انا هقولكم بالظبط الى حصل معايا يوم الكشف الطبى الخاص بالمؤهلات العليا ( تجارة ) يوم 6/11/2010 فى منطقة تجنيد الهرم
هخش فى ساعة الكشف على طول ومش هتكلم عن الاجراءات الخاصة بالورق
انت بتدخل الكمسيون الطبى .. مبنى كدة كبير شوية عبارة عن متاهة ( بس متخافش فية عساكر هتقولك خش يمين او شمال ) هيقولك الاتجاهات يعنى
المهم بتدخل غرفة فيها دواليب كتيرة .. وبيخش فيها تقريباً من20 لـ 40 شاب وكل شاب بيقلع هدومة كلها وميكنش لابس غير شورت --> متخافش .. هتقعلة قريب :)
بعد لما بتقلع هدومك وبتفضل على الشورت بس بتدخل غرفة تانية وبيقف فيها كل الشباب فى سوا الحيط والدكتور بيبص على الجسم الخارجى لكل شاب نظرة سريعة مرة بالوجة ومرة بالظهر ( يعنى تدى ظهرك للدكتور)
بعد كدة الدكتور بيسألك عندك حاجة ( يعنى لو عندك مرض او اصابة معينة قولو )
بعد كدة بتخش على غرفة كبيرة بتكشف نظر عادى جداً زى كأنك هتعمل نضارة بتبص على الحلقات ( الدكتور هيشاور على حلقتين بس ) مرة بالعين الليمين ومرة بالشمال
بعد كدة بتروح على مكتب بيمضيلك فية ان كشوفات النظر 6/6 و فحص القلب والصدر و و و كلو سليم
بعد كدة بتخش على الفحص الشرجى والتناسلى --> :)
بتدخل غرفة صغيرة فيها زى 5 دواليب وبيخش 5 شبان بس وكل شاب فيهم بيدخل دولاب .. والدكتور بيطلب منك بعدها انك تقلع الشورت وهوا هيبص بصة سريعة على الـ:) للـ 5 شبان
وبعد كدة بتلف وبيقولك وطى وبيبص بس بصة سريعة والكشف دة اطول كشف طبى بياخد فى حدود 30 ثانية
بعد كدة لو سليم بيكتبلك على الفحصين دوس علامة صح
بعد كدة بتحش على صالة كبيرة شوية علشان تكشف عظام بيصطف فيها حوالى 50 شاب او اكتر والدكتور بيطلب منك انك تفرد ايدك قدامك وتتضم رجليك
وبيعدى عليك الدكتور لمدة 5 ثوانى بيبص على ايديك مفرودة كويس ورجليك وهيا مضمومة فية التصاق ولا لاء
بعدها فى نفس الصالة بيقول شوية امراض غريبة كدة ( ربنا يشفى الجميع ) من اول راسك لحد صوابع رجليك ولو عندك مرض او اى حاجة من الى بيقولها بتتقدم خطوة لقدام
اما بقى لو معندكش اى حاجة من الى قالها .. بتقف طابور .. وبيختملك على الكارت الاحمر والباركور ( لائق ) وهيقولك مبروك :)
بعد كدة بتخش على حتة اسمها المدرسة ودة اخر مرحلة فى الكشف الطبى بتتطلع فية صورتين مؤهل وصورتين قيد عائلى وهوا هيدبسهم كل 2 لوحدهم ( مؤهل و قيد )
بعد كدة بتسلم نسخة لعسكرى وبتسلم نسخة لظابط وبعد كدة ... تستنى لمدة ساعة او ساعتين او 3 ساعات عقبال لما يجيبولك ورقة 110 جند الى
بتفيد انك: فولان الفولانى - مؤهل: عالى - خريج جامعة/معهد : كذا - قسم:كذا
الرتبة : ظابط احتياطى(لو خريج جامعة حكومية)
او : وجنــــــــــــدى( لو خريج معهــــــــــــد )
لو ظابط بيحددلك ميعاد الارجاء:6/12/2010
لو جنــــــــــــــــــــــــــــــــدى:6/1/2011
واى استفسار بخصوص اى حاجة تخص التقديم للجيش والكشف الطبى انا مستعد اجاوب عنها
رجاء .. التقييم اذا استفدتم من الاجابة
