السلام عليكم ورحمة الله وبركاته

كثير من الناس رواتبهم 20 الف درهم وهذا حالهم تعالوا نتعاون ولكن خل نشوف شو اللى صاير قبل .

اخوانى معوقات السكن كثيره وهى كالتالى :

1- انتظار برنامج الشيخ زايد للاسكان لسنوات طويله

2- ال 500 الف درهم ما عادت تبنى نص بيت

3- الاراضى .. تطلع روحك لحد ما تحصل الارض اللى بتبنى عليها

4- المقاول وما ادراك ما المقاول … ( يكرهك البيت وينشف ريقك ويشفط فلوسك ويعذبك ويمكن يخلص البيت فى موعده )

5- البنك .. ( هيه يا زمن .. يعرف انك محتاج له علشان جي ما يرحمك تاخذ من عندهم 300 الف علشان تسوي البيت وتدفعها 600 الف .. اخ يا القهر الحاجه ذبحتنا )

6- تأثيث البيت .. ( اذا البيت فيه 4 غرف تراك بتاثث غرفتين بالكثير والصاله والباقى لين الله يفرجها عليك لانه فى النهايه ما عندك فلس احمر تمشى فيه حالك )

خلصنا من مشاكل السكن ؟ ما اعتقد لانه اللى سبق ذكره تترتب عليه سلبيات كثيره لا تعد ولا تحصى للمواطن الفقير اللى فكر يستقر ويا عياله ويأمن لهم بيت يحتضنهم

1- كثرة الديون ( اذا راتبك 20 الف بيبقى منه 10 الآف )

2- عدم الاحساس بالسعاده بالبيت الجديد لانه صار هم عليك لانك تعذبت قبل لا تحصله سنوات وبعد ما تحصل بتتعذب ضعفهم من كثرة الديون

3- هبوط المستوى المعيشى لك ولأهلك ( يا حرمة اسمعى تراه راتبج الشهرى 1500 لج ولعيالج ماشى غيرهم ولا تدلعين اصبرى واتحملى )

4- مشتريات التزامات البيت من اكل وشرب لا تقل عن 1500 درهم شهريا

5- سيارتك مديل 1999 وكل يوم طايحه بالكراج ومن خساره لخساره لانك مش قادر تشترى سيارة يديده .

6- فواتير الكهرباء والماء والتيلفون والغاز والشغاله( لا تقل عن 2500)

7- ابوك وامك اللى ربوك وتعبوا فى تربيتكم ما تقدر تفرحهم ( آه يا القهر ) تعطيهم الف رهم شهريا مناصفه .

8- برنامج زايد للاسكان يخصم من راتبك 1660

9- مصاريف متفرقة ( لبسك .. عطرك .. بترول سيارتك .. عشاك مع ربعك .. الخ ) 2000 درهم

10- تضطر فى كثير من الاشهر انك تروح للبنك تكشف حسابك لاشياء خارجة عن ارادتك ومفأجاه وتبدا مشاكلك مع البنك .

شباب اكمل والا بس لحد اهنيه ؟

وايد اشياء ما ذكرتها لخصوصيتها بس بكل امانه بيت الاحلام صار هم وغم وصار ضد الاستقرار الاسرى بالرغم من انه الهدف الاول للحكومة الكريمه .

الله يرحم ابونا الشيخ زايد رحمة الله عليه … كلمته ترن فى اذنى ( زايد ما يباه حقه .. زايد يبا لهذا الشعب التعبان ) يا الله يا زايد نتعذب يوميا من فراقك الله يرحمك ويسكنك جنات النعيم .. وانعم الاب وانعم القائد .

ملاحظة : لو نكتب اهنيه من اليوم لبعد 10 سنوات ما راح يحسون فينا الشيوخ لانه اللى تحتهم يوصلون الفكره غلط عن المواطن الله لا يبارك فيهم .

ملاحظة : تعالوا نجتمع ونتصل فى برنامج البث المباشر ونثير هذة الطامة الكبرى لحكومتنا الرشيده وصدقونى شيوخنا فيهم خير ومحد بيقصر ويانا بس يبا همه من الشباب وعدم التخاذل وخاصه بالاعذار اللى ما تودى ولا اتييب .

83 thoughts on “راتبــــــــة 20 الف درهم”

  1. لا مب غلطان يا غالي .. ونعرف اللي صاير في البلاد و ازيدك من الشعر بيت حتى ما تتهمنا ( لأن كلامك هجومي على المخالفين ) أنا من أسره وسط ليست فقيره ولا غنيه و لا .. الخ

    لكن يوم تقولي وافدين يركبون سيارات مرسيدس و بي ام اخر موديل و مواطن يركب سيراه موديل 95 هاي مبالغه مالها داعي .. صحيح في وافدين مثل ما ذكرت و مواطنين بعد لكن بنسبه قليله جدا جدا و نحن نتكلم عن قضية شعب فمن المفروض تجيب شي غــالب !!

