السلام عليكم ورحمة الله وبركاته
من شهر او اقل اشتريت سيارة للوالد و السيارة وصلت من اسبوعين تقريبا
تم التسجيل السيارة في مرور ابوظبي
و طلعنا رقم مميز للشيبة من مرور ابوظبي (ازرق)
لكن لما دخلت على موقع مرور دبي (فضول) احط ارقام السيارات الي عندي و الحمدلله ولا مخالفة لكن المفاجأة ان لما حطيت رقم اللكزس اليديد طلع على الوالد مخالفة من شهر 2 و السبب السرعة الزائدة في شارع الامارات !!
الوالد لحد الان ما ساق السيارة اكثر من 200 كم ؟؟؟
كيف ياخوان انا مركب الرقم من اقل من اسبوعين يعني في شهر 4 و المخالفة في شهر 2 ؟؟
اصلا الرقم ما ينصرف اذا عليه مخالفة !!
ممكن حل و انا بصراحة مب متفيج اسير دبي و السبب مخالفة و القيمة زهيدة 200 درهم لكن هل هي سرقة او غلطه او شي آخر
الرجاء من له شأن يساعدني ويشوف لي صرفه.
ويلا اقولكم عطوني رقم ثاني جمعه بتصل به الصبح لان عندي اجازة باجر وابي افضحهم 
مابزيد على الجماعه ماقصرو بس الحل موجود عندك انته مطلع الرقم شهر 4 والمخالفه شهر 2 يعني مايباله أول مايقولك عليك مخالفه على طول بطلعلهم الملكيه وبتتضح الأمور ولا تشيل هم .
ويمكن مثل ماقلو الربع غلطه وتعدي . والسموحه
تأكد من المخالفه الي تقوول عليهااا لانه الموقع مايعطي معلومات صحيحه
المهم اذا فعلن طلعت عليكم مخالفه
روح وسأل عن فسم تحويل المخالفاات وبيدلونك علييه وسير عندهم وخبرهم بسالفه
وهم بيطرشون كتااب للجهه المعنيه ,اعني بالجهه المعنيه يعني مكان صادره المخاالفه
يعني مرور دبي او الشارقه او غيره وبالكثير 3 اياام والمخالفه بتروح عنكم بترجع لصاحبهاا الاصلي
وبتوفييق وقول للوالد لايمشي 200
خخخخخخخخخ
اخويه انته لا تشيك في موقع مرور دبي
لانها معلومات خاطئة
ادخل موقع مرور أبوظبي ويعطيك المعلومات الصحيحة
انا اشتريت رقم عند ريال من سنة وشوي,, ونفس الفضول اللي عندك عندي ,, لين يومك اشيك في موقع مرور دبي وتطلع لي مخالفة سنة 1996
لكن يوم اشيك موقع مرور ابوظبي ما تطلع لي المخالفة
ورحت يددت السيارة وما طلعت لي المخالفه ولا دفعت شي
يعني الامور طيبة وما يحتاي تكبر الموضوع ,,
والسمووووووووووووووووووووحة
يا اخوي لازم اتييب رساله ان هالرقم كان باسم المالك الاولي…اتسير مرور ابوظبي.. هم بيعطوك الرساله…
شد حيلك وسر مرور دبي فرع البرشا… و ان شاء الله بيخلصونك نفس الوقت… لانهم بيحولون المخالفة على رخصته او ملفه المروري…
والله يعينك خوي…
اتصل عالرقم المجاني لشرطة بوظبي
وتاكد
ترى مرات يستوي غلط في ادخال البيانات
استوت وياي مرة ,,, لكن خلاص يوم تدفع منو بيردلك حقك