السلام عليكم ورحمة الله وبركاته
حبيت أنزل لكم بعض من أطباقي اللي نفذتها أتمنى إنها تنال إعجابكم 
ملاحظة: بعض الأصناف تعلمتها عن طريق بحثي في الأنتر نت والبعض من كتب الطبخ وبعضها من تخبيصاتي وتجاربي في المطبخ 
اليوم بنزل بعضها وإذا لقيت إقبال وتفاعل و( تشجيع)وعيبكم طباخي بنزل الباقي .
نبدأ بالشوربات
الشوربة البحرية
المقادير :
عدد خمس حبات قبقب ( سرطان البحر)
عدد 3 حبات أم الربيان
عدد حبتين نغر (حبار)
عدد عشرين حبة ربيان مقشر ومسلوق
نص كاس طحين
2زبدة حجم 10 جرام + ملعقة زيت
بصلتان متوسطتان
ملح + بهار أبيض
ملعقة كاتشب ( لكسر اللون الأبيض ) يمكن الإستغناء عنه
ملعقة صويا صوص ( يمكن الإستغناء عنه )
الطريقة :
ننظف النغر ونظيف عليه شوية ملح وخل ونخليه كم دقيقة وعقب
نغسله (عشان تخوز منه الزفرة ) نقطعه مكعبات صغيرة .
نقشر الربيان ونشيل منه الخيط الأسود اللي في الظهر , وعقب نحط عليه شوية خل وملح وعقب نغسله
ونحطه فجدر ونغمره بالماي ونخليه يغلي مرة وحدة نشيل الرغوة من فوق ونحط عليه بهارات السلق أنا أحط
( شوية مسمار, شوية هيل , ورق غار , بصلة صغيرة مقطعة وأعواد بقدونس )
بهارات السلق اللي أستعملها:
نغسل القباقب وأم الربيان وننظفه جيداً ونصب عليه ماي كافي ونسلقه كل واحد بروحه ونظيف عليه
بهارات السلق المذكورة أعلاه حتى يتغير اللون إلى اللون البرتقالي .
نقوم بتنظيفه وتقشيره ونجهزه للإستخدام .
ملاحظة عملية التنظيف مهمة جدا لانه لو ما تنظفت البحريات عدل بتكون الشوربة طعمها غير مرغوب.
نحط الزبدة وملعقة الزيت في جدر مناسب ونضيف عليه الطحين ونقلبه لين تطلع منه ريحة زكية ويشقر
الطحين اشوي وعقب ناخذ 3 أكواب ماي ونصبه فوقه بحذر ونخلطه بواسطة مضرب البالون لين يذوب الطحين
وتختفي كل الكتل اللي في الخلطة ( في حال عدم إختفاء الكتل نحط الخلطة في الخلاط لين يتجانس
الخليط) ونرجعه للجدر مرة ثانية .
نضيف النغر اول شي لأنه ما سلقناه ( لاحظت إن النغر إذا إنسلق يصير يابس وما ينمضغ بسهولة ) ونخلي الخليط يطبخ مع
التحريك عشان ما يلصق في قاع الجدر وعقب نضيف بقية البحريات ونحرك .
نضيف البصل المفروم ناعم ( أنا احب أكثر من البصل في الطبخة يعطيها طعم مميز)
نضيف الفلفل الأبيض والملح .
أخر شي نضيف الكريمة للطبخة ونخليها تغلي شوي .
في حال الرغبة في كسر اللون الابيض نحط ملعقة كاتشب .
أنتهت الطبخة
وهذا شكلها النهائي
أنصحكم تجربونها هي صعبة اشوي لان تنظيف البحريات ياخذ وقت لكنها وااااااااايد لذيذة يم يم يم 
وعليكم بالعافية .
