السلام عليكم ورحمة الله وبركاته
قال رسول الله صلى الله عليه وسلم : من نفس عن مؤمن كربة من كرب الدنيا نفس الله عنه كربة من كرب يوم القيامة
والله ترددت كثير عشان اطرح مشكلتي هني بس والله ما باليد حيله لازم اشاور اخواني
انا طالب في امريكا في احد الولايات و انا ادرس على حسابي الخاص و متزوج وعندي طفل وكنت قبل اشتغل في احدى الدوائر الحكومية بس طبعا الحماس الي فيني زاد اشويه و قدمت استقالتي عشان اكمل دراستي الجامعية وطبعا ان استخرت قبل لا اسوي اي شي وانا كنت معتمد على مكافئة نهاية الخدمة بس تقريبا طارت في السفر والدراسه
المشكله اني كنت اطمع في الالتحاق في بعثة التعليم العالي بس الصدمه يوم كلمة الملحقية الثقافية في واشنطن قالولي نحن ما نقدر نسويلك شي ولازم قرار الابتعاث يصدر من وزارة التعليم العالي في ابوظبي قلتلهم انا متواجد هني وما اقدر اسيير ابوظبي لاني مرتبط بالدراسه وزوجتي حامل يعني الوضع صعب علي بس ماشي فايده حتى قلتلهم ابي اكلم السفير قالولي ما بيسويلك شي , وقبل لا ايي امريكا والله احد موظفين الوزارة قالي لازم تفتح ملف في البلد الي بتدرس فيه عشان الملحقية الثقافية يتابعون مستواك الدراسي …….
والله يا اخواني مب عارف شو اسوي والله كل الي طالبنه اني اكمل دراستي الجامعية حتى عندي ارض منحة والله ما عندي مشكله اتنازل عنها مقابل يعطوني بعثة بدالها لان صدق والله ما في حلول جدامي والوضع كل يوم عن يوم يكون اسوء لان المصاريف يالسه تزيد والمشكله اني ما اقدر ارجع بعد كل المصاريف الي صرفتها ……
سامحوني على الاطاله بس ابي شوركم وجزاكم الله خير
الله يسهل اموررك اخووي,,,
الله يفرجها عليك ويوفقك
الله يعينك ويسهل أمورك
وترد بأعلى الشهادات
اخوي لا تعتمتد ع رمستهم
انت مب خسران شي جرب راجع السفارة و ان شاءالله شي حل لموضوعك عندهم
شوف الطلبة الي اهناك و اسألهم اذا حد من وزارة التعليم العالي موجود اهناك
والله يعينك و يوفجك ان شاءاللـه
الله ايسر امورك
خل حد من طر فك يقدملك في وزارة التعليم العالي ويتابع قبولك
وزوده بسجلك الدراسي واوراق تسجيلك وما يثبت بانك منتظم في الدراسه
وممكن بعد يقدملك في جهاز بوظبي للاستثمار