السلام عليكم ورحمة الله وبركاته
قال رسول الله صلى الله عليه وسلم : من نفس عن مؤمن كربة من كرب الدنيا نفس الله عنه كربة من كرب يوم القيامة
والله ترددت كثير عشان اطرح مشكلتي هني بس والله ما باليد حيله لازم اشاور اخواني
انا طالب في امريكا في احد الولايات و انا ادرس على حسابي الخاص و متزوج وعندي طفل وكنت قبل اشتغل في احدى الدوائر الحكومية بس طبعا الحماس الي فيني زاد اشويه و قدمت استقالتي عشان اكمل دراستي الجامعية وطبعا ان استخرت قبل لا اسوي اي شي وانا كنت معتمد على مكافئة نهاية الخدمة بس تقريبا طارت في السفر والدراسه
المشكله اني كنت اطمع في الالتحاق في بعثة التعليم العالي بس الصدمه يوم كلمة الملحقية الثقافية في واشنطن قالولي نحن ما نقدر نسويلك شي ولازم قرار الابتعاث يصدر من وزارة التعليم العالي في ابوظبي قلتلهم انا متواجد هني وما اقدر اسيير ابوظبي لاني مرتبط بالدراسه وزوجتي حامل يعني الوضع صعب علي بس ماشي فايده حتى قلتلهم ابي اكلم السفير قالولي ما بيسويلك شي , وقبل لا ايي امريكا والله احد موظفين الوزارة قالي لازم تفتح ملف في البلد الي بتدرس فيه عشان الملحقية الثقافية يتابعون مستواك الدراسي …….
والله يا اخواني مب عارف شو اسوي والله كل الي طالبنه اني اكمل دراستي الجامعية حتى عندي ارض منحة والله ما عندي مشكله اتنازل عنها مقابل يعطوني بعثة بدالها لان صدق والله ما في حلول جدامي والوضع كل يوم عن يوم يكون اسوء لان المصاريف يالسه تزيد والمشكله اني ما اقدر ارجع بعد كل المصاريف الي صرفتها ……
سامحوني على الاطاله بس ابي شوركم وجزاكم الله خير
الله يسهل امورك يا بو نوره
الله يسهل امورك يا بو نوره
مثل ما قالولك الشباب ,, خل حد من اهلك و قرابيبك يرتبلك الموضوع من هنيه ,, يقدم اوراقك و حتى لو يدخل ع الشيخ نهيان و يخبره السالفه ,, ان شاءالله ما بيقصر وياكم
و انته ريال بديت في الدراسه هب نفس الصلاب الجداد الي لازم يلتحقون بالمعاهد في الخارج و لين ينجحون في امتحانات التوفل و اليس و و و
بس السفاره ما اعتقد بيسوولك شي ,, صدق لا اتعب عمرك وياهم ,, لان كل الاوامر توصلهم من هنيه
او خبر حد من قرايبك يقدملك في الديوان (بعثه دراسيه)
اما جهاز الاستثمار ,, انساه لانهم وقفوا ابتعاث الطلاب مثل قبل ,, لازم نسبة الثانويه عندهم تكوون مرتفعه على حد علمي
الله يوفقك
الله يسهل عليك ان شاء الله
الله يعينك ياخوي و الله يوفقك ان شاء الله و السفاره الاماراتيه في امريكا الصراحه يبالهم رص شوي لانه عن تجربه ياما نبى استشاره قانونيه و ماشي فايده مساعده بسيطه ماشي فايده لدرجه تحرق التيلفون و يظهر الرقم عندهم مايردون عليك يعرفون انه فلان يتصل ويبى جي و جي و انا اتكلم عن تجربه لين ماوكلتلي 3 محامين على حسابي الخاص للاستشاره القانونيه و المحمى و الخ….و القهر انه نحن الاماراتين ماوصلنا ال900 الف و هم بيدهم و يمشون موضوع كل مواطن اماراتي عرررض…يعني مب صعبه لو يقولك تعال السفاره باجر و خلال اسبوع بنمشي موضوعك عرض و اكيد….و انته اولى ياخي انته مواطن اماراتي طالب علم و شهاده المفروض الحكومه من باجر تتكفل بكل شي من الالف للياء…انته بشهادك مابتضر البلاد بالعكس بتفيد البلاد….بس يالله تعال سمعهم منو الي بيفهم….ااااه الله كريم
مثل ماقالك الأخ تحدي خل حد يتابع موضوعك في وزارة التعليم العالي ولا اتصل عليهم من عندك رقمهم بتحصله على النت
اما بخصوص أرض المنحة اللي تكلمت عنها ترا هذا الكلام مايجوز
انته تسرعت واتركبت غلطة
اول شي انته رايح تكمل دراستك على الاقل أول سنة مايحتاج تاخذ زوجتك معاك لين ماتشوف الوضع وترتب الأمور وبعدين تاخذها هذا اللي يسوونه باقي الناس
تحمل شوي والله بيعينك وباقي الأخوان بيفيدونك