كيف تكسر الروتين

مرحبا صبايا و شباب

اليوم موضوعي هو عن كسر الروتين في الحياه اليوميه

و طبعا كل واحد منا عنده روتين في حياته احيانا يحس بالملل الشديد منه و احيانا عادي يسبب له الاكتئاب الشديد و سرعة العصبيه و الضيق

الموهيم قريت في مجله اجنبيه كمن شي نقدر نسويهم و صح انهم اشياء بسيطه و ممكن في اول وهله يبينون انهم اشياء سخيفه بس صدقوووني هالاشياااء تأثر تأثير كبير في كسر النظام و اسأل مجرب و لا تسأل طبيب

• اشتري مجله انت غالبا ما تقرا مجلات من هالنوعيه..و دوم تشوفها على الستاند و تقوول شكلها ممتعه..بس باخذ مجلتي المفضله احسلي…هالمره جرب و خذ المجله اللي دوم تشوفها بس ما جد فكرت تشتريها

• جرب تاكل شي متعود تاكله و لكن بطريقه مختلفه..مثلا اضيف الفراوله او الفواكه المجففه للكورن فلكس… او كسر البسكوت المملح في الشوربه << اعرف ان في ناس يسوون هالاشياء من قبل..و لكن للي ما جربووها خل يجربونها..طبعا هاي امثله و فكروو في وايد غيرها.. يعني انا مثلا احب اكل خبز رقاق ويا بيض مع ” شكر” ههههههههه وايدين يستغربوووون بس انا يعيبني ..و ربيعتي تغط صمونة الجبن في عصير البرتقال ..يعني الامور طيبه بس سوو اللي يعيبكم..لكن لا تخلون حد يشوفكم هههههههههاي و اذا شافوكم ماعليه عقوها في راسي لووول

• غير تسريحة شعرك..يعني اذا بنيه متعوده تسوين قمبوعه..غيري و سوي عقص ..و بالنسبه للشباب سيرو قرعو لووول لا اتمصخر ..يعني اذا متعود دوم تخلي لحيه كامله سير غير و سو قفل..و في بعض الروايات سكسوكه .. و اللي شعره قصير يطوله و اللي شعره طويل يقصه الخ الخ الخ المهم غيرو الشكل الخارجي

• و بدال ما طول الوقت مشغلين الايبود او اليوتيوووب او السي دي في السياره..حطوو الاف ام .. و ما اقصد الخليجيه ..اقصد قناة الاخبار او شي مب متعودين تسمعونه..ثقفوا عماركم شوي و غيرو الروتين اللي دوم تسمعونه سواء كان اغاني او اناشيد..وقفوا شوي و سمعو شي مختلف تماما..و يستحسن تسمعون قران بعد او تحطون نور دبي او قناة القران تتثقفون في دينكم

• اللي عنده شبريه عوده بو نفرين يحاول مره يرقد على الصوب الثاني ..يعني انا متعوده دوم ارقد على الصوب اليمين من الشبريه ..يوم رقدت على الصوب الثاني صدق يوم نشيت حسيت بأحساس مختلف..جربوووو برووحكم و بتشوفووون

• اذهب الي شخص من عائلتك او من اصدقائك تحترمه جدا و لكن ما توافق دوم على افكاره او ذوقه مختلف عنك و تسلف كتاب من كتبه المفضله و اقراه..بتفتح مخك على اشياء يديده

• هاي النقطه مهمه جدا..الا و هي ..شل لابتوبك و غير مكانك..اذا انت في الحجره سير ايلس في الصاله..و بالعكس ..و اذا النت عندكم قوي سير ايلس في الحوي ..تغيير البيئه حواليك وايد بيغير من نفسيتك

• المره اليايه بتطلعين مع ريلج مطعم ..انتي اختاري له الاكل اللي بياكله و خل هو يختارلج الاكل بدون ما الثاني يعرف شو الاختيار لين ما يوصل الاكل..طبعا تقدرون تسوونها مع اصدقائكم..شي يديد

• اشتر شي من زمان خاطرك فيه بس دوم تأجل او تقول ما يحتاي و الناس دوم يقولولك هالشي سخيف ..دراجه مثلا او سياره ريموت كنترووول او بنطلون جينز مطرطر ..و بالنسبه للبنات نعال جلد الفهد مثلا..او جاكيت اخضر فسفوووري..كل انسان في هالدنيا في شي سخيف و تافه يعيبه و لو شافوه الناس بيضحكون..ما عليكم من حد و سيرو خذوه..يوم بتعرفون هالشي ملككم بتحسون بالراحه مهما كان هالشي تافه في عين غيركم..المهم عايبنكم

• دايما في شخص تحس انه سوالف و فنان سواء كان في الدوام او في المنتدى او وين ما يكوون ..خذ الخطوه الاولى و اعزمه على كوفي و الا اي شي و شووفه برع بيئة العمل يمكن يكون هالانسان في المستقبل من اعز اصدقائك

• اذا مب مشارك في جيم رياضي..سير شارك باجر..اذا مشارك باجر ازقر الترينر و خله يعلمك حركات رياضيه يديده..و نفس الشي بالنسبه للبنات …و اقل شي لو تبتدون تمشووون في الفريج اذا كنتو مووول ما تتحركون

• خذ من وقتك يوميا على الاقل نص ساعه عشان تيلس مع الاطفال..شوف الحياه من منظورهم البرئ و خلهم يسولفووون عليك ..ترا هالشي وايد يريح البال

و الصراحه تعبت و انا اقرا و اترجم و ارد اكتب بصياغتي …و تريو الجزء الثاني من الموضوع اذا عيبكم هذا الجزء

و قولولي الحمدلله على السلامه انا اليوم طايحه مرتين..مره زلقه اكروباتيه عجيبه على الدري..و المره الثانيه شقلبه بهلوانيه من فوق الشبريه الى الارض السيراميكيه ههههههههههههاي ماعرف شو سالفتي اليوم الميزانيه متخلخله لوووول