عالم البنات النسائي كل ما يخص المرأة العربية من ازياء وجمال والحياة الزوجية والمطبخ
ياللهـ انك تحييهن وحده تلو الوحده 
اسفرت وانورت واستهلت وامطرت
هلا وغلا بكل وحده مرت او تمر او تبي تمر من هنا : )
بناات والله اعيش إحبــاط مو صاااحي
أحس اني ساكنهـ بيت مو بيتي
بكل ليله انام فيها احلم اني صحيت انا وزوجي وولدي واحنا مرميين برا الشقة 
حشى والله ماهيب حاله انا ادفع الايجار وهو عايش متنعم في بيتي !!!
لو بس يناصفني بالإيجار كان قلت ماهي مشكلة ^_^
استحلال عيني عينك ..!!
وصلت فيه الوقاحه ينامـ على سريري !!!!!!
وش ينام ؟؟ الا يتغدى ويتعشى ويتمشى بعد على سريري 😉
كلما فتحت شنطه لقيته فيها .. كلما فرشت سجادتي لقيته فيها .. كلما حطيت كاس موية جنبي بالليل لقيته فيه
ماباقي الا افتح فم ولدي والقاه فيه بعد 
اقسم بالله قلق مو صاحي
احس محبطني ومعيشني اكتئاب
ياناس حتى صرت مااتحمس انظف غرفتي ولا ارتبها
لإنه يجلطني لما اشوفه تحت المرتبة وعلى اطراف السرير وبالمخده وعلى التسريحه وعند الباب
تدرون انه حتى بالحمام لقيته !
لعنبو ابليسه لو كان منتشر بالمطبخ .. قلت يابنت الحلال مشي واهمالك وتستاهلين
لكن عاد وش دخله بالغرفه ؟؟؟؟؟؟؟
مو كافيني انا فصوولي مشاركني ومحدد لي وضعي بالغرفه .. بعد يجي هو 😡
بحثت عن حلول .. وعن مشاكل مشابهه لقيت الاغلبيه منتشر عندهم هذا العدو والعدو الاخر بالمطبخ
ويكون السبب اما كيس رز او جريش او شيء من هالقبيل
لكن نفس حالي بكل مكان .. مالقيت لا مشكلة مشابهه ولا حتى حل
ابحكيكم قصتي .. واحكموا : (
منذو زمن ليس بالبعيد .. انتقلت من بيت اهلي الى عش الزوجية
وشاء الله ان يكون قفصي الذهبي في محافظة ينبــع
بداية زواجنا كنا نبحث عن شقه .. ولإننا اتفقنا انا وزوجي المصون على ان تكون الشقه بعيده عن البلد وزحمته .. وفي حي يعتبر نظيف وجديد نوعاً ما .. تركز نطاق بحثنا على الاحياء الجديده على طريق المدينة 
والحمد لله ماطال بحثنا .. لقينا شقه مرتبة وحليوه .. مبنية من سنه و6 شهور .. يعني تعتبر جديده وتسليكها ماشاء الله نظيف وجديد < وهذا اكثر شيء كان يهمني
جيراننا اصحاب العماره ناس نظيفين ومهتمين .. وهالشيء خلاني اتحمس اكثر واكثر للسكن
الحمد لله .. ماعدت 10 ايام من لقينا الشقه الا واحنا مجددين البوية ومغسلينها ومأثثينها بالاساسيات
الوضع لحد الحين اوكي
سكنت بيتي الجديد .. وكأي حديثة عهد بالزواج .. كنت اسوي سواة اهلي بالترتيب
يعني .. بالمدينة عادي تظل القهوه والبهارات والطحين والرز بأدراج المطبخ ..
لكن هنا .. ولان المنطقه تعتبر رطبة نوعا ما .. ويمكن لوجود غازات المصانع .. فسرعة انتشار العفن سريعة بشكل ماتخيلته !!
القهوه والبهارات ان طولت برا تغير 😆
الطحين بسرعه سوس .. وانتشر سوسه بنفس نطاق الدرج
المهم .. مع احتكاكي بناس من اهل المنطقه عرفت منهم ان كل شيء لازم يكون بمكان جاف وبارد
يعني اشتري فريزر اضافي كانك تبين تقضين بالجمله ➡
السوس اللي خرج من الطحين .. تداركت وضعه .. وقمت نظفت الادراج كلها حقت المطبخ من الداخل والخارج .. وعقمتها .. وانتهى والحمد لله
مرت الايام وانا ماشاء الله علي محافظه على نظاافة بيتي وريحته دايما عال العال
مدري بأي وقت من السنه .. بس المهم بعد سكناي لبيتي تقريبا بـ 6 شهور
لاحظت انتشار النمل بشكل رهيييييييب
وبس بالمكان اللي نكون احنا جالسين فيه
يعني كنه يعيش على ريحة الاوادم 😉
الصاله ماكنت اجلس كثير فيها وكذلك المقلط .. فما كنت القى لو نمله بالغلط !!!!
لكن المجلس وغرفة الكمبيوتر وغرفة نومي … شيء رهيييييييييييييييييييييييب !!!
