حراااااااااااام ماقبلوني للشغل

إتصل فيني مركز الفطيم للتدريب والتطوير وقالولي عندك مقابلة ييب وياك

6 صورة شخصية مب 4 أو 2 لااااااا 6

وصورة الجواز وصورة شهادة الميلاد وصورة …الخ

سرت المقابلة قالولي نحن من دبي فيستفال وعندنا شواغر قتلهم شو الشواغر

قالوا سكيورتي عشان إنته ماتعرف إنجليزي وايد والداوم شفتات مسا وصبح

من 8:30 لين 5:30 ومن 5:30 لين 12:30 فليل والدوام 6 تيام في الإسبوع

وياهم يوم الجمعة قتلهم وإنزين الراتب قالوا 4 تالاف خلال فترة التدريب التدريب

طبعا 6 شهور وعقب فترة التدريب بيزيد 13% أو 8% ، أنا كنت متردد للوظيفة

حتى هم قالولي عندك من يومين لثلاث تيام تفكر وسر شوف المول إسمه وتر

فرونت في دبي فيستفال سرت شفت المكان طبعا قبل ماتخذ قراري بالقبول

شفت المكان وايد مناسب وقريب من سكني إتصلت اليوم الثاني قتلهم موافق

والمكان مناسب قالولي المسئوله بتتصل فيك عقب عقب ماتريتهم إسبوع

إتصلوا فيني اليوم وقالوا ماقبلوك قتلهم السبب قالوا no English قتلهم إنزين

قالولي مايبون أنجليزي جان تقولي ترية شوي حطت سماعة التلفون ويلست تقول لربيعتها

شو هذا فضحتونا ويالأوادم عقب قالت لي مكتوب على الورقة جذه no English ،

أنا اللي أبا أعرفه ليش كل هاي الشعارات اللي حاطينها في مركزهم المواطن أولا

يعني حتى وظيفة سكيورتي ( ناطور ) وماقبلوني وأنا عندي ثانوية عامة ونسبتي 80% الله كريم