حبيت اشاركم في اللي صار مع ولد عمي …
عنده مؤسسه في دبي شغاله من سنه ونص تقريبا ومؤسسه ثانيه….المهم سمعنا من بعض الناس ان اذا المؤسسه قائمه وباسم مواطن ممكن اتسجل للحصول على عضويه , والعضويه اتساعد في الحصول على مميزات كونك “مواطن” . قال الحمدلله…اخيرا بنحصل على امتيازات كتجار …
راح وقابل المسؤوله بعد موعد طبعا وفهمته على كل شي…وقالتله ييب الاوراق المطلوبه وما في مشكله ان شاءالله…المهم الريال جهز الاوراق المطلوبه…وعطى المندوب ووداهن وقالوا كل الاوراق تمام زان شاءالله وبتنعرض عاللجنه…
بعد حول اسبوعين انا كنت مع ولد عمي واتصلوا به…قالت له البنت طلبك للعضويه انرفض …اتفاجأ …(بطل عيونه)..وقال شو الاسباب …تدرون شو قالت الاسباب….
الكمبيوتر رفض الطلب لان كمبيوتراتنا موصله بجميع الاجهزه المعنيه
المهم الريال اختبص قال يمكن في شي صاير عالمؤسسه…وطرش المندوب لكل الجهات يشوف اذا في شكوه ولا حاجه ,,,وشهر كامل وهو يحوس …مااااااااااااااا في اي شي…
المندوب سار لهم وقالوله احنا اندخل الطلبات والكمبيوتر يعطينا الرد..(اكيد حد فيكم يضحك لكن والله هذا اللي صار وياه)
الحين صار الكمبيوتر يتحكم في طلباتنا…لا حول ولا قوة الا بالله
في احد الاخوان راسلني على الخاص يسأل عن كيفية الاشتراك و الحصول على العضوية .. للاسف حاولت ارد عليه و لكن حسابه لا يقبل استلام الرسائل الخاصة .. ان شاء الله يقرا الرد هنيه:
طال عمرك انا ناوي اقدم على مشروع دعم الشباب
عندي فكرة مشروع ومسوي دراسة
بس مب عارف كيف ابدا وشو لازم اراويهم واخبرهم وبشكل عام كيف اقدر اقنعهم
واذا شي عندك نماذج للاشيا الي ممكن اراويهم اياها
اذا تفيدني بتكون سويت خير الغالي
ومشكور مقدما
اول شي لازم يكون عندك شي مكتوب … كل الي عليك تسويه انك تتصل فيهم و بشكل تلقائي بيكون في موعد تتلاقى مع حد منهم عشان تشرح لهم الي في بالك و المرحلة الي انت فيها ( يعني شركة جاهزة ولا مجرد فكرة حالياً ولا شو) حاول تكون مقنع في كلامك .. و اذا عندك صور .. او شارتات .. او دراسة خفيفة بيكون شي ممتاز يبين انك مهتم و جاد في الموضوع .. مب مجرد فكرة عابرة و سايرلهم على طول. أهم شي تكون الفكرة واضحة بالنسبة لك و عندك شي تراويهم .. مثل احصائيات و شارتات اذا ممكن … يعتمد على الفكرة يعني .. ثانياً لازم تعرف انت شو تبا منهم بالضبط؟ تبا تمويل؟ ولا تبا الاشتراك في برنامج المشتريات الحكومية؟ ولا تبا بس مكتب للايجار؟
بعدين بيعطونك ملف فيه تفاصيل الاشتراك .. لازم تروح تكتب شي اسمه business proposal يعني مثل تفاصيل الفكرة .. شو هي .. كيف بتسوي فلوس .. شو الي تحتاجه .. عدد العاملين .. التكاليف .. العائد المادي المتوقع ..الخ من هذه الامور هم بيشرحونها لك .. و بعد ما تعطيهم هالتفاصيل هم بيدرسون الموضوع و بيردون عليك خبر بعد فترة.
قبل ما تختم اللقاء قولهم ان تبغي الموضوع يمشي .. و مستعد تعدل كل الاوضاع الي ممكن توقف عقبة في طريق المشروع .. و اذا لا قدر الله حصل رفض .. قولهم شو الاسباب عشان تعدلها .. و ان شاء الله ما يصير الا كل خير
بالتوفيق
بالعكس مش شرط انه ايكون جوازك صادر من اماره دبي حتى تقدر اتقدم على العضويه وهذا الكلام مش صحيح وغلط 100%100 وانا والعياذ بالله من كلمه انا احد الاشخاص اللي استفدت من العضويه ومن غير اي واسطه او اي فالن وعلان …الثقة والعزم هم مفتاح الوصول. والسموحه