ساعدو ربيعتي قبل لا تنجلط

السلام عليكم و الرحمه

مساكم الله بالنووور و السرووور

خلوني اخبركم ما حدث اليوم

كنا متيمعين انا و ربيعاتي كالعاده ..و دق تلفون وحده ..شلته و يلست تسولف و الا شوي اشوفها بققت عيونها و تصارخ

ربيعتها كانت متصله و قالتلها يا فلانه ترا شفت صورتج في فيديو يتداولونه الشباب عبر البلوتوث !!

البنت وحليلها مؤدبه و ما عندها سوالف و حركات..قلنا يمكن مب انتي خلها تطرشه ..ما قدرت تطرشه بالام ام اس ..فاتصلنا فيديو كول و خليناها تشغل الفيديو…و الفيديو و العياذ بالله جميع انواع البنات المنحطات ..و بينهم صور بنات مواطنات بشيلهم و عبيهم …من ضمنهم صورة ربيعتنا و شكلها الصوره جديمه من ايام الكليه ..و هي بشيلتها و عباتها و بدون مكياج حتى ..شكلها الصوره من صور الكليه و ما اعرف كيف الجلب اللي سوى الفيديو وصللها

عشان اوضحلكم نوعية الصور يكفي ان اول صوره في الفيديو وحده تشرب خمر..الله يعزكم و صور بنات بلبس فاضح و شرات ما قلت مدسوسه بينهم صور بنات عاديات ..للاسف من ضمنهم ربيعتنا

طبعا ربيعتنا انصدمت صدمت حياتها و جلبت اليلسه صياح و مناحه و تصيح تقول منوو بياخذني و سمعتي اختربت و راح مستقبلي

انا توني راده البيت و ربيعتي غامضتني وايد …مب حرام واحد حيوان شرات هذا يسوي فيديو بس عشان يحشيه و يترسه صور ييلس ايمع صور بنات ناس و يحطهم

ما اقول غير حسبي الله و نعم الوكيل فيه و الدنيا دواره اليوم يلعب باعراض بنات الناس باجر بيشوف شو بييه..هو و غيره من الشباب اللي يتداولون هالامور

تتوقعون تخبر هلها؟؟ و الا تسكت و تاكل تبن

انا اقول شو فايدة البلبله الا زيادة الفضيحه

انا وايد معصبه ما اقدر حتى اعبر في الموضوع ..بتصل حق ربيعتي اتطمن عليها لا اييها انهيار عصبي و الا تنجلط

ابا اشوف رايكم في الموضوع