بداية الامر عزيت السبب لأكلنا بمثل هالغرف .. وانه يجي على ريحة الاكل
لكن زارتني اختي مره وجلسنا انا وياها بالصاله وقلت لكم مالي عاده اشوف فيه لو وحده بالغلط .. فجأه كذا صار خط اسود من بداية الصاله لمكان جلستنا كله نمل .. ومن النوع اللي لو يلمسك يحسس بجسمك على طوول !
عاد انا قلت ما للأكل سبب .. هذا ابتلاء !!
واغلب الظن ان البيت يامحسود يامعيون .. فصرت اشغل سورة البقره واقرأ انا واردد الاذكار بصوت عالي خف الوضع فتره بالمجلس وغرفة الكمبيوتر ..
لفيت البيت لف ادوور بس عن بيت النمل ولا من وين يخرج .. عجزت القى
والله اني اتبع خط سيره فجأه كذا يختفي
جربت المبيدات الحشرية .. نفعت معي بالنمل الاحمر والاسود السريع .. لكن الصغير هذاااااك مالقيت له حل
اصلا هو اللي مأزمني 🙁
وحتى ماتقطعه نهائي .. بس هه هه تخففه شوي
تقريباً تأقلمت مع وضع النمل ومع الحساسية اللي كان احيانا يسببها لي .. فقررت اني مااحاربه واعقد هدنه .. فبمجرد ماقررت .. اختفى من انحاء البيت الا غرفة نومي
يوميا غير انفض السرير من الى .. انسي انك تحطي علكه ولا حتى بسكوت او حتى قارورة موية جنبك
لانه داخلها داخلها .. حتى لو ايش ماسويتي
صار الوضع عادي عندي .. تقدرون تقولون تبلدت
طلعت لي قضيه ثاااانية !!!!
الأرضة .. وماادراك مالأرضة !!
اكلت خشب الكنب حق الصاله اكل
دايماً ويوميا كنت لما اجي اكنس الصاله الاحظ وجود نشارة خشب تحت الطاولات .. ومو كلها بعضها بعد
واستغرب وانظف واقول يمكن زوجي حركها من مكانها عشان كذا طلعت نشارة
اطارات المكيفات فجأة صارت كأن عليها طين .. ولما تضغطين عليها تحسينها مفرغه من بعض الاماكن بس !
ناديت زوجي وخليته يلقي نظره على الوضع .. قالي هاذي الارضة .. تاكل الخشب
وعادي تجي بااماكن الرطوبة 🙁
آآآآآآآآآآآآآخ ياقلبي قلباه .. انا مااخلص من النمل ولعبه بالبيت لعب .. تطلع لي الارضة !!
كلها كم يووم وتكلمني اختي وتقول انتبهي تحاربينها لانها بتثور عليك .. بس جيبوا الشركه تبخ لكم يمكن تخف
كلمت زوجي واذن من طين واذن من عجين .. قلت .. خلاص مالي الا اني استخدم اسلوب النظافه المكثف @_@
جبت فيري وشوية كلوركس .. ومسحت الطاولات من الى .. واطارات المكيف والشبابيك ..
وكلها كم اسبوع والارضه بدأت تطير بشكل واضح 😥
يعني بدل ماكانت تعيش معنا بصمت .. صرت اشوفها بكل مكان بالصاله وبغرفة الكمبيوتر
وطاولة الصاله صارت من على الواجهه كأنها منقطه بأسود للي بيدقق < ثقووووووب صغيره جدا يالله تبان 😉
جن جنوني .. وثقلت انا < لاني وصلت الثامن بحملي وانا من سكنت تقريبا كل يووم حرب ومحارب بهالبيت
وكلما اشتكيت لاحد قالي ارقي بيتك وهاذي حشرات بكل مكان ماراح تلاقي بيت نظيف مية مية 🙁
طبعاً انا قلت لكم .. اني خلاص تأدبت بداية زواجي وصرت اركز بسالفة حفظ المواد
بطلت احارب الارضة والنمل تأقلمت مع وضعه .. وهجد الوضع بالبيت
ورجعت اهتم بسالفة البخور اليومي .. والمسح اليومي < يقالي ابعود الرجال على النظافه عشان يفقدني لارحت اولد عند اهلي 😡
المهم
طلعت لي سااااالفه جديده .. لكن غثييييييييييييثه بشكل !!!!
مستر سوس
انتشر السوس بغرفة نومي بشكل مفجع
على الشبابيك وعلى ادوات مكياجي القاه مع السيد نمله بكاس المويه
انتشر بالحمام .. وبالصاله .. وبغرفة الكمبيوتر
بكل مكان بالبيت انتشر
شلوون وليش وكييف ؟؟؟
مدري وربي
المطبخ ماالقاه فيه كثير … بس متركز بغرف معينه من البيت
وهو نفسه سوس الارز والشعير والجريش !!
