عالم البنات النسائي كل ما يخص المرأة العربية من ازياء وجمال والحياة الزوجية والمطبخ
.. حبيت اني افيدكم خواتي في موضوع التجهيزات ..
كيف نجهز ومتى نبدا .. و شو الطريقة .. تفضلوا معايه في هالموضوع
الشامل..
بعض الحوامل يكونون متلهفين على التجهيزات .. فيحبون يبدون يشترون أول ما يعرفون إنهم حوامل.. والبعض الآخر ما يتنشط الا يوم يعرف جنس المولود .. وعاد في منهم باردين الفواد 
مثل ما انتوا شايفين في هالصورة .. قسمنا السنه حسب الفصول.. 
أنا بحط لستة مشتريات مسوتنها الاخت أم خلفان و شفتها في كذا موضوع ..
متى نبدأ التجهيزات..
من رايي و تجربتي الشخصية .. انه التجهيزات المفروض تبدا من الشهر الرابع .. سواء عرفتي جنس الجنين ولا لا.. لأنه لازم تكونين مخلصه كل شي قبل الشهر التاسع .. بما معناه انه عندج تقريبا 4 شهور تقسمين فيها تجهيزاتج ..
مثل ما انتوا شايفين في اللسته اللي فوق.. انه التوزيعات تنقسم الى هالفئات:
– تجهيزات البيبي ( لبس و اغراض مثل عدة الاستحمام والسرير وغيرها)
– تجهيزات الأم ( لبس و سوالف استقبال من ترتيبات اكل وتوزيعات)
ولكن الاسعار تقص الظهر مثل ما انتوا عارفين .. فاللي يحاتي ميزانية البيت المفروض يقسم الاشياء الغالية و يوزعها على الشهور الاربعه .. بعض النصائح العامة
– خلج على اطلاع دائم بمواسم التنزيلات .. مثل تنزيلات رمضان .. مهرجان التسوق .. مهرجان الصيف وغيره .. لأنه في هالاوقات تلاقين الاشيا نص السعر أو اقل أحيانا.. ما تتخيلين شكثر بتوفرين على نفسج بهالطريقة .. انا افتكيت من الشهر الرابع والخامس خذت ثلاثة ارباع اللبس من التنزيلات وكله بنص السعر او اقل.. الحمدلله
– كميات الاشياء ترجع لج .. بس تقدرين تقولين في حد أدنى لكل غرض .. مثلا القماطات وايد تخيس ووايد تستخدم اول كمن شهر .. وهي تقريبا رخيصه .. فلازم يكون عندج عالاقل 8 قماطات .. وعلى الغالب عقب ما تربين وتبدين تطلعين للسوق بتشترين زيادة بس اتركي هالموضوع للوقت و خذي الحد الادنى .. ويمكن يوصلج بعد فالهدايا .. الفوانيل الداخليه من سن نيوبورن عالاقل يكون عندج 6 .. و 0-3 عالاقل 10 .. 3-6 عالاقل 15 (f)
– البنات ممكن يلبسون كل الالوان .. حتى الازرق الغامق لو كان الديزاين حلو وبنوتي .. فمب شرط تخلين كل شي وردي علشاان هي بنت .. بالعكس الالوان الفرايحيه تطلع احلى عاليهال .. فممكن تاخذين:
للبنت: اصفر – بيج – اخضر – بطيخي – احمر ..
للولد: اصفر – بيج – اخضر – برتقالي – احمر ..
بس اللي يفرق هو الديزاين .. ولا الالوان حلوة عالكل
– بالنسبة لأغراض الحمام ضروري جدا يكون عندج مقياس الحرارة مال الماي علشان البيبي (i) .. وهالشي بيوفر عليج وقت وبيحفظ البيبي بعد .. و بالنسبة لحوض الاستحمام الافضل انج تشترين النوعية اللي يكون فيها صمام 
ومالج خاطر تلفين فالاسواق فبتاخذين اي شي تشوفينه جدامج بدون ما تفكرين فيه حلو ولا مفيد .. (n)
تقدرين تخلين موضوع الكريمات والشامبو والصابون والبامبرز وهالسوالف حق التاسع .. لأنه هذي بروحها بعد لها سعرها .. بس عالاقل تكون اشيا يديده ومب انه تامه عندج فالكبت من شهور.. انا عن نفسي باخذ اغراضي من موستيلا.. نقلا عن اختي الله يخليها .. 😀
– بالنسبة للتوزيعات (*) .. لازم تفكرين في شي مفيد .. اللي بيي يزورج بيستخدمه .. أو مثلا شي ينأكل.. محد يقول لا حق الكاكاو هههههه .. بس ابتعدي عن التوزيعات اللي فيها مجسم ورده (f) و هالسوالف اللي الناس بصراحة ما تستخدمها .. بس تخسرين عليها فلوس عالفاضي..
ومن رايي بعد ابتعدي عن العطور كفكرة توزيعات لأنه الناس اذواق وصعب تلاقين شخصين يتفقون على ريحة معينه يقولون لج حلوة .. أما عن الكمية فهي على حسب زواركم ..
اسئلي اختج اذا ربت قبلج أو اذا كنتي اكبر بنت اسئلي مثلا بنت خالج او عمج .. وشوفي معارفج انتي اذا كان عندج وايد معارف وزوار حطي عالاقل 70 حبه .. واذا اكثر زيدي .. وعالعموم هالشي اذا زاد ما بينفر .. لأنه حتى اللي بيزورونج فالبيت تقدرين تعطينهم لين تخلص الكمية ..
– حطي في بالج انه بتييج (g) هدايا (g) مختلفه .. بعضها بيكون اوريدي عندج .. وشارتنه وللأسف بتخلينه وممكن تهدينه حد ثاني عقب او تعطينه محتاج .. وبعضها بيكون حلو وبتستفيدين منه ..
الافضل انه المقربين منج واللي تدرين انهم جذي ولا جذي بياخذون لج هديه مثل اخوانج وخواتج .. تتفقين وياهم على شو يشترون علشان تشطبينه انتي من لستتج .. وخذيها من باب السوالف او يمكن هم يفتحون وياج هالموضوع ولا تستحين تقولين لهم علشان تسهلين الامور عليج وعليهم .. ممكن ياخذون لج السرير أو الكبت أو الترولي .. يعني بيوفرون عليج عالاقل ألف أو الفين ريال..
– في اشياء تستخدم واااااااايد فضروري تكون بجودة عالية حتى لو خسرتي عليها اكثر (y) .. بس المهم تكون جودتها عالية .. مثل سرير البيبي لأنه بيرقد عليها حوالي ال 3 سنين (z) .. فمب خساره تاخذين له شي جودته عاليه ينفعه ويكون أمان عليه ما تخافين ينكسر منه شي ويكون خطر .. وراعي بعد انج تسئلين المحل اذا كان عليه ضمان ولا لا.. والغالب انه هالسوالف عليها ضمان .. (y)
اتمنى انه تكونون استفدتوا من الموضوع .. صح تعبت عليه بس المهم انه حد منكم يستفيد ويدعيلي ان ربي يقر عيني في طفلي واولد بالسلامة ومشكورييييييين …
