كل عام وانتو بخير
وعساكم بإذن الله من الفايزين العايدين
لاهنتوا يا اخوان عندي مؤسسة مقاولات ونقليات عامة وفي مهندس مصري عرض علي انه يدخل شريك في هالمؤسسة ويتسجل اسمه في الاواراق الرسمية طبعا بحكم خبرته في هالمجال الاخ ناوي انه ييبني شركة لها سمعتها ومكانتها فرفض موضوع النسب وموضوع الراتب وقال ابي شراكة لاني بدخل بمالي ومجهودي
واللي ابي استفسر عنه
اولا هل يقدر هذا الشخص انه يدخل كشريك رسمي في الرخصة اللي نشاطها نقليات عامة ومقاولات مع العلم انه وافد واقامته على شركة ثانية في نفس المجال تقريبا(يعني يصير شريك واقامته على غيري) ما ادري اذا هالشي مسموح والا ضد القوانين
ثانيا هل في طريقة ثانية غير شراكة المؤسسة نفسها يقدر من خلاله يضمن حقوقه كشريك وبنفس الوقت انا اضمن انه المؤسسة مايكون فيها تلاعب (اقصد عقد عند محامي ويتوقع من كاتب العدل مثلا )
ثالثا لو صار ودخل معي كشريك براس المال وانكتب اسمه في الرخصه مع اسمي يقدر في هالحاله يتصرف بكل شي دون الرجوع الي (كصرف شيكات وتوقيع عقود وغيره من الامور الادارية والماليه ) ؟؟
رابعا وهو المهم لو صار شريك رسمي معي في الشركة وعطيته الخيط والمخيط واخذ قروض على الشركة وفجأه راح ديرته ولاعاد شفته هل في هالحالة اكون انا المسؤول عن قروضه ؟؟
خامسا لو الشراكة ممكنه في حالة هالشخص شو الاوراق الرسمية المطلوبة منه ومني انا وهل يتوجب فتح حساب للشركة ويكون فيه رصيد ؟ وكم الرصيد المطلوب دخوله للحساب لفتح الشراكه ؟؟
ادري اسألتي وايد بس شسوي مالنا غير الله ثم انتم يالقروم
والسموحه
على فكره يالطيب
انته لو دخلته شريك وفشل في ادارة الشركه يقدر يطالب ببيع الشركه وياخذ نصيبه مع انه ما دفع شي ، انتبه
السلام عليكم
ج1 – لا يجوز انه الشخص يكون على كفالة شركه ويكون شريك في شركه ثانيه + نشاط النقليات مقتصر على الاماراتيين فقط على حد علمي إلا اذا تغيرت الامور مؤخرا وتقدر تتأكد من الجهات المختصه
ج 2 – الطريقه الوحيده انه يكون شريك بشكل قانوني عشان يتحمل معاك المسؤوليه الناتجه عن اي تصرف تقدم عليه الشركه وينتج عنه ديون او ضرر للاخرين
ج 3 – ممكن تدخل معاه في شركه ذات مسؤوليه محدوده ويصير بينكم عقد شراكه مصدق عند كاتب العدل وينكتب في عقد الشراكه من هو المدير وشو صلاحياته
ج 4 – من ناحيه ثانيه اذا ترتبت على المؤسسه اي ديون انته تتحمل منها ما يعادل نصيبك في رأس المال ( شركات المسؤوليه المحدوده فقط ) يعني لو رأس المال 150 الف وهذا اقل مبلغ في شركات المسؤوليه المحدوده وكنتوا شركاء بالنص انته تتحمل 75 الف درهم فقط مهما بلغت ديون الشركه و هو يتحمل المسؤوليه عن قراراته.
ج 5 – بالنسبه للأوراق المطلوبه يفضل انك تستفسر من من الجهه المختصه لان مثل هالامور تتغير بستمرار ولكن اذا كانت الشراكه ذات مسؤوليه محدوده لازم تفتح حساب في البنك وتحط فيه رأس مال الشركه والذي لا يجب ان يقل عن 150 الف درهم وتثبت ايداع المبلغ كاملا عند استخراج الترخيص + عقد شراكه مصدق من كاتب العدل .
احب اوجهه نصيحه لجميع الاخوه الاعضاء مفادها انه ليس كل شخص عنده شهاده او اشتغل في مجال معين قادر انه يدير عمل تجاري . تخيلوا معاي يا اخوان كم عدد المهندسين المدنيين في العالم ، كم واحد منهم قدر انه يكون صاحب شركه او حتى مدير ؟ مع انهم اكثر ناس يفهمون في هذا المجال لكن هناك فرق بين التخصص العلمي او الخبره وبين ادارة عمل تجاري (بزنس ) المهندس عشان يدير شركه مقاولات ما يستخدم من علم الهندسه الي تعلمه شي الانه في فرق بين الهندسه والاداره
هذا والله اعلم
السلام عليكم
اخوي اذا ما عندك مانع ممكن تخبرني على شو اتفقتوا انته والمهندس قبل ما اجاوبك على اسألتك؟
وكم راس المال إلي اتفقتوا عليه وشو بيكون دوره هو ؟
ويوفق من قال اخوي المرر
بس حبيت اعرف موقفي او حدود مسؤوليتي من هالشراكه خصوصا انه لو صار شريك وانا لاهي بدوامي بصير غافل عن كثير من الامور
عموما تسلم اخوي المرر وبيض الله وجهك عالتعقيب
بالتوفيق ان شاء الله …
ياخوي نصيحتي ما دام ان هناك نيه باعطاء الخيط والمخيط افضل الابتعاد عن الموضوع كليا …. وهذا رائي الشخصي
لانه ايقولك من همل افتقد ….
والله يوفقك ويرزقك رزق الحلال