أخواني الأعزاء
السلام عليكم ورحمة الله وبركاته،،
أما عن استفساراتي، فأنا في البداية دورت في المنتدى قلت يمكن أحصل بعض الاجابات لكن ما حصلت اللي اباه، بس وانا أبحث لاحظت بعض الأعضاء عندهم خبرة في موضوعي وباين عليهم ناس والنعم فيهم يحبون يساعدون وانا متأمل منهم كل خير.
ابغي استفسر عن بعض المواضيع مثل:
كيف أخلي الكاسكو بصير أكثر ألفة يعني أبا يطلع على إيدي بس هب طايع؟
شو الجو المناسب له، أنا مخليه في الصالة وأشغله المكيف بين فترة وفترة بحيث يكون الجو عادي، لكن في الليل ما ادري أخلي المكيف شغال؟ أخاف يبرد واذا بندته أخاف يستحر؟ وبالنسبة للإضاءة فالليل وقت الرقاد هل ابند الليتات وإلا أخليه شغال؟؟ شو الأحسن؟
بعدين بالنسبة للأضافر والجناح، وين أوديه يقصون أضافره والريش اللي في الجناح، والمفروض كل كم أسوي هالعملية؟ وهل أوديه عند بيطري وإلا كيف أنا حاولت أسويها بنفسي لكن ما طاع؟ إذا في بيطري أو مكان معين في أبوظبي ؟؟ ممكن تفيدوني عشان أعرف المكان بالمره لو مرض وإلا شي؟
بخصوص السبوح كل كم أسبحه وكيف الطريقة.؟
وشو الأفضل أخليه في القفص وإلا أطلعه ع الاستاند؟ أنا حاليا أطلعه كل يومين تقريباً من العصر لين آخر الليل وبعدين أرده في القفص بس يزعل وااايد يوم أرده في القفص؟ ومره خليته ع الاستاند يومين لكن المشكلة إنه ينزل ويتمشى في الصالة وتعرفون يخيس المكان.
وآخر استفسار لو بغيت أبيعه كم يسواله ؟؟
هاي تقريباً معظم استفساراتي، ومشكورين كل اللي بيردون علي وبيفيدوني وفي ميزان حسناتكم.
مع اني ضد نظرية قص الاظافر لانه الطير مابيقدر ياكل انواع معينه من الحبوب لانه ظفره مقصوص ومايقدر يمسك الاكل عدل فما بياكل
خصوص الاظافر خله يركب فوق القفص ودخل ايدك داخل القفص وزخ ريله طبعا هو بيكون برع مابيعضك وقص ظفوره على راحتك بدون ماتلتفت للاصوات اللي بيطلعها بس اتحمل اتحمل اتحمل اتحمل الظفور فيها شعيرات دمويه لو قصيت شويه زياده بينزف ظفر الطير حاول اتقص راس الظفر بس
لي عوده لاحقا
لو كان صغير كنت بتعلمه على كيفك وهو يتعود دايم على صاحبه وان شاء الله الله الاعضاء بيفيدونك على فكره الطير الكاسكو وايد حساس
بخصوص الأظافر سألت طبيب بيطري قال مسحل مال الأظافر و حتى المنقار نفس الحال حتى ما يعض بكل قوته
و الجناح مثل ما ذكر أخوانا أخيال خل الجناحين متساوين في الطول
كيف أخلي الكاسكو بصير أكثر ألفة يعني أبا يطلع على إيدي بس هب طايع؟
يباله تمم وياه فتره تعلمه
و بخصوص صاخذ واحد أكبر عن سنه صعب شوي تعلمه أم الصغير يتعلم بسرعه
إن شاء الله أفدناك
هو صح يباله اهتمام ورعاية، يعني يحتاج ان الواحد يتفيج له شوي،،
عالعموم كل الشكر لك على المعلومات القيمة، وفعلاً معلومات جديدة ومفيدة بالنسبة لي، واشكرك أيضاً على سرعة الاستجابة،
الله يجزيك كل خير
المهم ..انا اخويه بجاوبلك عالأسئلة اللي اعرف اجوبتها أما البقية في كمن رابط بحطهم وان شاء الله تستفيد ..
اما الاظافر فاتوقع بيطري طيور او محل
الحيوانات اللي يوفرون هالخدمة ..
اما عن السبوح انا لين الحين ما سبحته بس اتوقع مرة كل اسبوعين او مرة كل اسبوع ويكون عن طريق بيب ماي وترشه عليه رش خفيف مثل رذاذ المطر ويفضل يكون برع وينشف قبل ما يدخل داخل الا اذا الغرفة كانت معتدلة او انك تحطه قريب من النافذة ..
اما عن البيع يعتمد على العمر والطير اذا كان اليف ولا لاء او يتكلم ..