السلام عليكم
أخوكم (تشرخي) فقير
ما شاف حد منه إذيّة
يالس في حاله:
تشاي كرك،
وخبزه هندية
عنده شوية خريدات،
يعني: هن فوق الميّة
قالوله: يالخبله ..
حطهن في السوق المالية
سرت ابا اتخبر عن السوق.
قالوا لي العقارية
هاي الإتحاد إلي ربحها
مية بلمية
هاه… شو …
عِيَل هاي الصفقة المليونية!
حطيت خريداتي وعليهن
آآنتين في هالشركة القوية!
يا اخوان: قلت قوية،
لأنْ سعرها كان بليّه
صارت يوله وعفسة،
وانجلبت الحال بيّة
من عقب طلعتها وحلاتها
استوت بكم روبية!!!!
يا عيال، شو السالفة ..
محّد يرد عليّة !!
قالوا تجزئة واكتتاب
وخرابيط ما تمشي عليّه
وين خريداتي، وين
هالإكتتاب إلي
خذ كل ما لديّه
متى بشوووف فليسااااتي
إلي طارن عليّه
ردو علي يا هل المنتدى
ولكم مني عطيّة
وصلوا وسلموا يا ناس
على خير من جاهد بنيّة
من نسل عدنان،
“محمد” سِيْْد البريّة
“صلى الله عليه وسلم”
أخوكم “تشرخي”
طيب طيب اول شي هد اعصابك وركز معاي ياطويل العمر
خلنا نفترض انك شريت 1000 سهم ب95 درهم على كلامك
بعد الارباح انت عندك 1150
بعد التجزئة 11,500 سهم
اغلاق اليوم 8.1
يعني فلوسك 11,500*8.1=93,500
وعندك حق الاكتتاب في 11,500 سهم بسغر مغري او خيالي درهمين للسهم يعني بعد زيادة راس المال يكون ربحك 187,000-118,000=69,000
في احسن من هالربح؟؟؟ على فكرة انت لو بعت اسهمك اليوم بترجع استثمارك وبيبقالك حق الاكتتاب فمادري الصراحة شو اللي مزعلك!!
انا من الناس اللي الحمدلله توفقت مع هالسهم لدرجة اني تعلقت فيه وحبيته ومب قادر ابيعه!!
وبالنسبة لزيادة راس المال ابشر القرار قريب ان شاءالله بس يباله وقت شوي يعني شهر و نص او شهرين بالكثير و السماح للاجانب خلال ست شهور على الكلام اللي سمعته فلا تخاف اللي قالولك اياه صحيح وبشهادة الكل العقارية 100%
الهم صلي وسلم عليه
يا خوي
اشتريت والسهم عالي (فوق التسعين)، وقالولي: بتعوظ في الإكتتاب، وأشوف فلوسي نقصن ولا يا هالإكتتاب !!!!!!!!!!!!!!!!!
متى الإكتتاب يا خوي !!! وكيف أكتتب، ووين !!!!
ترى أخوك: تشاي كرك وبراتا، ما يعرف هالسوالف
لكن الحين اشتريت لي كتاب عن الأسهم وقاعد أقرا فيه (والله يسهّل). واتخبر الشباب، واقرا في هالمنتدى الكريم، ترى في علوم زينه.
والله يسامح اللي دخلنا هالغبة، كنت يالس عالسيف والهندي ساير راد بالكرك.
ما نروم ندخل ونطلع من غير
ما نصلي على خير البريه
اللهم صلي وسلم عليه
🙂
اخوي تشرخي وضح شو السالفة متى اشتريت و بكم؟؟