السلام عليكم ورحمة الله وبركاته
كثير من الناس رواتبهم 20 الف درهم وهذا حالهم تعالوا نتعاون ولكن خل نشوف شو اللى صاير قبل .
اخوانى معوقات السكن كثيره وهى كالتالى :
1- انتظار برنامج الشيخ زايد للاسكان لسنوات طويله
2- ال 500 الف درهم ما عادت تبنى نص بيت
3- الاراضى .. تطلع روحك لحد ما تحصل الارض اللى بتبنى عليها
4- المقاول وما ادراك ما المقاول … ( يكرهك البيت وينشف ريقك ويشفط فلوسك ويعذبك ويمكن يخلص البيت فى موعده )
5- البنك .. ( هيه يا زمن .. يعرف انك محتاج له علشان جي ما يرحمك تاخذ من عندهم 300 الف علشان تسوي البيت وتدفعها 600 الف .. اخ يا القهر الحاجه ذبحتنا )
6- تأثيث البيت .. ( اذا البيت فيه 4 غرف تراك بتاثث غرفتين بالكثير والصاله والباقى لين الله يفرجها عليك لانه فى النهايه ما عندك فلس احمر تمشى فيه حالك )
خلصنا من مشاكل السكن ؟ ما اعتقد لانه اللى سبق ذكره تترتب عليه سلبيات كثيره لا تعد ولا تحصى للمواطن الفقير اللى فكر يستقر ويا عياله ويأمن لهم بيت يحتضنهم
1- كثرة الديون ( اذا راتبك 20 الف بيبقى منه 10 الآف )
2- عدم الاحساس بالسعاده بالبيت الجديد لانه صار هم عليك لانك تعذبت قبل لا تحصله سنوات وبعد ما تحصل بتتعذب ضعفهم من كثرة الديون
3- هبوط المستوى المعيشى لك ولأهلك ( يا حرمة اسمعى تراه راتبج الشهرى 1500 لج ولعيالج ماشى غيرهم ولا تدلعين اصبرى واتحملى )
4- مشتريات التزامات البيت من اكل وشرب لا تقل عن 1500 درهم شهريا
5- سيارتك مديل 1999 وكل يوم طايحه بالكراج ومن خساره لخساره لانك مش قادر تشترى سيارة يديده .
6- فواتير الكهرباء والماء والتيلفون والغاز والشغاله( لا تقل عن 2500)
7- ابوك وامك اللى ربوك وتعبوا فى تربيتكم ما تقدر تفرحهم ( آه يا القهر ) تعطيهم الف رهم شهريا مناصفه .
8- برنامج زايد للاسكان يخصم من راتبك 1660
9- مصاريف متفرقة ( لبسك .. عطرك .. بترول سيارتك .. عشاك مع ربعك .. الخ ) 2000 درهم
10- تضطر فى كثير من الاشهر انك تروح للبنك تكشف حسابك لاشياء خارجة عن ارادتك ومفأجاه وتبدا مشاكلك مع البنك .
شباب اكمل والا بس لحد اهنيه ؟
وايد اشياء ما ذكرتها لخصوصيتها بس بكل امانه بيت الاحلام صار هم وغم وصار ضد الاستقرار الاسرى بالرغم من انه الهدف الاول للحكومة الكريمه .
الله يرحم ابونا الشيخ زايد رحمة الله عليه … كلمته ترن فى اذنى ( زايد ما يباه حقه .. زايد يبا لهذا الشعب التعبان ) يا الله يا زايد نتعذب يوميا من فراقك الله يرحمك ويسكنك جنات النعيم .. وانعم الاب وانعم القائد .
ملاحظة : لو نكتب اهنيه من اليوم لبعد 10 سنوات ما راح يحسون فينا الشيوخ لانه اللى تحتهم يوصلون الفكره غلط عن المواطن الله لا يبارك فيهم .
ملاحظة : تعالوا نجتمع ونتصل فى برنامج البث المباشر ونثير هذة الطامة الكبرى لحكومتنا الرشيده وصدقونى شيوخنا فيهم خير ومحد بيقصر ويانا بس يبا همه من الشباب وعدم التخاذل وخاصه بالاعذار اللى ما تودى ولا اتييب .
والله يا بوشمة محد يلومك على اي كلمة تقولها….. نحن كنا ساكنين بمنطقة شعبية في بني ياس و البلدية قررت ازالة المنطقه عشان تخططها اراضي …. المنطقه عمرها 28 سنه و معظم اهلها متقاعدين و معظمهم ماخذين قروض من هيئة القروض او من البنوك لانهم بنوا في بيوتهم غرف و أضافات عشان يستوعبون الزياده في عدد الاسره هذا غير انه كثير منهم اولادهم المتزوجين ساكنين معاهم تخيل ان اقل بيت في هالشعبيه فيه 8 غرف و ميلسين غير عن صالة العائله…. تدري يا بو شمة شو سوت البلديه عطتهم بدال بيوتهم بيوت في الشامخه عدد الحجر فيها 5 غرف نوم و ميلس للحريم و ميلس للرجال مع غرفة طعام ؟؟؟؟ تصدق انها ما يت حتى لجنه تمر على البيوت و تسوي حصر عن عدد الاسر داخل البيت الواحد و كم الشخص خسر في بيته و كم عليه ديون من هيئة القروض او البنوك …… بس قالونا هذا تعويضكم بيت ببيت لا أكثر والله نحن لحد الحينه مو قادرين نسكن في هالبيت و منتظرين القرض بس عشان نبني غرف و ملاحق عشان تكفينا و نسكن فيه و غيرنا الله يعينهم يلي عليهم ديون والله مدري شو بيسوون الله يعينهم و يعين الجميع
انا لا اعلم الغيب
بس اللي اشوفه كثرة التواكل عندناااا
يااا حكومه ابا اعرس يااا حكومه ابا ابني بيت يااا حكومه سدددوو سلفيتي يااا حكومه …..
