السلام عليكم ورحمة الله وبركاته
كثير من الناس رواتبهم 20 الف درهم وهذا حالهم تعالوا نتعاون ولكن خل نشوف شو اللى صاير قبل .
اخوانى معوقات السكن كثيره وهى كالتالى :
1- انتظار برنامج الشيخ زايد للاسكان لسنوات طويله
2- ال 500 الف درهم ما عادت تبنى نص بيت
3- الاراضى .. تطلع روحك لحد ما تحصل الارض اللى بتبنى عليها
4- المقاول وما ادراك ما المقاول … ( يكرهك البيت وينشف ريقك ويشفط فلوسك ويعذبك ويمكن يخلص البيت فى موعده )
5- البنك .. ( هيه يا زمن .. يعرف انك محتاج له علشان جي ما يرحمك تاخذ من عندهم 300 الف علشان تسوي البيت وتدفعها 600 الف .. اخ يا القهر الحاجه ذبحتنا )
6- تأثيث البيت .. ( اذا البيت فيه 4 غرف تراك بتاثث غرفتين بالكثير والصاله والباقى لين الله يفرجها عليك لانه فى النهايه ما عندك فلس احمر تمشى فيه حالك )
خلصنا من مشاكل السكن ؟ ما اعتقد لانه اللى سبق ذكره تترتب عليه سلبيات كثيره لا تعد ولا تحصى للمواطن الفقير اللى فكر يستقر ويا عياله ويأمن لهم بيت يحتضنهم
1- كثرة الديون ( اذا راتبك 20 الف بيبقى منه 10 الآف )
2- عدم الاحساس بالسعاده بالبيت الجديد لانه صار هم عليك لانك تعذبت قبل لا تحصله سنوات وبعد ما تحصل بتتعذب ضعفهم من كثرة الديون
3- هبوط المستوى المعيشى لك ولأهلك ( يا حرمة اسمعى تراه راتبج الشهرى 1500 لج ولعيالج ماشى غيرهم ولا تدلعين اصبرى واتحملى )
4- مشتريات التزامات البيت من اكل وشرب لا تقل عن 1500 درهم شهريا
5- سيارتك مديل 1999 وكل يوم طايحه بالكراج ومن خساره لخساره لانك مش قادر تشترى سيارة يديده .
6- فواتير الكهرباء والماء والتيلفون والغاز والشغاله( لا تقل عن 2500)
7- ابوك وامك اللى ربوك وتعبوا فى تربيتكم ما تقدر تفرحهم ( آه يا القهر ) تعطيهم الف رهم شهريا مناصفه .
8- برنامج زايد للاسكان يخصم من راتبك 1660
9- مصاريف متفرقة ( لبسك .. عطرك .. بترول سيارتك .. عشاك مع ربعك .. الخ ) 2000 درهم
10- تضطر فى كثير من الاشهر انك تروح للبنك تكشف حسابك لاشياء خارجة عن ارادتك ومفأجاه وتبدا مشاكلك مع البنك .
شباب اكمل والا بس لحد اهنيه ؟
وايد اشياء ما ذكرتها لخصوصيتها بس بكل امانه بيت الاحلام صار هم وغم وصار ضد الاستقرار الاسرى بالرغم من انه الهدف الاول للحكومة الكريمه .
الله يرحم ابونا الشيخ زايد رحمة الله عليه … كلمته ترن فى اذنى ( زايد ما يباه حقه .. زايد يبا لهذا الشعب التعبان ) يا الله يا زايد نتعذب يوميا من فراقك الله يرحمك ويسكنك جنات النعيم .. وانعم الاب وانعم القائد .
ملاحظة : لو نكتب اهنيه من اليوم لبعد 10 سنوات ما راح يحسون فينا الشيوخ لانه اللى تحتهم يوصلون الفكره غلط عن المواطن الله لا يبارك فيهم .
ملاحظة : تعالوا نجتمع ونتصل فى برنامج البث المباشر ونثير هذة الطامة الكبرى لحكومتنا الرشيده وصدقونى شيوخنا فيهم خير ومحد بيقصر ويانا بس يبا همه من الشباب وعدم التخاذل وخاصه بالاعذار اللى ما تودى ولا اتييب .
والله ياخوي إن كان راتبك 20 ألف أو 1000 درهم انته عايش
لكن هنا تختلف معايير الشراء والتبضع من بين 1000 إلى 2000
ليس كل الحياة بالمال !!
وسبحان الله اللي ياخذ قروض ربويه لابد ولابد ولابد ولابد له يحصل مشاكل بحياته او في تسديد الفائده
شو تبا بعد أكثر من حرب من الله على ربا !!
عزيزي لا تنظر بمنظور ضيق للموضوع
إنظر إلى المشكلة التي تعاني فيها نفسك أولا أو إلى ما تستخدم من أشياء لتعيشك ( على حسب كلامك )
ثم قول الراتب لا يكفي !!
