ما ادري انا احلم والا لا…..؟؟!!!؟؟
تخيلوا البارحه الساعه 9 في الليل ولد اختي كان واقف حذال بيت ربيعه…
ويتكلم بالتيلفون …. وشوي تحاوطوا عليه 3 نياسين ونزلوا تقريبا فوق العشرة
وعندهم شواطير وسجاجين وقبوب وتخيلوا هجموا عليه لا بارك الله فيهم
وقطعوه من الطعنات وهو وحليه يقاومهم…
طعنات بظهره وايده وريله ولا وعقبها شايتينه ومرفسينه
وكاسرين حوضه ….
حسبي الله عليهم فوق العشرة …
تهجمون على ياهل عمره 16 سنه
وعقبها شردوا …
وطاف ريال وشافه غرقان بدمه ودق الباب عليهم
تراكضوا ربعه واخوانه …
قالوا اصلا هو ما كمل 10 دقايق واقف برع
شو هالحيوانات شو هالغجر…
وين نحن عايشين..؟؟؟
وتعرفون وين صارت هالسالفه البارحه في القراين بالشارجه
وهالمرغده اونهم مسوين عصابه واي احد يشوفونه وما يعرفونه بس جذه
يضربونه…
نحن قلنا يمكن صاير شيء… صايره مشكله معاهم…؟؟ عداوه..؟؟
وولد اختي ما يعرفهم وتوهم منتقلين من ابوظبي وسكنوا بالشارجه
وما يعرفون احد وعلاقاتهم محدوده مع شباب الفريج….
وتخيلوا كيف حال اختي وزوجها وكيف حالنا نحن….؟؟؟؟!!!!
شو هالاجرام؟؟؟ ولكن الحمدلله عرفناهم من شباب الفريج
والتحريات عرفوهم… وقالوا زعيمهم اسمه حمود …
عنده سوابق… والعام بعد نفس الشيء معتدين على كمن واحد…
ولكنه طلع …. لان عنده واسطه…وتعرفون شو مسمي عمره؟؟؟
حمود ابليس…
حسبي الله عليه اسمه على اسم اشرف خلق العالمين
ورابطه بابليس….
ونحن نقول اليهود يسون هالسويات لان قلوبهم ما فيها رحمه…
لكن هاذيل …شو جنسهم؟؟
ووين اهلهم …وكيف مربينهم؟؟؟
……
هم شردوا صوب عيمان …
ولين الحين ما زخوهم..؟؟
ولكن لو شو صار محد راح يتنازل
والكل متحلف لهم؟؟؟
وتخيلوا اليوم متصل واحد منهم..
لولد اخوي الكبير… ويعتذر منه ويقول له اونه ما كنا نعرف انه من اهلكم
؟؟؟؟
تخيلوا اونه يعتذر؟؟؟ عقب ما بغوا يجتلونه ولااااا يتعذر بس لان هذا الولد يقرب لنا…؟؟!!!
يعني لو واحد ثاني ..جان الوضع كان عادي؟؟؟
لكن لو يموتون ما راح نتنازل عن القضية
لو يموتون ما راح نبرد ولا قلوبنا بتبرد
ولو كان ولد منووه؟؟
فوق العشرة على ياهل … فوق العشره على واحد
وين المريله ؟؟ وليش شاردين اذا هم مسوين عمرهم زعامه؟؟؟
ولو تشوفون ولد اختي قلبكم بيتقطع عليه…
ربي يعافيه ويقومه بالسلامه…
بعدني مب قادره اتخيل !!!!
