عالم البنات النسائي كل ما يخص المرأة العربية من ازياء وجمال والحياة الزوجية والمطبخ
بنات ابي افضفض احس اني مخنوووووقه …وودي ابكي 
ابتكلم عن نفسي اول شي عشان تعرفوني…
انا عمري 28 سنه …يعني كبيره موب مراهقه..
حسااااسه لابعد حد…واكتم كل شي بقلبي…واشيل هم كل شي…واخاااااف من ظلالي …
وبنفس الوقت محسنه الظن بالله …بس الهم بداخلي داااايم..
وتدرون وش المشكله؟؟؟
مااشيل هم نفسي…لاااااااااااا ابدا…
الا بالعكس اشيل هم اللي حواليني …واحاتيهم…واخر شي افكر فيه نفسي…
وهذا الشي خلى بعض الاشخاص يستغلوني…وبابشع الطرق…حتى من الناحيه الماديه …
صادقت كثير وتعمقت بعلاقاتي …لاني شخص معطاء واثق بالناس بسهوله لحد ماجتني الطعنه من اعز صديقاتي…
تدمرت نفسيتي …وهذا مع تخرجي من الكليه..وجلست سنه كامله كاااتمه بقلبي…
لان حتى ماقدرت اقطع علاقتي فيهم..حسيت انه حرام ابيع العشره…مع انهم والله والله غلطوا بحقي غلط كبير وانا كنت ابي مصلحتهم واخاف عليهم وبالاخير ركبوني الغلط وخانوني وتكلموا عن اسراري اللي كنت اقولها لهم مع من هب ودب….
والحين العلاقه بيننا ماانقطعت لاني انا مابيها تنقطع…واكلمهم وامسج لهم بين الفتره والثانيه بس عشان العشره اللي بيننا .
وقبل سنه ونص جتني وظيفه بمدرسه اهليه..ودخلت هالمدرسه وانا اقول لااااا للصداقات…
مع اني من النوع اللي يقدس الصداقه … بس قلت خلاااص يكفيني ماجاني… وماراح اثق باحد وحدي حصصي ومنهجي.
وبديت بالدوام ولازم اثبت نفسي خلال هالثلاث شهور التجريبيه …والحمد لله وقعت العقد وصرت مدرسه عندهم ..وكانت فيه مدرسه بعمري على المكتب اللي جنبي على طول…وكانت تنصحني دايما…وصدف ان اختها صديقة وحده من خواتي
فارتحت لهاااا كثير…وصرت مااجلس الا معاها لان بطبعي انا استحي ومااعرف ادخل مع الناس بسرعه
واهي عكسي تماااما … جريئه واجتماعيه والكل يحبها (ماشاء الله)
المهم انو شوي شوي…انا جد صرت اشوفها كل شي…لانها الوحيده اللي حسيت انها عاملتني زين..
اهي تخاف علي وتنصحني وتقولي لاتثقين باحد حتى انا !
وحتى باموري الدينيه كانت تنصحني وخلتني اسوي اشياء ماكنت اسويها وخلتني احضر المصلى واشياء اجابيه كثيره غيرتني فيهااااا..وحتى اهلي لاحظوا هالشي ..وامي قالت لي ليتك مصادقتها من زمان ..لان جد تغيييييرت وطلعت من حالة الضيقه التحطيم اللي كنت فيها..ورجعت تفائلت وحسيت ان الدنيا لسه بخير ولسه فيه ناااس كويسه .
وحسيت انها الشخص الوحيد اللي خاف علي دنيا واخره وهذا الشي حببني فيهااا مره
وخاصه من ناحية الدين..كانوا صديقاتي اول مايهتمون…اما انا تقدرون تقولون انو فيني التزام شوي وعندي خطوط حمراء مستحيل اتعداها..وكانوا صديقاتي اول يضحكون علي..اما هي تقولي انو هذا احسن مافيني
وبالعكس حاولت تزيد هالشي فيني…وارتحت معاها كثيييييييييييييير
الحين مشكلتي اني خلاص ماعاد اقدر ابعد عنها… واخااااااف عليها بشكل غير طبيعي…
لو تقول راسي يوجعني…. ماانام …اجلس ادعي لهاااا …واجلس استغفر بنية انوربي يخفف عليها
واذا قلت لها كذا تهاوشني لاني انا فيني قولون وتقولي ارحمي نفسك … واللي الله كاتبه بيصير وتفائلي واحسني الظن بالله واتركي عنك الوسواس
ولا تلوموني على كذا لانها تتعب كثير واغمى عليها ثلاث مرات قدامي وانا بطبعي اخااااف …
ومرتين كنت احاكيها وفجأه يروح صوتها وتتعب وينخفض ضغطهااا ويغمى عليها وانا عالسماعه مو قادره اسوي شي…
عشان كذا صرت اخاف حتى اذا انقفل جوالهاااا اصير على اعصابي
ادري ان اللي الله كاتبه بيصير…وانا مستودعتها الله …بس غصب عني…لانها الشخص الوحيد اللي عاملني زين وعرفني من اناااا…
(( تصدقون اول صديقاتي كانوا يحسسوني ان الذوق في التعامل مع الناس ضعف..واني انا خطأ ..ولازم اخذ حقي واصير قليلة ادب..وانا موب كذا …انا احب التعامل الراقي .. ومااحب اجرح احد او ااذي احد..
وكنت اقول من الصح انا او هم…لحد ماصادقتها وعلمتني اني انا غير ,, وخلتني احب نفسي..واقدرهااا
ودايم تقولي انتي قلب طاهر وماعليك من احد ..لحد ماوثقت بنفسي وانا اول ثقتي بنفسي زيرووو))
واهي الوحيده اللي افضفض لها بمشاكلي وتعطيني الحل .. وتوقف معي وقفات ماتنسى لها
لي الحين معاها سنه ونص وكل يوم عن يوم تكبر بعيني
والحين احنا على بداية دراسه …وتخبرون المدارس الاهليه يجددون العقود على بداية السنه ..وخاااايفه يابنات يجددون عقد وحده فينا ويتركون الثانيه
هالشي مايخليني انام..ولو غفيت اقسم بالله احلم بهالشي…
انا مااقدر على جلسه البيت واهي بعد مثلي…ظروفنا متشابهه..والوظيفه تعني لنا ..
وبنفس الوقت يوم لقينا بعض حبينا وظيفتنا اكثر…
من اصحى وانا ادعي ربي يجمعني فيها على الخير طبعا مره ثانيه…
واجلس استغفر واحاول ابعد عني الشيطان…
انا مااابي اصير كذا…مابي اتعب نفسي اكثر…وانا والله فيني اللي كافيني…ودنياي ماصفت لي والحمد لله على كل حال
هل تحسون اني انا مكبره الموضوع زياده…واني متعلقه فيها زياده عن اللزوم؟؟
حطوا فبالكم اني انا وحده دنياها متعبتهاااا وظروفي لكم عليها شوي وماصدقت لقيت احد ارتاح له..ويكون عايش نفس وضعي
والله يابنات اني احيانا احس ان الله مرسلها لي .. لان جد نفس ظروووووفي ياناس عشان كذا تحس فيني من قلبهااا وتعطيني حلول صح …
تكفون ابي رايكم….
وابي تدعووووون لي بان الله يجمعني فيها مره ثانيه على خير…وان صداقتنا هذي تكون لنا موب علينا ويجعلها ربي دليلي للخير وانا بعد ادلها على الخير…ومايفرقنا بشر ..