دمت بود
قالوا خذ الحكمه من افواه المجانين
انا اقولك خذ الحكمه من افواه النساء
ولا تستهين برايي في الموضوع
ما تفضلت به صحيح مئه في المئه
لكن حساباتك اذا تمت فقط على الراتب
بتضل مثل ما هي
تذكر ان الله هو الرازق
ومثل ما رزقك بالوظيفه
ما بينساك من رزق ثاني
يعني انعرف ناس مثل هالحاله ورواتبهم اقل وتعبوا
وفجأه طلعلهم ورث ولو بمبلغ بسيط
اشترابهن اسهم او قطعة ارض او شارك احد في شراء ارض
وبعد فتره ادوبلت الاسعار وتعدل وضعه
واحد ضروفه صعبه وراتبه ضعيف ,,اشتغلت زوجته
وعدلوا امورهم
او كبرت بنته او ولده وساعدوهم
او يته منحه من شيخ او ارض او او او
اتصدق انا اعرف وحده كونت ثروتها من بيع فستان عرسها
هي بنت عز وخذت واحد عادي ما كانوا اهلها مقتنعين فيه
وعقب العرس ما رضوا ايساعدونها وشافت نفسها في وضع صعب في ملحق بيت اهله ساكنين
فباعت فستان زواجها ودخلت الاسهم والحين ما شاء الله عليها ساكنه في قصر
تأكد ان الحاله اللي تمر فيها مؤقته
لانك تأسس اسره
تأكد ان الله الرزاق وشوفلك مصدر ثاني للدخل ولا تعتمد ع الراتب
حاول تدرس عروض تمويلا ت البنوك في شراء العقارات ورد بيعهم
عليك اخوي بقراءة سورة الواقعه ,,تجلب الرزق
صدقوني ياجماعة الخير اعرف واحد راتبة فوقة 70000 ولا يقدر يبني بيت .
الله يعينا يا خويه على مشاكل السكن احس كل عائله تعانى من هالمشكله اذا ما كان الاب فالولد او زوج البنت او عمهم او خالهم ….. الخ
نتامل خير يا خويه وان شاء الله بهمة الرجال نوصل صوتنا ليشوخنا وما بيقصرون ويانا وانا متاكد من هالشى لانه عمره الاب ما يرضى على عياله .
حبيب انا بخبرك كيف كان تفكير وشو اللى صار .. اولا لما فكرت اعرس يت فى بالى كل الافكار اللى تكلمت عنها واشياء ثانيه ما ذكرتها ولكن لما تزوجت قلت لاهل البنت انى بسكن عند ابوي لحد ما يطلع لى الاسكان وببنى ان شاء الله وبنعيش .. اوكى شو اللى تغير ؟ تغيرت الاسعار كل شى ارتفع ال 500 الف ما عادت تسوي شى فاتوهقت ثانيا منو قالك انى العب فى فلوسى ؟ الحمدلله رب العالمين انا من النوع اللى يتحمل المسؤوليه تجاه اهله واهم ما فى حياتى اهلى ولو على حساب نفسى وصحتى وقبل الزواج فلوسى كلها لاهلى يعنى ما رحت وطلعت لى سياره بـ 300 الف وقعدت اتمشى فى الشوارع بالعكس انا اساعد اهلى واى شى ينقصهم انا موجود ومن كل النواحى ( طبعا الكل يتفق انه مش غلط بما انهم اهلى ) وما عمرى فكرت انه بيي يوم وبكون محتاج فلوس علشان ابنى بيتى لانى كنت معتمد على برنامج زايد للاسكان بشكل كلى لانه برنامج وطنى ومن رئيس الدولة الله يرحمه ويغمد روحه الجنه ولكن اليوم هالمبلغ اللى يعطونا اياه كقرض ما عاد يكفى للبناء وهذا سببه الطفره اللى صارت فى الامارات واهنيه اسالك سؤال انا كمواطن شو الفايده اللى حصلتها من الطفره اللى صارت ؟ انا بقولك الغلاء .. ( واشياء ثانيه صعب اتكلم فيها لانها تمس شعور داخلى وكلكم تحسون فيه ولكن مش حلوه نتكلم فيها الحين لاننا بنطلع برع الموضوع )
كيف انا واخوانى نسوي جمعيه اذا كل واحد فينا يدفع ديونه وسبب الديون البيت والغلاء ؟
شيخى بالنسبه لربيعك فما تقدر تجزم انه من 2000 او 3000 اللى جمعهم يقدر يبنى بيت فى هالفتره لانه بحسبه بسيطه راح اقول 3000 * 12 = 36000 * 5 = 180000 شو بتسويله فى غلاء هالاسعار؟
يمكن اربيعك مسوى ملاحق بس يعنى غرفه وصاله ولكن روح اساله هل تقدر تبنى بيت 4 غرف وصاله ومطبخ و3 حمامت اليوم ؟ اتوقع راح يقولك احتاج 800 الف
انا ما اقول انه اربيعك طريقته غلط ولكن هذا الكلام كان المفروض نسويه لما كان عمرنا 22 سنه علشان نقدر نبنى فى هالوقت + برنامج الشيخ زايد للاسكان .
بالنسبه لغلاء الاسعار كلامك منطقى المفروض نثير مثل هذى الاشياء اللى مسببه لنا صداع شبه يومى ولكن تتوقع انه الاسعار نزل لاسعار ما قبل الطفره ؟ خاصه فى ظل التعب والمليارات والتخطيط اللى تعبته الحكومة للوصول للى احنا فيه اليوم ؟
الطفره فايده لدولة الامارات من الناحيه الاقتصاديه ولكن هالشى يسبب مشاكل كبيره لشعب الدوله وهذا اللى حاصل صح ولا لا … ووزارة الاقتصاد حاولت وتحاول انها تضبط الاسعار ولكن منو يستجيب من التجار ؟ لا احد ولو فيه احد يستجيب فبيكون 1% من التجار وتتوقع لو التجار التزموا باسعار وزارة الاقتصار بنستفيد وايد ؟ اذا كان بيتك بيكلفك مليون قبل الالتزام بيكلفك 900 الف بعد الالتزام فمعناته ما سوينا شى ! فهمت قصدى