السلام عليكم و رحمة الله و بركاته
الحمد لله بدينا المشوار .. و اول موظوع لي في هالمنتدى انشالله ينجح ..
الموظوع موظوع سيايير .. طبعا شرات ما الكل عارف انه اسعار السيايير وايد مرتفعه فالبلاد … كل انواع السياير.. و انشالله انا بالتوفيق من ربي و عون الله اقدر اني اوفر لكل عظو السياره الي يباها . و اللون الي يبيه و المواصفات الي يباها و باحلى سعر يرظاه ..

والمشروع في بدايته .. و انشالله اتوفق و اكمل و افتح شركه .. و كل هاذا بتوفيق ربي و تشجيعكم لي ..
في البدايه احب اشرح الموظوع
في انواع وايده من السيايير داخله فالمشروع
بس انا ابي اي واحد يبي يتعامل معاي :
1- يطلب مني النوع الي يباه .. و بنتفق على السعر وانشالله يكون راظي .. و انا طبعا اسعاري راح تكون اقل عن اسعار السوق ..

2- يتم الاتفاق على العربون و الجزء المدفوع مقدما ..

3- اشحن له موتره .. و اول ما يستلمه يدفع باقي المبلغ ..

4- ااكد انه ما راح يدفع العظو ولا درهم غير المبلغ الي بنتفق عليه .. لا عشان شحن ولا جمارك ولا اي شي .. المبلغ المطلوب و خلاص .. بيستلم السياره كامله ..

والسيايير كلها بتكون مواصفات امريكيه .. و مستورده من امريكا .. .. .. انا حاليا في امريكا .. و عشان جي باديين البزنس هاذا ..

الطلب راح يكون على حسب ما تبون .. اي نوع من المواتر ..

مزراتي
مرسيدس
بي ام .. اي شي في خاطركم انشالله يكون متوفر ..

السياره الي بييبها لكم راح يكون معاها تقرير يثبت انه ما فيها اي حوادث .. من كار فاكس ..

الشحن مع التامين و تقريبا بياخذله 4 اسابيع من وقت الشراء لين وقت وصول الموتر لين باب بيتكم J
انا بحاول اني آخذ طلبات محدوده عشان ماريد ولا شي يتاخر ولا شي يكون ناقص وكل شي يكون على اكمل وجه
اتمنى من الاخوان التشجيع و التعاون .. و ربي يوفق الجميع ..
تحياتي …

One-person

446 thoughts on “&&&&&&&& الي يبـي يشتري سيارة .. طلبات السيارات من امريكا.. ( سيارات للبيع ) &&&&&&”

  1. انا لاقي هني في الامارات 2007 سلفر وارد فل
    ماشي 33000 مايل

    بــ 77500

    ما تشوفين 85000 وايد شوي وانتظار 45 يوم

    اخوي دام لاقي ارخص توكل ع الله و خذه .. انا ما اقدر اوفره لك بهالسعر ..

    واسمحلي بس السعر الي انته لاقيه خيالي .. يعني يمكن الموتر مدعوم او غرقان

    لانه ارخص شي لقيته 16 الف دولار سعر الموتر بدون تاكس .. ولا شي .. بس سعره .

    غير الشحن و التامين الشامل ع الموتر 3000 دولار

    والجمارك 1000 دولار

    والعمولة و التخليص و الفحص و اوراق التايتل .. 3000 دولار ..

    يعني الناتج 85 الف درهم … ها موتر ما فيه حوادث عندك تقريره

    والمهم ع راحتك ..

    لو تبا حياك و لو هب عايبنك السعر بعد الله يوفقك

    شكرا

  2. السلام عليكم اختي االمواصفات المذكوره موجوده بفئة اللمتد لدينا بالسعوديه يبدا من 138000حتى158000 لموديل 2009 طبعآ ع الزيرو من وكالة تويوتا
    بالنسبه لعرضك في السياره 2008 لم توضحي اختي اي شي عن السياره* اللون 4*ويل ولا2*ويل *المقاعد * العداد * الفئه وشي* لمتد او* ستاندر اوب*لتينيوم* العجلات* المونيوم مقاس 20 ولا *مقاس 18 *اللون الداخلي* جلد ولا ستاندر* قماش* رصاصي *ولا بيج
    اعتقد المعلومات متوفره عندك على الموقع المعروضه فيه السياره.

    السموحه

    هلا اخوي ..

    انا قلتلك 136 اتوقع يعني شي فالثلاثين كان .. يعني نفس السعوديه !!

    يعني اخوي دام نفس السعر خذه من السعوديه ..

    شكرا عتواصلك الدايم

    وتحياتي
    والسموحة

  3. الله يوفقج في هذي التجارة ويعينج على صدعتها ……… والسموحه

    شكرا اخوي عالدعوه الحلوة و المرور الاحلى

    تحياتي لك ولا يهمك قدها و قدود نحن

  4. السلام عليكم هل في سعر معين للسياره الي بشتريها
    اذا السياره سعرها مثلا 25000 او اقل هل ممكن شرائها

    هلا اخوي

    لا ولا يهمك اخوي بس حط فبالك انك حرام تدفع نص قيمه الموتر على شحن و عمولة و جمارك بس !!

    يعني الشحر يكلف 11 الف تقريبا و يمكن اقل يمكن اكثر في اكثر عن مقياس يحدد . !! مع التامين والجمارك 5% !!

    يعني حط فبالك هالشي وتوكل ع الله

    تحياتي لك .

  5. انا لاقي هني في الامارات 2007 سلفر وارد فل
    ماشي 33000 مايل

    بــ 77500

    ما تشوفين 85000 وايد شوي وانتظار 45 يوم

Comments are closed.