السلام عليكم ورحمة الله وبركاته

الكل يعرف الكزس الفورويل LX 570 وفي هذا الموضوع نبا نطرح شو (ايجابيات وسلبيات) هالسيارة من حيث الشكل والسعر والسيرفس والمشاكل الي تصادف مستخدميها ومن حيث الثبات والهدوء على الطريق و التقنيات لي فيها و هل قاصرنها شي المصنع نسى يضيفه فيها

يعني باختصار نبا تقييم شااامل عنها

الي يحب يشارك يتفضل يقول رايه عشان الكل يستفيد من هذا الموضوع

129 thoughts on “الكزس اليديد Lx 570 *ايجابياته وسلبياته*”

  1. يا جماعه اسواقتها دلع
    بس فيها شي ما عيبني انك يوم تشغلها بالريمود كنترول من بعيد تشتغل بس من تفتح الباب تبند السياره

    هذا الي ما عيبني فيها بصراحه

    السيارات الامريكيه مثل الجمس والشفر عادي تركب وتسوق وما يبندن

  2. الموتر مريح في سواقته وهيبه ومكينته قويه ولكن في عيبين وانا متأكد منهم لاني وصلت الموضوع لمدير عام اللكزس إلي مكبته موجود في دبي فيستفال ستي. ..
    1 – القير يوم يبدل من 1 إلى 2 فيه دقه وأيضا عند الوقوف في دقه بعد خفيفه بس تحسبها.
    2 – الستيرنج (السكان) ثجيل اذا بتقارنها باللكزس Lx 470 موديل 2007 (الشكل الجديم).
    وطبعا هل المشكلتين في 90% من السيارات الموجوده عندنا وعلى كلام المدير انه في قطعتين وحده للقير والثانيه للستيرنج طلبوهم لجميع السيارات هذي وسيتم تبديلها على الضمان والاتصال فالزبون فور وصولها .
    إلي خلاني احتشر عليهم واوصل للمدير انه وانا مودي الموتر فالتشيك الاول (1000 كم) كان شي 4 شباب وعندهم نفس المشاكل وعسب جيه اتفقنا انه نظهر من الوكاله وسيده عند المدير فدبي.

    غير إلي ذكرته الموتر من أروع ما يكون وبالنسبه للعيوب تراها بسيطه وبتتبدل على الضمان حتى لو مشيت السياره فوق ال 100 ألف دامك اتشكيت من هل الشي وأرجو من جميع الاخوان الي عندهم الموتر انهم يطالبون في حقهم

    عندي وارد بهوان والحمدلله القير ما في اي عطل


  3. السيارة عائلية أكثر من شبابية الايجابيات نظام التتبع ممتاز حيث أنك لوغفلت تمسك بريك السيارة بروحها
    أحسن عقب تركيب الرنجات 20 ثبات أكثر أو يتراوالي
    صرفية البترول أقل 6 سرعات
    في البيع لايطيح سعرها
    اللليتات فيها زينون في الفول ليت فقط
    الدي في دي يشتغل الامامي في الباركنج فقط
    فيها معظم وسائل الراحه دي في دي شنجر وسي دي وتبريد السيتات وكروس كنترول وكميرات امامية وخلفيه ونظام هيدروليك ومن داخل بيج والسرعه تطوف 220 وثبات جيد لاتقارن بالاماني
    والسموحه

    أنا معاك الرنجات 20 أثبت من رنجات الوكاله بس في الرمل خامه

    وبخصوص الزنن
    اللكزس 570 فيها زينون في الفول ليت والديم ليت بس الزنن درجات

Comments are closed.