شوربة الفريك بالخضار والربيان
هالشوربة كنت أسويها دايما بالخضار لكني يوم ضفت عليها الربيان طلعت لذيذة أكثر وهي من( تجاربي )
المقادير :
نص كاس فريك مغسول ومنقوع فماي ( ننقعة ساعة تقريبا)
نص كاس ربيان مقشر ومقطع قطع صغيرة ومسلوق
جزرة متوسطة
بطاطة صغيرة
بصلة متوسطة
فليفلة صغيرة
طماطة متوسطة
ملعقة نشا مذوب فشوية ماي (لتغليظ القوام)
ملح + ببهارات
يمكن إضافة الخضار حسب رغبتكم)
الطريقة :
يوضع الفريك في 3 كاسات ماء (بعد غسله ونقعه لمدة تقريبا ساعة )
نضعه على النار حتى ينضج الفريك ثم نظيف الخضار المقطعة مكعبات صغيرة ( الجزر + البطاطا ثم باقي الخضار ونترك الخليط ينضج .
نظيف الربيان المسلوق للخليط.
نظيف الملح والبهارات .( أنا أفضل الفلفل الأسود بروحه من غير بهارات أخرى) انتوا حسب رغبتكم
نضيف النشا المذوب في الماء ونحرك الخليط حتى يصبح متماسك القوام قليلاً ( يمكن الإستغناء عن النشا , أنا ضفته عشان يصير غليظ اشوي)
نتركه يغلي ونطفي النار .
طريقة أخرى لنفس الشوربة :
نحمس البصل في قليل من الزيت ونضيف عليه ملعقة صغيرة فلفل أسود ثم نضيف باقي الخضار ونحمسه.
نضيف الماء والفريك ونخليه يطبخ جيداً لين تلين الخضار والفريك.
(في حال الرغبة يمكن إضافة مرقة دجاج بس انا ما أحب أستخدمه)
اللي يميز هالشوربة هو طعم الفريك يم يم يم
شوربة الهريس
المقادير:
كاس هريس
ماء حسب الحاجة
ملح
صدر دجاجة أو نصف دجاجة
عدد 2 زبدة زنة 10 جرام لكل واحدة
الطريقة:
يغسل حب الهريس وينقع في ماء من المغرب .
يغمر الهريس بالماء في قدر ويوضع عليه صدر الدجاج بعد غسله وتنظيفه ويوضع على نار هادئة لمدة ساعتين تقريبا مع ملاحظة الطبخة والتقليب بين فترة وأخرى .
يجب ازالة الرغوة المتكونة من الطبخة كلما ظهرت .
عندما ينضج الهريس جيدا يضرب بواسطة مضرب حتى يصبح ليناً يضاف إليه الماء إلى ان نصل للقوام المطلوب للشوربة .
يترك على النار حتى الغليان يوضع الملح وفي النهاية يتم إضافة أصابع الزبدة لإعطاءها النكهة المميزة .
نكتفي بهذا القدر الحين إذا عيبكم خبروني عشان أحط الباقي
تقبلوا تحياتي
ماشاالله عليج يا عيون الياس
الله يحفظج
رووووعه بصراحه ابدااااع
نتريا المزيد
كل الود
أختـــــــــــــــــي الصغيره,,,,,,,,
شيف المــُنتدى,,,,,,,, لاتنسين حصتي الله لايهينج بغيت من كل طبخه جدر حق 10 أشخاص
ولأنه رمضان على الأبواب,,,,,,,,,,, بنثبت الموضوع
جزاج الله ألف خير,,,,,, على هذا الجهد المبذول
والنقل المُـباشر من المطبـــــــــــــخ
ولو أنج نكلتي فينا وألهبتي جوعنـــــــــــــــــا
لاهنـ ـ ـ ـ ـ ـ ـ ــتي
عاشت عيون اليأس
لازم اقول لك
شاطرة شطور شطرطر:hhhrr5: :hhhrr5: :hhhrr5:
شوربة السي فووود
رهيبة
مشكورة
ياريت يثبت الموضوع وكل حد يحط طبخة حق رمضان
الشكل ماعليه كلام اما الطعم فمااعرف اذا بيجيسني تسمم ولالا هههههههههههههههههههههههههههههههههههههههههههه
سوالف
مشروع
هلا خيو مشروع لا تخاف ما بيجيسك تسمم الحمد لله أطبخ بضمير من يوم صغيرة أحب أطبخ وأجرب ولا مرة حد تسمم من أكلي (ما شاء الله أخاف أحسد عمري) خخخ.
