عالم البنات النسائي كل ما يخص المرأة العربية من ازياء وجمال والحياة الزوجية والمطبخ
ازيكم يابنات كنت مش عارفه انزل اكلات لأن الموبايل كان فيه مشكلة والحمد لله اتصلح فقلت انزلكم غدانا النهارده وهو كبده بالبصل ومكرونة محمرة وسلطة خضرا
نبدأ بالكبدة نقطعها قطع صغيرة ونغسلها
نحضر طاسة ونسخنها ونحط فيها شوية زيت ولما يسخن نحط الكبدة
ونقلبها ونحط فلفل اخضر مقطع
ونفضل نشوحها ونقلبها فى الزيت لمدة خمس دقايق وكل شوية نرشرش ميه خفيف اوى ولما تنشف نحط تانى رشة خفيفة بايديكى ونقلب لحد ماتبقى كده
وبعدين نضيف بصلة مبشورة بالمبشرة العادية
ونفضل نشوح لحد ما البصل يدبل يبقى مكرمل كده والكبدة مقلية
ونحط ملح وفلفل اسود وكموووون اهم حاجة فى الكبدة الكمون بيعشقو بعض
وبكده يبقى استوت الكبدة لو استخدمتى كبدة من بتاع الماركت المجمدة
لكن لو كانت كبدة بلدى طازة من الجزار اللى هى بتبقى طرية بتاخد سوا اكتر ودى اللى انا استخدمتها هنا فتكمل السوا بتاعها ونحط كوب ميه عليها ونسيبها تغلى
ونسيبها لحد ما مميتها تنشف خالص وتبقى بالشكل ده
وطبعا الكبدة ما تتاكلش غير بالمكرونة 😆 🙂
انا عملت مكرونة محمرة بحبها اكتر من اللى بصلصة حمرا او بصوص ابيض
والطريقة للى ما يعرفهاش اسهل ما يمكن
اول حاجة نجيب مكرونة صغيرة عشان تكون سهلة التحمير
ونجيب حلة ونحط فيها شوية زيت ونضع فوقها المكرونة كده
ونقلب المكرونة ونحمرها على نار هادية عشان ما نحرقهاش
ولما تتحمر ولونها يبقى دهبى من جميع الجهات نكون مجهزين شوربة مغلية ونزودها بيها
ولما تقرب تتشرب كده نهدى النار جدا زى الرز
وده شكلها بعد السوا والغرف
والطبق ده ليكم
وما ننساش السلطة
