السلام عليكم ورحمة الله وبركاته
حبيت استفسر عن تجارة سمعت بها بس ما عندي خلفية واضحة فيها وهي “تجارة الوره “. ان شاءلله اكون كاتبتها صح
اللي اعرفه ان في ناس شروا شاحنات واللي شرا سيكس ويل ب 280 الف او اكثرو أجرها ع شركات المقاولات وتدخل عليه ماشاءلله تقريبا 70 الف في خلال 6 اشهر.بس انا شخصيا مب مـتأكدة من هالكلام اذا صدق مردودها قوي ولا الناس تبالغ؟؟؟؟؟؟ انتوا شو تشوفون؟؟
وسمعت ان لهالتجارة مخاطروعادي ايطيح السيكسويل في جبدي وما تتأجر على شركة لان الوره لها مواسم .بس معظم اللي سألتهم ينصحوني بأني أاجرها على شركات المقاولات اللي في دبي لانهم محتايين للسيكسويلات على طول السنة يعني اخلص من تأجيرها من شركة الا تاخذها شركة ثانية واتدخل عليك في السنة ارباح.وانا في خاطري اوكل لي شخص يفهم في الشاحنات و يشتري لي هالسيكسويل ويأجره ع شركات وله عمولة مني لاني انا مالي في هالمواضيع وهالتجارة بعيدة عن ميولي
فانتوا شو رايكم بهالتجارة ؟ تنفع ولا ما وراها غير وجع الراس
وابا خلفية عن الموضوع اكثر لاني كل اللي عندي قلته وما اعرف عنها شي ثاني ، اخاف اشتري السيكسويل وايلس من عقبها ع الحديدة واتوهق
بس اناا اعرف انكم ما بتقصرون وياي
وعليكم السلام ورحمة الله وبركاته
هذه الجملة فيها الجواب … اذا مالج ميول و مالج خبرة انصحج بالابتعاد عن الموضوع … اذا مالج خبرة و لج ميول قوي ..ممكن تسألين و تستفسرين و تتأكدين .. لكن بدون ارادة قوية و رغبة حقيقية في النجاح في هذا المشروع .. فالنتيجة في الغالب هي الفشل .. حالها حال اي تجارة ثانية .. اذا مالج رغبة و ميول و خبرة .. بتضيعين
بلتوفيق
88 مشاهدة وبس ردين
ليش ؟؟؟؟؟؟؟؟؟؟؟؟؟؟؟؟؟ معقولة الموضوع يديد عليكم
الله يخليكم لا تبخلون علي بمشاركاتكم
اخوي نايف ما قصرت ويزاك الله الف الف خير وحبيت استفسر منك اكثر عن الوره بس دامك من البحرين اظن ما بلقى اجوبه لاسئلتي عندك
اخوي uaefalcon الله يعطيك الف عافية عالشرح المفصل
كنت اتحرى ان علي انا شخصيا اني اسير لشركة المقاولات عسب أأجره عليهم بس اللي فهمته من كلامك ان ادارة المرور هي الي تتولى مسؤولية تأجيره ..بس انت متأكد ان السالفة اتطول جي لدرجة اني اتريا 5 سنين عسب يردون علي المرور ؟معقوول
و بغيت اعرف اخوي شو تقصد ان ” مدة ادخال السيارة للشركة يمكن اكثر وعلى حسب الواسطة في المرور”؟ اصلا شو خص المرور والواسطة بالموضوع اذا الشيك بيكون صادر من الشركة اللي بأجر عليها والمرور مالها خص؟
وبعدين المرور يدخلون السيارة في الايجار فقط لمدة 6 اشهر عقب ايردونها لي ؟ عيل شو اذا كنت حابة أأجرها طول السنة يعني اخلص 6 اشهر ورة ادخلها في ورة ثانية ؟ عادي ولا مب مسموح عند المرور؟
وشو بالنسبة للتأمين لو سووت الشركة حادث بالسيارة مب هم المسؤولين عن تصليحها ؟ يعني معقوولة يسوون هم فيها حادث وانا ايلس اصلحها بحسابي ؟ مب منطقي هالشي اكيد في شروط متعارف عليها في الوره
اسمحلي اخوووي uaefalcon عالاسئلة بس والله ما سألتك الا لانه مبين عليك ماشالله فاهم ولك خبرة في هالموضوع
واتمنى اي حد يعرف في الوره وعنده خلفية ما يبخل علي و يفيدني برايه او بتجاربه او نصايحه لي
والسموووووووحة
السلام عليكم
بخصوص الورا فلازم اول شيء تسجل اسمك في ادارة المرور وتنتظر مش اقل من 5 سنوات تقريبا علشان يتصلون فيك وقولون لك ييب السيارة وفي هالحالة عندك مدة اسبوعين او ثلاثة لازم توفر السيارة , وبعدها تقوم ادارة المرور بتشغيلها داخل شركة معينة لمدة 6 شهور كل شهر تقريبا 20-25 الف درهم على حسب طول وحجم السيارة 32 او 34 او 36 متر مربع وكل شهر تروح ادارة المرور لاستلام شيك واحيانا بعض الشركات تتاخر في الدفع فلازم تنتظر يمكن للشهر الي بعدة.وبصراحة مدة ادخال السيارة للشركة يمكن اكثر وعلى حسب الواسطة في المرور.
اما عملية التاجير على الشركات بصفة شخصية فها احتمالات عدة يمكن خسارة ويمكن ربح على حسب السائق يمكن يتعرض لحادث وبالتالي الشركة ما تدفع لحتى ما تصلح السيارة والسيارة تصليحا مكلف .
مرحبااا
انا اخبر هالموضوع سمعت عنه من فتره واعرف واحد يشتغل فيه لكن عندنا في البحرين وهو صحيح مثل ماقلتي يدخل ارباح بطريقة تاجيره على الشركات
بس بعد ترى له مخاطر لان في ناس خذوا سكسويلات ومالقوا احد يتاجرهم وتوهقوا فيهم بس عموما على اللي اعرفه ان الطلب عليهم زايد
لكن يبي لج احد عنده خبره في هالموضوع ويتعامل مع هالشركات واشتغل في هالموضوع من قبل عشان ياجر لج السكس ويل وماتتوهقين فيه
المهم الفكره عموما حلوه وماشي شغلها وربحها زين بس قبل لاتشترين لازم تسالين عن الشركات اللي تتاجره وتشوفين شنو يبون بالضبط او مثل ماعرضتي ان احد يشوف لج بس نصيحه لاتتسرعين اول شي القي لج احد يتأجره او يدليج وين تاجرينه وبعدين اشتريه
وبالتوفيق ان شالله