي بالابره اللي فايدي وبدا يزيد الطلق وانا اشوفه بالجهاز يوصل اعلى شي بدون ما احس بأي الم وبعد نص ساعه حطوا لي طلق صناعي مره ثالثه فالمغذي مع اني متخدره بس قمت احس بالم خفيف اقول للسستر احس بعوار قالت حبيبتي انتي متخدره شكلج متأثره بس بالحرمه اللي تصرخ اقولها لا احس بعوار قالت هدي عمري وانتي مابتحسين بشي استحملت بدا يزيد اكثر واكثر وانا خلاص قمت اصارخ
قالوا بيبون دكتوره التخدير تزيد الجرعه وصلت هي والدكتوره وانا مب قادره اتحمل الالم وصراخي واصل اخر المستشفى ودكتوره التخدير تزيد الجرعه وانا اصرخ وهي تزيد وتزيد مستغربين ليش اصارخ اقولهم بموت من العوار كشفت الدكتوره حصلته 4 سم ودكتوره التخدر تقول ها كله و4 بس
قالت الدكتوره بفتح كيس الماي فتحته والصدمه الاولى انه ماشي ماي وبدت الدكتوره تلاحظ كميه دم كبيره تنزل مني حسيت من وجهها انه في شي بس هي قالت مافي شي وويه السسترات متغير ووانا خلاص بموت من العوار واصرخ وزوجي يتصل على امي ويسمع صراخي ومستغرب يقولها ها صرااخ نوني كيف تراها ماخذه الابره تقولها محد عارف شو السالفه وانا صرت بعالم ثاني من قوه الالم اقول للدكتوره كيف كل ها و4 سم تقولي شككتيني بعمري بفحصج مره ثانيه فحصتني وقالت بسرعه ولاده ولاده ومافي وقت حتى نوديها غرفه الولادهنزلو السرير وقالوا سوي بوش قلت لهم مب قادره قالت ارجوج ساعدينا شوي وهي دخلت ايدها وفكت الحبل السري من رقبه البيبي والسستر تضغط على بطني وانا شديت حيلي شوي ودفعت دفعه قويه والحمدلله طلع الدكتوره تقولي الحمدلله البيبي بخير وسمعت صوته وارتحت تقولي اللي صار وياج ها معجزه قلت لها ليش شو اللي صار تقولي اول شي ماكان فيه ماي غير كميه بسيطه وثاني شي قبل الولاده بلحظات صار انفصال بالمشيمه وثالث شي الحبل السري على رقبه البيبي وعقب الرحم كان 4 وفتح 10 على طول قلت لها الحمدلله وبدت تضغط على بطني وطلعوا المشيمه وخيطتني وطلع جسمي متخدر قالت لي نوني جسمج متخدر بالقو كيف حسيتي بالعوار قلت لها ماعرف ها كله ودكتوره التخدير واقفه عقب قالت لها من قوه الطلق الابره ماسوت مفعول معاها تخيلوا لاي درجه بس الحمدلله الله سهلها علي وعلى ولدي وخلوني ساعتين عشان يشوفون اذا فيه نزيف او لا بس طلع الحمدلله مافيني شي ورحت عقب غرفتي واحلى رواف بالدنيا بحظني


وهذا اكشن ولادتي وعقبال كل التواسع يارب يولدون بالسلامه