السلام عليكم ورحمة الله وبركاته
كثير من الناس رواتبهم 20 الف درهم وهذا حالهم تعالوا نتعاون ولكن خل نشوف شو اللى صاير قبل .
اخوانى معوقات السكن كثيره وهى كالتالى :
1- انتظار برنامج الشيخ زايد للاسكان لسنوات طويله
2- ال 500 الف درهم ما عادت تبنى نص بيت
3- الاراضى .. تطلع روحك لحد ما تحصل الارض اللى بتبنى عليها
4- المقاول وما ادراك ما المقاول … ( يكرهك البيت وينشف ريقك ويشفط فلوسك ويعذبك ويمكن يخلص البيت فى موعده )
5- البنك .. ( هيه يا زمن .. يعرف انك محتاج له علشان جي ما يرحمك تاخذ من عندهم 300 الف علشان تسوي البيت وتدفعها 600 الف .. اخ يا القهر الحاجه ذبحتنا )
6- تأثيث البيت .. ( اذا البيت فيه 4 غرف تراك بتاثث غرفتين بالكثير والصاله والباقى لين الله يفرجها عليك لانه فى النهايه ما عندك فلس احمر تمشى فيه حالك )
خلصنا من مشاكل السكن ؟ ما اعتقد لانه اللى سبق ذكره تترتب عليه سلبيات كثيره لا تعد ولا تحصى للمواطن الفقير اللى فكر يستقر ويا عياله ويأمن لهم بيت يحتضنهم
1- كثرة الديون ( اذا راتبك 20 الف بيبقى منه 10 الآف )
2- عدم الاحساس بالسعاده بالبيت الجديد لانه صار هم عليك لانك تعذبت قبل لا تحصله سنوات وبعد ما تحصل بتتعذب ضعفهم من كثرة الديون
3- هبوط المستوى المعيشى لك ولأهلك ( يا حرمة اسمعى تراه راتبج الشهرى 1500 لج ولعيالج ماشى غيرهم ولا تدلعين اصبرى واتحملى )
4- مشتريات التزامات البيت من اكل وشرب لا تقل عن 1500 درهم شهريا
5- سيارتك مديل 1999 وكل يوم طايحه بالكراج ومن خساره لخساره لانك مش قادر تشترى سيارة يديده .
6- فواتير الكهرباء والماء والتيلفون والغاز والشغاله( لا تقل عن 2500)
7- ابوك وامك اللى ربوك وتعبوا فى تربيتكم ما تقدر تفرحهم ( آه يا القهر ) تعطيهم الف رهم شهريا مناصفه .
8- برنامج زايد للاسكان يخصم من راتبك 1660
9- مصاريف متفرقة ( لبسك .. عطرك .. بترول سيارتك .. عشاك مع ربعك .. الخ ) 2000 درهم
10- تضطر فى كثير من الاشهر انك تروح للبنك تكشف حسابك لاشياء خارجة عن ارادتك ومفأجاه وتبدا مشاكلك مع البنك .
شباب اكمل والا بس لحد اهنيه ؟
وايد اشياء ما ذكرتها لخصوصيتها بس بكل امانه بيت الاحلام صار هم وغم وصار ضد الاستقرار الاسرى بالرغم من انه الهدف الاول للحكومة الكريمه .
الله يرحم ابونا الشيخ زايد رحمة الله عليه … كلمته ترن فى اذنى ( زايد ما يباه حقه .. زايد يبا لهذا الشعب التعبان ) يا الله يا زايد نتعذب يوميا من فراقك الله يرحمك ويسكنك جنات النعيم .. وانعم الاب وانعم القائد .
ملاحظة : لو نكتب اهنيه من اليوم لبعد 10 سنوات ما راح يحسون فينا الشيوخ لانه اللى تحتهم يوصلون الفكره غلط عن المواطن الله لا يبارك فيهم .
ملاحظة : تعالوا نجتمع ونتصل فى برنامج البث المباشر ونثير هذة الطامة الكبرى لحكومتنا الرشيده وصدقونى شيوخنا فيهم خير ومحد بيقصر ويانا بس يبا همه من الشباب وعدم التخاذل وخاصه بالاعذار اللى ما تودى ولا اتييب .
يعل عمرج طويل
يزاك الله الف خير يا خويه
شيخى فيه ناس فى افريقيا ماعندهم اكل وعايشين !! يا خويه منو قال انه الحياه كلها بالمال ؟ ( ولو انه اغلبها بالمال ) شيخي احنا نتكلم عن مشكلة الاسكان اللى يعاني منها وايد من شباب الامارات
تقولى لا تنظر للموضوع من منظور ضيق ابي الله يسلمك تفسر كلامك كيف يعنى ؟ اذا المشكله كبير كيف انظرلها ؟ اصغرها فى نظرى قصدك ؟ والا كيف ؟
وتقولى انظر الى المشكله اللى تعانى منها نفسك !!! يا خويه منو قالك انى داخل على طبيب نفسى او مصلح اجتماعى علشان تقول هالرمسه !!! امرك غريب
اخويه انت شكلك هامور ومش حاس بغيرك اسمحلى .
البنات اخوتنا وما لنا بد منهم ولكن انا ما عممت يا اخواتى .. عموما اختى كلامج فيه شى زين وشى مب زين .. ( ترانى صريح واتحملينى )
الزين انى احاول ازيد دخلى بالتجاره ( جربت ) ولكن ما اتوفقت يمكن العيب فينى ولكن هذا اللى صار واذا بفكر انى اسوي شى فى الوقت الحالى فما اقدر لانه ورايه المصيبه الكبيره ( البيت ) من وين بييب له فلوس اذا انا بسوى مشروع !!
اللى مب زين .. تبينى اصبر لحد ما يكبرون عيالى ويساعدونى وانا ما عندى بيت ؟ وانا فى دولة الامارات ؟ دولة زايد؟ شو بيكون حال عيالى لين يكبرون ويشتغلون ؟ ووين بيسكنوون ؟ وايد سلبيات
يزاج الله خير على النصايح والامثله .
شيخى انت نسيت منو ابونا ؟ زايد رحمة الله عليه بالعكس زايد علمنا نمد ايدنا للفقير والمحتاج وهذا مش غلط لانه دينا الحنيف يحث على هالشى ويزاهم الله الف خير الشيوخ عنهم يساعدون الدول المحتاجه وهذا فخر لنا كشعب ولكن خلنا ناخذها بشكل ثانى واجاب على سؤالك ليش ما يبنون مساكن للمواطنين ؟
شيوخنا مب مقصرين ويا شعبهم ولكن فى اعتقادى انه الشيوخ ( حسب ما يوصلهم من كلام اللى تحتهم ) يفتركون انه مشكلة الاسكان انحلت فهمت قصدى ؟ وان شاء الله بعزيمة الشباب اللى مثلك وشرواك بنوصل صوتنا لشيوخنا الكرام .