انت قبل ما تتزوج فكرت بنت الناس وين بتسكنها
فكرت في عيالك وين بيسكنون بعد عمر طويل (ان شاء الله )
فكرت في يوم تسجيلك في الاسكان انه بيي يوم بتحتاج فيه كل درهم تصرفه
سير مواقف السيارات اللي بالقرب من برنامج الشيخ زايد او مؤسسة محمد بن راشد للإسكان
بتعرف ان الغلط منااااا و ليس من الحكومه
ليش تترياء 5 سنين لو كل واحد من اخوانك و اصحابك مسوين جمعيه بتقدرون تبنون بيت او اكثر كل سنه
في واحد من الشباب اعرفه عنده اعداديه فقط تعلمت منه هذا الدرس
متزوج و باني بيت و غير مديون الا للاسكان فقط
كان يضحك علي يقول انتو اللي رواتبكم و شهاداتكم احسن مني ما تعرفون تتصرفون
الله يذكره بالخير كان يشتغل و يوفر في نفس الوقت
و يوم بغااا يبني بناء على قد بيزاته فقط
ليش ما تكون شكوتك من رفع اسعار البناء و تلاعب المقاولين و الاستشارين و موردي مواد البناء
اصبر اصبر خذنى معاك بصلى وبرجع مع السلامه .
شيخي انا فى هذا الموضوع بالذات اتكلم عن شباب دولة الامارات اللى عارف مسؤولياته ناحية اهله انا ما اتكلم عن شخص عمره 20 سنه توه مشتغل ويستلم 15 الف وراكب رنج سبورت !! فيه شباب ما عندهم مسؤوليات وتحصله اول ما يشتغل على طول رنج اسبورت او كورفت او بورش ولكن تعال خلنا نشوف الشباب اللى يالس ياكل فى نفسه علشان يربي عياله ويحاتيهم ويبي يوفر لهم الحياه الكريمه هل الشباب المستهتر اللى المفروض ناخذ عليه او الشباب اللى قاعد يربي فى عماد هالوطن ؟
غير جذيه الجنسيات الاخرى الشركه اللى تدفع له عن السياره يعنى يحصلها بلاش وهذا بند من بنود العقد بينهم ( وايد منهم يحصلون على هالميزه ) بالرغم من انه شباب دولتنا عندهم الكفاءه ولكن صعب يحصل هالميزه !!
والشباب اللى يتحمل المسؤوليه فى الوطن فى تربية اجيال قادمه صدقنى تحز فى نفسه انه يركب سياره اخر موديل فى سبيل توفير سبل الحياه الكريمه لاسرته وهذى اعتبرها تضحيه ولو بسيطه .
وفى موضوع الراتب ال 20 الف نفس الكلام اكرره ابيك تسويلى خطه علشان اعيش مع عيالى وانا مستانس وابنى بيت واوفر وصدقنى ببوسك على راسك اذا عرفت تحل هالشى علما انى ما ابي سيارة اخر مديل ولا اثاث فاخر ولا بيت دورين واتريا منك الجوابك .
صدقنى شيخى الحكومة ما تقصر ويا شعبها وهم ذخرنا ولكن ما يعرفون عنا ما يعرفون احنا من شو نعانى وهذا قصدى من الموضوع ان نوصل المعلومه لهم .
شو نسوي؟ صدقنى هذا السؤال اللى ابي كل شخص يجاوب عليه ونتفق على شى وانا طرحت وجهة نظرى وهى حملة : الشعب يحب الحكومة والحكومة تحب الشعب .
راتبي ؟ اه يا راتبي صدقنى والله ما فيه اى مبالغ تذكر تروح فى اشياء ما لها لازمه , وازيدك لو عندى بيت وهالبيت ما عليه اى مبالغ لا للبنك ولا للبرنامج راتبي بيكفينى وبعيش مرتاح صدقنى .
بس لا تحرجنى وتقولي شو تسوي فى راتبك لانى بكشف اسرار حياتى اللى هى من خصوصياتى .
همسه : اسلوبي مش هجومى وانا احب كل الشباب ولا عندى اى مشكله مع اى شخص ولكن حسيت بشى من الغصه لما قلت ابالغ وخاصه انه هذى الاشياء اشوفها دايما جدامى .
التوقيع :
مواطن ما عنده بيت
ساير اصلي صلاة القيام .. وبدع ِ أن الله يرزق كل من في المنتدى بيت *_^