مرورك أسعدني أخي الكريم
تحياتي لك
يسلمووووو ياطباختناااا
وعساه هني وعافيه
أهلين خيو طائر الشوق من زمان ما لك حس ولا خبر الحمد لله عالسلامة
الله يسلمك ويعافيك إن شاء الله نورت الموضوع
تحياتي لك
يا سلام عليج أختي عيون اليأس
راح أجرب طبخاتج …
قبل ما كنت أعرف مطبخنا وين … بس الحين منتقله شقه …و ملانه… شكلي راح أقضي وقتي في المطبخ
حبوبه كثري من طباخج…
راح أنرشحج شيف المنتدى
يا هلا والله بأختي أم الجود كله حياج الله نورتي واسعدني ردج
جربي وإن شاء الله تعجبج طريقتي وبالعافية عليكم
مبروك عليج الشقة اليديدة خيتو الله يعطيكم خيره ويكفيكم شره إن شاء الله
أدخلي المطبخ وجربي ترى الطبخ عالم واسع ما له حدود مثل عالم الأزياء تتفنتكين فيه على كيف كيفج خخخ
بس لاتقضين وقتج كله في المطبخ يوم بتكونين متفيجة ومزاجج زين اطبخي لأنه إذا طبخطي من غير نفس يطلع الأكل مب حلو .
أشكرج على تشجيعج خيتو
تحياتي لج
لذيذة
و مع اني ما اكل الأكلات البحرية
لكن لربما طبق من اطباقك يجعلني اجرب
ما رأيك في ضم شخص لا يحب الأكلات البحريه الى القائمه التي انت فيها
مشكورة على الجهد و مشكوره لأنك فتحت النفس للغداء
غريبة أغلب الأعضاء فهالمنتدى ما يحبون الأكلات البحرية
يسعدني ويشرفني إنضمامك إلى موضوعي أخي الكريم ويا ريت لو تجرب الاكلات البحرية لذيذة ومفيدة.
لك كل الشكر والتقدير على مرورك وعلى كلامك
ما شاء الله عليج …………. خلاااااااااااص موضوعج في ال Favorites … عيبتني الشوربة البحرية لازم أجربها
أنا وبس يا هلا و مرحبا شرفتي ونورتي الموضوع
جربي وخبريني بالنتيجة وعليكم بالعافية
شكرا على مرورج الرائع خيتو
عيون اليأس
بدأ الياس يدخل في معدتي
يوعتينا بالصور والشوربات اللذيذة بس مثل ما قلت في موضوع ثاني… انا احكم بعد التجربة فقط
المووووووووووووهيم :6aar:
بغيت صحن شوربة بحري لو سمحت بس من دون فلفل ولا ثوم وإذا كان معاه كم قطعة حبار و أم الربيان
أكون لك من الشاكرين :sahem1:
يا هلا ومرحبا بك أخوي الشامسي
الله يبعد اليأس عن حياتك وعن معدتك (أهم شي)خخ
يقولون التجربة خير برهان ما أمدح عمري لكن كل اللي ذاقوا طباخي عيبهم الحمد لله ودايما يوم يزوروني يطلبون الشوربة البحرية بالذات .:ajeeb1:
أبشررررر وعندك واحد صحن شوربة بحرية سبيشل للشاعر الشامسي وصلحه .
لك كل الشكر والتقدير على مشاركتك :sahem1:
تحياتي