    وتقولي راتبي 20000 الف وما اقدر اوفر لعيالي و ابني لهم بيت … بعد فيها عيازه من صوبك .. تقدر و تقدر وتقدر .. لكن انت تبغي تركب سياره اخر موديل و تبغي بيت طابقين و تبغي تشتري اثاث من ذا ون وتبغي و تبغي ..

    انا معاك ان نحن مواطنين ولازم الدوله تدعمنا و توفر لنا الحياه الكريمه .. لكن السؤال إذا تأخر تحرك الحكومه .. شنسوي ؟!!

    نلعن الظلام ؟!!

    لا .. بل اشعل شمعه و تحرك و تخل عن بعض خرابيط هالأيام ..

    هل من الممكن تعطينا شرح تفصيلي عن راتبك وين تصرفه ؟!!

    اختلاف الأراء لا يفسد للود قضيه ..

    التوقيع

    مواطن ما عنده بيت *_^

  2. كلاامك صحيح و معاناتك معاناتي لكن انت تبالغ شوي في بعض التشبيهات , فهدئ السرعه حتى يكون كلامك له صدى في القلوب و يلامس شغافها ..

    معاك في هالموضوع و أحييك على مبادرتك ..

    عطنى مثال علشان اعرف ارد عليك ؟ فى شو بالغت ؟

    على فكره انت ثانى واحد تقولى بالغت والاول ما رد على كلامى لما اثبت له انى ما بالغت فما اعرف شو موضوع المبالغه هل انكم ما تعرفون شو اللى يصير فى البلاد او انى غلطان فى اللى اشوفه ؟

  3. حليلهم شباب الامارات يسكن عند ابوه او بايجار وهذا اللى ما يتسمى ( جنسيات اخرى ) تسكن بارقى المناطق وباحلى الفلل والابراج وفرى !!!

    فديت ترابج يا اماراتى .. والله لو اسكن بعريش بتم احبها ولكن متاكد انها ما بترضى على عيالها .


    على هالطــاري !!

    أمســات ياســه عــدال أخــوي ،، فــاتح laptop الــدوام ،، يبــا يظهــر لي شغــله يــراويني ،، المهــم ،، فـدخل على فــايل فيه صــور مبــاني وفلل كشششششخه ،، قــلت له هــالروعه وهالجمــال والــدلع وين !! قــال لي ،، هاي مجــرد سكــه من مـدينةالنخــله !! << بحــكم منصبــه الإداري في نخيــل ..

    انصـدمت صــدمه !! بصـراحه شي مب طبيعي ،، ســألته ،، وهالبيــوت حــد فيـها !! قــال لي طبعــاً !! كــلها ناس !! وطبعــاً مب أي نــاس !! كــلها أجــانب !!

    مت من الغصــه !!

    والله يــكون في عــون كل شــبابنــا يــارب !!

    ويـاخوي ،، خــل عنــك ســالفة البـث المبــاشر اللي مادانيــه أبــداً !! هالســالفه يبــالها face to face

  4. ما شاالله عليك..أخويه بوشمه..

    وفيت وكفيت بموضوعك وبالردود..ما تعطي حد مجال أن يغالطك..احسدك على هذا الأسلوب..

    والمفروض أنا ما أشارك…لأنك اشرت أن ممنوع مشاركة البنات اللاتي هب مال مسؤولية..

    لكن..

    لنا وجهة نظر…بما أننا عايشنا وعاصرنا شرات هاي الأمور…ألا وهي..

    ما تحس أنك بالغت بالموضوع..يعني….لو الراتب 20ألف…ترا الحياة تمشي بالترتيب..والتنسيق..والصبر..

    يعني هب كل اللي بنو بيوتهم رواتبهم 100 ألف….!!!!!

    وصدقني دولتنا وحكومتنا هب مقصرة…القصور فينا..ما نعرف كيف ننسق أمورنا…

    عايلات عربية راتبها ربع راتبك…وبنت عمارات ببلادها..لكن كل له ضريبته….!!!!

    ومنو تقصد بالجنسيات الثانية….لا يكون المهنده….ترانا عيزنا مما نضرب المثل فيهم…!!!!

    وصدقني على العبد التفكير …وعلى الرب التدبير….!!

  5. الله يرحم ايام قبل رواتبنا كانت على 4 الاف درهم وكنا عايشين معززين مكرمين … واليوم لو راتب الواحد 50 الف على هذا الغلاء ما يقدر يعيش

    قولوا الحمدالله على كل حال

    الحمدلله رب العالمين …. صدقك قبل كانت الرواتب تحت ولكن كنا نوفر منها اما الحين الرواتب عاليه ولكن ما نقدر نعيش لاخر الشهر براحه .

    هذة ضريبة الطفره اللى بالامارات ونحنا اللى ندفع ثمنها .

Comments are closed.