انا هنا سلمت امري … وتركت بيتي ورحت لاهلي من نص التاسع على اساس الولاده
عدى الوقت عادي ولدت وجبت فصولي والحمد لله .. وكلما كلمت زوجي اساله كيف البيت
يقولي مستقر
كيف النمل .. يقولي مافيه نمل .. ياابن الحلال وين راح النمل اللي على السرير
يقول والله انفضه مااشوف شيء 😉
خلصت اربعيني .. ورجعت لبيتي والحمد لله بس هالمره مع رضيع تخافين عليه من كل شيء
دخلت البيت .. ادور النمل .. ابد والله مافيه شيء
الارضة .. مافيه شيء جديد كل شيء على خبري …. يعني صح مازالت تاكل من الطاوله حقت الصاله بس عادي يعني
المهم .. لقيت البيت صح مكنس ومغسل السيراميك بس مغبره الادوات كلها
وقلت لا والله ماانام ولاينام الولد في بيت كذا .. ويدي بيد زوجي نفضنا البيت من الى ومسحنا .. وفرشنا فرش السرير اللي هو جايبه جديد
الغرفه صارت عال العال
حطيت الرضاعات والموية والكونتينر حق الحليب بجنبي وفرشت سرير حبيب مامته ونومته وطلعنا انا وزوجي نتعشى بالصاله
رجعنا ونمنا بالغرفه والوضع اوكي
الفجر صحيت ابسوي لولدي رضاعه وشد انتباهي شيء غريب على الطاوله اللي جنبي 😉
فتحت النور ولقيت شيء بحياتي ماشفت زيه 😳
وشو سرب .. الا اسررررررراب من النمل الصغير مغطية ترمس الموية وداخلته من جوا .. وداخله بالرضاعه اللي رضعها ولدي اول الليل .. كيف دخلت وانا مغطيتها !!!!!!!!!!!!!!!!
صحيت زوجي .. وشهق يوم شاف المنظر
ويحلف انه ماشاف ولا نمله طول فترة غيابي !!!
وانا والله مشيكه على الغرفه .. مالقيت شيء قبل !!
قمنا من على السرير ورفعنا المخدات .. ولا هذا سرب ثاني من النمل مسوي حفله
شكله يحتفل بعودتي
وشلوون جاء وليش ووين كان قبل .. ماااااااااادري الى يومكم هذا
بس غرفة نومي هي اللي فيها نمل صغير بهالشكل
الله لايوريكم ذاك اليوم وش سويت .. ماكأني راجعه من نفاس ولازم اتدلع .. انكرفت كررف بالبيت اول ماجيت .. ونمت كم ساعه وكملت كررف 🙁
صار الوضع عادي عندي .. احط الرضاعات بالمطبخ ولاصحي ولدي غير اطق مشوار للمطبخ واصحصح
هو قبل لاينام انفض فراشة مضبووط .. وانومه والحمد لله ماقد شفته على سريره
عدت الايام والشهور .. ورجعت لمأساة السوس ثاني مرره
وتقابلت مع جارتي وصدمتني بالحقيقه المره .. ان مصنع الشعير ورى بيتنا بما يعادل 10 كيلو
وان السوس يجي طاير مع الهواء ويدخل للبيوت مع الشبابيك .. وان الموضوع مو مأزمني انا بس الا مأزم الحارة كلها ^_^ < استغفر الله فرحت
سألتها طيب والنمل الصغير .. قالت مدري والله .. ماعندنا الا الاحمر العادي والاسود .. وهذا بالمبيد تتخلصين منه : )
والصغير …………………. تقول ماقد شفته
😛
مدري وين يتخبى وكيف يطلع بسرعة البرق لو احط بسكوت على الطاوله ..؟
وبس بغرفة نومي ..؟
ابوي ماقصر جاب لي ابره من العطار تتحط باانحاء الغرفه .. وحطيتها ومنعت الاحمر والاسود
وقللت الارضه .. لكن .. اجنة النمل ❗ ماشالتهم !!!!
انا لما كتبت موضوعي هذا باغية منكم حلول لكل مما يلي :
– السوس .. شلون على الاقل ابعده عن سريري .. لانه مسبب لي ازمه منظره على السرير وتحت المخده .. حتى والله اضطريت اخذ مفارش السرير الخفيفه كله على حساب التنفيض اليومي < ودعنا الكشخه والدلع على حس هالحشرات
– الارضــه .. شلون بس اخليها تكون بعيده عن الصاله .. حاست لي الطاولات .. والحين بادين بالطاولة الرئيسية !!
– اجنة النمل 😆 idea: النمل الصغير جداً .. شلون اعرف وين بيته .. يطلع فجأه وبشكل يادووب ينشااف
لكن بكميات كبيره !! انا بصراحه ماقد شفته الا في بيتي .. في بيت اهلي مااعرفه
وحتى امي ماصدقت الا لما شافت حجمه < اخذت لها عينه بعلبه وتقوول يمكن يكبر مع مرور الوقت ..؟ بس متى ؟؟؟ لي سنتين تقريبا وهو مو راضي يكبر 😐
ابغى حلوووول تكفون .. او حتى قصص مشابهه .. اخاف على اذن ولدي منه .. كلما بكي بالليل اتوقع انه داخل اذنه ولا قارصه
ازمه وربي
واعذروني على الاطاله
احبكمـ
