أصابع الكانيلونى على طريقتى :)

أهلا بأحلى فراشات

طبعا كلنا عارفين ان الكانيلونى بيتعمل بطرق كتيرة وحشوات مختلفة زى العصاج والتونة والجبنة و حشوات كتير فهقدملكم النهاردة كانيلونى على طريقتى المفضلة

اولا: نعمل الفطاير اللى هنحشيها
بيضة- كوب لبن- كوب دقيق وملح وفلفل اسود ونقلب بشوكة لحد ما يبقى سايل
نجيب طاسة تيفال وندهنها زيت ونحط شوية من المقدار على حسب ما احنا عايزين مقاس الفطيرة وننتظر ثوانى ثم نقلبها على وشها التانى وتتحمر على خفيف لونها يكون ابيض مايل للذهبى كده ونطلع الفطاير على صينية كبيرة ومانحطهمش على بعض وهما سخنين منعا للالتصاق

ولو عندك طاسة تيفال صغيرة تبقى روعة ونحط المقدار بحيث نملاها كلها هتطلع الفطيرة مدورة وتحفة لكن انا ماعنديش المقاس الصغير عملت كل اتنين مع بعض

وبعدين نحضر عصاج لحمة مفرومة عادى جدا واثناء التعصيج نضيف سبانخ مثلجة وجزر مبشور بيدو طعم حلو اوى للحشوة

ونفرد كل فطيرة على حده ونحشيها بالعصاج ونلفها ونرصهم بجانب بعض فى صينية وندهن وشها معجون طماطم وندخلها الفرن ونسيت اقولكم ان الصينية تبقى مدهونة قبل ما نرص فيها عشان ما يلزقش
ممكن كمان نضيف علو وشها جبنة رومى مبشورة او بشاميل خفيف على حسب ما انتى عايزة