السلام عليكم
بداية أحب أشكر الأخوان مرزوق و gtr3000
لمساهمتهم في توفير خدمة CARFAX لأعضاء المنتدى
وبما أني من الناس اللي استفادوا من الخدمة فالشكر واجب
لكن …
للمرة الثانية ينقذني CARFAX من شراء سيارة لا تصلح للإستخدام “الآدمي” !!
في المرة الأولى كنت ناوي أشري هوندا وارد أمريكا
صاحب السيارة (عربي الجنسية بدون ذكر الدولة) ساكن في دبي
ويحلف بأغلظ الأيمان إن السيارة مالها مثيل في النظافة
صبغة الوكالة وبدون حوادث
وكنت على وشك أني أشتريها
وشفت موضوع الأخ gtr3000 عن CARFAX
وطلبت منه أن يشوف لي أي معلومات عن السيارة
وجزاه الله خير أرسل لي معلوماتها
أكتشف إنها كانت سيارة أجار
وحصل لها حادث قبل شحنها للإمارات
ويوم واجهت صاحب السيارة بالمعلومات أيضاً حلف بأغلظ الأيمان إنه ما يعرف
الحلفان ببيزة عنده
في المرة الثانية كنت ناوي أشتري سوبربان وارد أمريكا
صاحب السيارة (عربي الجنسية بدون ذكر الدولة) ساكن في الشارقة
ونفس الشي
يحلف بأغلظ الأيمان إنها وكاااااااالة
وإن اشتراها بنفسه لإستخدامه الشخصي
ولكن بسبب ظروف شخصية ولحاجته للكاش قرر إنه يبيعها
مع إنها “سيارة ما تتفوت”
شفت موضوع الأخ مرزوق عن CARFAX وأرسلت له رقم الشاصي
وجزاه الله خير رد علي
واكتشفت إنه أيضاً السيارة هذي كانت سيارة أجار
وتم بيعها بعد سنة تقريباً في المزاد
وبعدها بفترة تم بيعها لشخص ثالث
والشخص الثالث تعرض لحادث واعتبرت السيارة (Total Loss)
هذا غير إن العداد ملعوب فيه (Not Actual Mileage)
القصد من الموضوع
نصيحة لأي شخص ناوي يشتري سيارة وارد أمريكا إنه يشيك عليها عن طريق CARFAX
حتى لو فحصها عند أحسن كراج في البلاد
مشكور علي الموضوع
والله العظيم يستاااهلوون الشكر ويستاهلون كل احترام وتقدير
بالذااات اخوي gtr3000 وربي انك افدتنا واااايد
وانقذت نااس من الوقوع ف الغش وانا واحد منهم
وربي يعطيكم الف عااافيه ويوفقكم ف حياتكم ياارب
وفي ميزان حسناتكم اللي سويتوه
نفس السالفه اللي استوت 100%
أول ماخذت الليسن كنت بشتري لكزس وارد امريكا … الريال يقولي استعمالي الشخصي ويحلف بكل ما أوتي من قوه خخخ
وحتى بطل اللي البونيت ويقولي شوف السكروب مبين انه وكاله .. وانا اقوله هيه صدقك وانا !!!! خخ
وفالنهاية وعن طريق الصدفه عرفت عن سالفه كارفاكس .. ويوم سألت عنها واحد من الاشخاص حزاه الله ألف خير قال ن هالسيارة قبل ماتوصل الامارات كانت 75% منها متكنسل!!!!!!!
يعني شو تم منها !!!
وهالشخص من جنسية عربيه بعد ومن بلدان ” الشام ” الحبيبة
وآآآخ ياقلبي ماتتصورون اشكثر تكدرت يوم عرفت السالفه لأني كنت اباها خلااااااض باخذها باخذها ومتطمن وكلشي
مشكووووور اخوي عالنصيحة ^_^
صحيح والله صدقك
الكارفاكس شي عجيب
انا اتمنى لو انه في اي طريقه انه تفتح هالشركه الرائعه فرع فالخليج
والله نحتاج نحن شي شرات ها فالبلاد !!
اهنيه ما عدنا هالشي عشان جذه الواحد يتخوف ياخذ موتر مستعمل .. ومايدري شوه من البلاوي فيه ..
بس انشالله انشالله لو ما فتحولكم الشركه انا بفتحها >> ههههههه الاخت تحلم
لابس انشالله ليش لا
بدرس الموظوع ^^
ومشكور ع الطرح
ولو حاب تشتري موتر اسالني انا ترانيه بعد عندي كارفاكس بجيك لك
وتقبل مروري