—
شحالكم ياعرب الله وعلومكم اغلبية الموجودين هنا في المنتدي إلي يبحث بين مواضيع
ولي مب عارف كيف يبدي وشو ايجابيات الخطوه الأولي وسالبياتها
وصدقوني كل شخص وله ميزه في التجاره ودخول عالم الأموال ولكن تنقصه الدفعه
او الفكره او المعنويه
فعشان جذي حبيت اليوم اطرح هذا الموضوع ونشاءلله بنتشارك في الحلوه والمره
انا اشتغل في تجاره الأستيراد وتصدير ودخلت في مجالات كثيره بين موانئ الدوله
وخارجها وعارف انواع البضاعات المستورده والمحلية وتقليد من الأصلي
—
اليوم إلي عنده مشروع ومب عارف شو يسوي انا بساعده وباخذ بإيده
وثاني شي الي عنده راس مال ومب عارف يدخل في شوه انشاءلله بعد راح اساعده
ومابقصر ولي حاب يدخل مع شخص شريك بعد انشاءلله ماراح اقصر
واي شخص حاب ياخذ معلومه عن سلعه او عن بضاعه او شركة خارج الدوله
يبغي التعامل معها انشاءلله ماراح اقصر معاه
تقبلو تحيات اخوكم
بن دولار
مطاعم ياخوي تعتمد علي مكان الي بتفتح فيه
إذا في دبي لازم فكرة مطعم مب موجوده واذا تبغي الفكره انا حاضر
اما اذا كنت من سكان اهل بوظبي والعين فالمطعم لازم يكون اكله
فيه نوع من بساطه ولذة مذاق مايعتمد علي فكره يعتمد علي طباخ
اما اذا كنت من باقي الاماراة الشمالية فالمطاعم الشعبية علي مطاعم خدمات
الأفراح يمشي سوقها
وحط في بالك اكثر مشاريع الي تخدم المستهلك وارباحها غير متوقعه المطاعم
توجه للعقارات ومحافظ العقارية عندك محافظ معروفه هب محافظ المغشوشه
ولاتعب راسك وفك عمرك من صدعه وينزل لك راتب شهري مايقل عن 10 الف ومع شهور
تزيد نسبتك وتوصل 20 الف وهكذا لين ماتحصل نسبه الي تبغيها
اما اذا انت ريال تبغي تكون لك اساس غير مجال العقارات
حاول تسوي دوامة مشاريع وهذا انسب اختيار اشوفه لنفس راس مالك
وهذي مشاريع عباره عن تقسيم مبلغك
مثال 200 الف مغسلة سيارات 100 الف مغسلة ملابس 100 الف كراج سيارات
وهكذا دور شو محتاجة منطقتك وانت ادري بمنطقتك واذا
مالقيت وتبغي تفتح برع منطقة في مناطق ثانية من دولة انا في خدمتك
ونشاءلله افدتك
اخوكم
بن دولار
هلا اخوي ونشاءلله اقدر افيدك
بخصوص العملات وارباحها ومخاطرها ووقتها الحالي
ارباحها
في الوقت الحالي ياخوي متاجره في العملات هو الأول وجاذب كبار التجار
والكل ترك الأسهم وتوجه نحو العملات للربح السريع ولسقوط الدولار تجاه العملات ورتفاع
اليورو والين وتزعزع السوق معروف في اي تجاره من يطيح الجمل تكثر سكاكينه وهذي الي حاصل
طاح الدولار والكل يحاول يستفيد من طيحته
مخاطرها
العملات مخاطرها اكثر من ارباحها امكن تكسب 100 الف وتخسر 200 الف
العملات معتمده علي الأشاعات ومربوطه بسياسه بدرجة اولي خبر واحد
يرفع السوق وخبر ثاني ينزل السوق
وقتها الحالي
انسب وقت لتداولها مع سقوط الدولار ومع سقوط بنك الأمريكي
ولكـــــــن
انتبه ثم انتبه امكن يكون طعم للتجار الصغار عشان تكون اكلة الملك كبيرة
ودايم حط في بالك الربح السريع ايب معاه الخساره السريعه
نصيحه لك
ادخل بأخف مبلغ موجود عندك
اذا كان راس مالك 200 الف ادخل بـــ 50 الف
اذا كان راس مالك 100 الف ادخل بـــ 30 الف
وهكذا ونشاءلله اكون افدتك ولايغرك الكلام ولايغرك السوق
خلك حذر وكون ذيب وسط الذيابه
قبل شهر تقريباً معروض مغسلة للبيع وكان سعرها 170 ألأف في عجمان
وكان لها ثلاث مواقف للسيارات للغسيل مع مكتب وغرفة استقبال وغرفتين غرفه مستودع وغرفة
زينة للسيارات وعدد العمال 6 ومدخولها كان 7000 درهم في الشهر
———
انا حطيت لك اسعار السوق الموجوده
اما بنسبه لك ياخوي حاول تشتري مغسلة جاهزه بمعداتها وعمالها
لتبدي مشروعك اما مشروع مغسلة من الصفر فبيطلب عليك راس مال
كبير شوي وهو مايقل عن 300 الف لتأسيس ومن غير الأجار
نصيحة لك ياخوي افتح مغسلة يادويه اذا راس مالك صغير
وهذي مغسلة للناس المستعيله ولي تبغي تغسل بسرعه
تكلف 100 الف مع العمال والاجار بيكون بسيط لواقع انك ماخذ مكان واحد
وحاول تفتحها بعيد عن صناعية في مكان فاضي ويكون قريب من سوق
ونشاءلله قدرت افيدك
اخوكم
بن دولار
بارك الله فيك على هذا الموضوع
وفي بالي مشروع أريد رأيك فيه.. بغيت أفتح مطعم سياحي راقي يقدم أكلاتنا الشعبية.. كم بيكلفني المشروع حسب توقعك؟
وايش الاشياء اللي احتاجها لتجهيز المطعم