بتوجيهات من المغفور له بإذن الله تعالى الشيخ زايد بن سلطان آل نهيان رحمه الله تم انشاء جامعة زايد في كل من امارة ابوظبي وإمارة دبي للتخفيف من الضغط على جامعة الإمارات في مدينة العين وفي نفس الوقت تدريس الطالبات في جو متطور ومعاصر مع الحفاظ على العادات والتقاليد والحفاظ على حشمة الفتاة من الإختلاط بفترة الدراسة.
طبعا هاي مقدمة كلنا نعرفها والحين خلونا نرمس عن اللي بيستوي خلال الفتره الياية
خلال معرض التوظيف قبل تقريبا شهر في امارة ابوظبي ( أرض المعارض ) جامعة زايد كانت حاضره وبقوه وكانن هناك كم من بنيه في قمة الأدب والإحترام ( عسى ربي يحفظهم لأهلهم ان شاء الله ) وتخبرتهم عن مجال الدراسة العليا في الجامعة وما قصروا اجابوا عن كل الأسئلة بس تفاجأت بقرار راح يتم تنفيذه قريبا واذا ماكنت ناسي راح يكون على السنة اليايه
القرار هو تدريس الشباب في جامعة زايد بعد التخرج من الثانوية العامة
؟؟؟
اللي اعرفه ان جامعة زايد للبنات بس فليش غيروا التوجهات السابقة ؟؟؟
بيقولون والله الشباب بيحطونهم في كلاسات مفصوله عن البنات وراح نخلي عليهم سيكيوريتي بس هالشي مستحيل ينجح لأني شفت شباب يدرسون في تقنية الطالبات بدبي والمفروض يحطون عليهم سيكيوريتي ولكن الشباب ما شاء الله يتمشون على راحتهم وكل واحد تقول كإنه يتمشى على الكورنيش
يعني سالفة انهم بيحطونهم بروحهم هاي انسوا انها تنجح. في نفس الوقت الشباب يبون ياكلون ولا يشربون واكيد بيشترون من الكانتين او المطعم وهالمكان مختلط يعني الاختلاط اذا ماكان بالكلاسات راح يكون بالكانتين
اعرف ان بعضهم بيطلعون فيها وبيقولون انزين اذا البنيه محتشمه محد بيدوس لها على طرف والاختلاط موجود في المولات وبالدوامات
ردي عليهم ان في فرق كبير لما احط شباب اعمارهم ما بين 18 الى 19 سنه ما بين بنات اعمارهن ما بين 18 الى 23 سنه
مستوى تفكير الشباب صغير والسبب العمر لأنهم ما عاشروا الاختلاط من قبل بمدارسهم وماكانوا موظفين وخبرتهم قليله والبنيه بعد اللي توها مخلصه الثانويه وطمه ماتعرف شي وفجأه تحصل عمرها تدرس بجامعه بين شباب اذا ماكانت عاقله ومنتبهه على طول بتضيع
لما البنيه تتخرج من الجامعة واشتغلت في مكان مختلط هاييج الساعه بيكون مستوى تفكيرها انضج لأن عمرها تقريبا بيكون حول 22 او 23 سنه يعني اعقل وافهم ( المفروض ) من البنت اللي عمرها 17 و18 سنه
هل نقدر نقول بأن هاي هي الخطوة الثانيه للإختلاط بالجامعات الحكومية بعد ما بدأتها كلية التقنية العليا للطالبات في دبي ؟؟؟
انتظر تعليقكم على الموضوع والرجاء ثم الرجاء النقاش حول هالموضوع وبدون تجرح وذكر اسماء
والله يعين
اخوكم
ابو شوق
بالنسبه للقرار تم تنفيذه وفيه شباب الحين يدرسون بجامعة زايد وهم عسكريين وفي مقر منفصل تماماًعن مقر البنات وبالنسبة للشباب المدنيين راح يتم تدريسهم من السنه اليديده ونفس الشي في مكان منفصل
ياخي منو قالك انه في اختلاط ….
جامعة البنات بروحها و الاولاد بروحهم
بعدين الرجال للعسكريين فقط وما في حد يدخلها لا بنات ولا حتى المدنيين
لا حول ولا قوة إلا بالله
اول كانت البداية بالماجستير وقلنا ما عليه لأن التكاليف عليهم تكون كثيرة وما في عدد كافي من الطلاب وصار مختلط
والحين الجامعة
وبكرة الثانوية
اللهم وفق ولاة امورنا لما تحبه وترضاه ويسر لهم البطانة الصالحة
والله هالتوجه مب الا فجامعة زايد
حتى الحين فجامعة الامارات بيسوون هالشي فالكلاسات بس بيكون منفصل ومن هالسوالف
والسكنات قريبة من بعضها على اساس شو اونه مدينة جامعية وحدة
خلوها عالله …
راح زاايد الله يرحمه … وراح كل شي
المفروض يبنون مستشفى توليد حذال الجامعة لو بيسوون هالشي …
احس الشباب بيستانسون خخخخخ … ما بيصدقون
الله المستعان ..