اخاف اني اذا قلته تقوم وتقطع ارقبتي

ترى لولا الظروف اللي عطت وحدت محاكيك
قسم بالله ماتدخل عليها لو على رقبتي

ولكن النصيب اقوى ولا ادري ويش اسوي فيك
نعم .. صارت معزبتك.. ولا صارت معزبتي

كذا شاءت بنا الاقدار تحرمني لجل تعطيك
كذا لازم عشان تفوز انت .. اخسر بتجربتي

تراها غاليه جدا .. وتكفى .. والله يخليك
تدللها .. تدلعها .. تنسيها مصاحبتي

انا من كثر ما اغليها احس اني بديت اغليك
ولا تسال باية حق؟ ولا وش مناسبتي ؟

لانك لو بتسالني بتسمع شي ما يرضيك
لذا ياخوي لاتسال ولا تسمع لاجوبتي

ابيك تحطها في داخل عيونك وبين ايديك
وهي دلوعه اعتادت على كثرة مداعبتي

فداعبها شوي شوي حتى تشتهي طاريك
وشاغبها الين تقول لك : بطل مشاغبتي

واذا هي مالها خلقك .. ولا تضحكولا تسليك
تحملها واسالها : ياعمري ليه عصبتي

وبالك اسمع انك يوم تضربها وهي تشكيك
مايحتاج اوري لك بفن الضرب موهبتي

صحيح انك بتملكها ومعك العقد بالتمليك
وانا عارف حدود الله ومن حقك معاقبتي

ولكن قلها المجنون وصاني وهو يعنيك
يقول انه بينتظرك ولو شيب وشيبتي

وانا مجنونها اللي ما نساها وانت ما يمديك
تغطي ذكرياتي في هواها .. وربع تجربتي

احس اني تماديت بكلامي .. والغضب حاديك
لو انك في مكاني ماتفكر في محاسبتي

كفاك اني تركت الليله اشغالي عشان اجيك
دخلت القاعه برجلي ولا ادري ويش عاقبتي

وانا ما جيت اخرب عرسك الليله ولا اذيك
انا جيتك عشان اخاطبك واسمع مخاطبتي

توصى .. وانتبه.. واحرص عليها والله يهنيك
ترى كل الكلام اللي طلع من ضيقتي وكبتي