حسبي الله ونعم الوكيل
حسبي الله ونعم الوكيل
حسبي الله ونعم الوكيل
تحذروا تحذروا من هالحيوانات …بلادنا مب امان مثل قبل…
لا حول ولا قوة الا بالله
اختكم
سهمي عالي
لا حول ولا قوة الا بالله العلي العظيم
اشوف هالسوالف تزيد في الشارجة شو السالفة
كنت اقول يمكن اللي سمعته قبل اسبوعين من جماعة في ام خنور قلت اكيد بسبب العداوة
لا للاسف الشديد ـــ اشوف الظاهرة منتشرة كل مكان ـــ اللي سمعته قالو و على حسب اقوالهم اللي ما شايف فلسطين والمجزرة اليومية هناك لو كنتوا موجودين في ام خنور كنتوا تشوفون الوضع المؤسف
يقولك مجموعة من الشباب يالسين عند المدرسة صدفة سمعنا حشرة وويلات السيارة وسوالف و اصوات غير المعتادة
طلعنا برع نشوف لا والله اكثر من 4 سيارات من نوع الفور ويل ويدعمون شباب و سياراتهم
ونزلوا من سياييرهم وقاموا يضربون الشباب اللي كانوا يالسين عند المدرسة بسكاكين وسيوف والدم كان يجري عند المدرسة مثل اللي شفنا في اخبار عن الفلسطين والعراق
وين وصلنا نحن
شو هالتخلف
صراحة عن خاطري الشيخ سيف بن زايد يدري عن هالمواضيع التعبانة بين الشباب حتى يؤدبهم اخر ادب
وعقب جماعة الفريج قاموا يتصلون بالشرطة ويطرشون اسعاف والبلدية ياية ويغسلون الدماء اللي عند المدرسة بالماي
والتحريات يدورون والشرطة متواجدين لكن بعد شوه لما هربوا كلهم
حتى لو ما هربوا المفروض كانوا يطرشون من الطواري القوات الخاصة وفض الشغب مب التحريات والشرطة
للاسف خاطري هالنوع من الشباب والطايشين امثالهم يتعاقبون اخر عقوبة
ويطرشونهم السعودية عشان يؤدبونهم مب يقولون عندهم واسطات وخلاص ــ النفس بالنفس والعين بالعين ـ اقتداء بالآية الكريمة
المفرروض يخيسون في السجن للابد والقانون ما يتراجع عن الحكم مب كل رمضان شرات هالنوع يفرجون عنهم
لانهم بيردون لماضيهم ويزهقون ارواح الناس
والله يقوم ولد اختج بالسلامة يارب
شو ذنبه المسكين
الله يعينكم يارب
لا حول ولا قوة الا بالله العلي العظيم
يا ليت الي يتابعنا من نشره علوم الدار يتخذ اللازم ويركب السياره وعلى طول صوب المنطقه ليكون قدوه للجميع…
لانه الي مستوي وقاحه ومهزله
لا حول و لا قوة الا بالله هالامور وايد زادت ..قبل فتره بعد متضاربين بالسيوف في الشارجه << يتحرون غزوه و الا شي مادريبهم …و شرات ما قالو الاخوان ماشي عقوبات رادعه لهالناس..يدشون السجن كمن شهر و يردون اشد و العن
الله يشفي ولد اختج و يعافيه و لا تنسين تطمنينا عليه
نعم ياللغرابة من هذي السالفه !!!!!!!!!!!!!!!!!!!!
ولكن نعم هناك وللأسف الشديد عصابات اونه يقولون رجال ولكن هم ليس عندهم ذرة مرجلة ؟
والمشكلة اللى حاصلة الان هو عدم ردع الردع الكافي لها القذرة من البشر للأسف !
بدون زعل القوانيين عندنا للأسف تختلف امارة عن امارة وياما وياما وياما نشاهد جرايم الطعن والضرب باإدوات التى مسموح عندنا وتجدة في اسواقنا وبلاخص السوق الصينى ! كيف نبغي انعيش في امان مادام هناك إدوات من السكاكين والصناكل وغيرمن الادوات الضرابة متوفر عندنا وينباع عينى عينك !!!
الله المستعان على مايصفون ،،،،،،،،،،،
نعم اختى الكريمة (سهمي عالي )
الله يشفي أبن أختكي يارب ويقومة بسلام يارب
ولكن اعتقد هناك موضوع بين ابن اختي وبين هل قذرة من البشر ؟ او ممكن أن يكون ضحية يعنى كبش فداء !!!!!!!! وهم يقصدون أحد غير ،،،،،
همسة : يتفربك او يتزيف الموضوع عندما يصل إلى ،،،،،،،،،، والفطين يفهم ،،،،،،
ولا حول ولا قوة إلا باالله
المشكله مافي عقوبات رادعه في الدوله
اخر شي بيحكم القاضي سجن ست شهور وبيخففها لشهرين..ويمكن اييهم عفو اذا لحقو ع رمضان…عارفينها الشغله
من غير الواسطات حدث ولا حرج