شحالك عساك بخير
كنت كاتب انا موضوع قبل فترةان خاطري ببيت عشان اتزوج فابي انا نصيحتك وان شاء الله باخذ على كلامك
اول شي انا مواطن اماراتي جواز وجنسي وخلاصة وغيره يعني اصلي
انا بعقد على بنت جريب بس اهلها طالبين تسكن روحها بس انا ما بي احط مبلغ كبير عشان شقة ايجار وغيره اقول بخاطري بيت اهلي والمبلغ احطه بجيبي ونستانس انا والحرمة ونسافر ونيي وغيره بس اهلها يبون بيت او شقة ان شاء الله غرفة وحمام وصاله ومطبخ بس انت تعرف ايجارات بوظبي كيف الشقة الزينة والنظيفة لعائلة يمكن توصل 150 الى 200 الف درهم كل سنة وانا الحمدلله راتبي بحدود 31000 درهم وقادر لكن اقول حرام كل شهر احط 10000 او 15000 او 20000 عشان شقة وايجار هذا اذا كان المكان نظيف وزين وانا اصلا نظام الشقق يخنقني فقلت بشتري بيت لكن البيوت كلها غاليه حتى حدائق الراحة وغيرها تبدا من 1400000 وفوق وانا راح ادفع بس خايف من سوالف البنك والدين وغيره والفوائد مادري حلال او حرام .. وبنفس الوقت اقول يمكن يطلعلي ارض بهالفترة الين اليهال يكبرون وجي .. انا عندي تقريبا مبلغ 25000 هذا غير مصاريف الزواج اللي الوالد بيساعدني فيهم بنسبة 90000 وكنت حاط المبلغ عشان اشتري سيارة بي ام اليديده لان ما عندي سيارة الا سيارة الوالد شراها لي بس دوم يسالني متى بتطلعلك سيارة ؟ 
وانا سمعت ان لو بغيت قرض مليونين لازم ما يكون عندك بيت ولا ارض وتختار البيت اللي انت تباه ولجنة خليفة ولا مادري يعطونك مليونين وعقب ما تطالب ببيت ولا ارض ..؟
والحين يتني فكرة اقول ليش ما اشتري ارض ولو نص ارض المشكلة مابيه بعيد وايد عن بوظبي يعني خليفة ب او أ طبعا مستحيل او مدينة محمد بن زايد او بين الجسرين اللي مستحيل بعد احصل ربع ارض فيها وعقب ابني بيت دور واحد وصغير واذا توفر لي المبلغ بكمل بنا وجي اضمن لي لحياتي لان الواحد ما بيفكر الوقت اللي هو فيه يفكر بعقب شو بيصير يمكن البيوت والقروض توقف فيكون عندنا شي وجياو اشتري بيت بحدائق الراحة وغيره مع انها غالية وايد
فشو الحل تشوفه لي اخوي ؟
المشكلة اهل البنت يبون بس بيت او شقة المهم تسكن روحها
مشكورين للجميع اللي رد وتعبته بالرد بس النصيحة راح تعم عالجميع ان شاء الله وانا راح اخذ بنصيحتكم مابي ادخل بالديون بس اهل البنت اذا اصروا فالزواج راح يتكنسل
بس ان شاء الله راح احاول قد ما اقدر انها تسكن عندي وان شاء الله دعواتكم معاي لاني صدق مب عارف شسوي وان شاء الله الله ييسر لنا الامور وشكرا عالجميع اللي ردوا علي والله يوفقكم ويزاكم الله الف خير
أخي العزيز بامكانك تشيك مع مصرف الهلال الاسلامي عن التمويل العقاري والنسبة تبعهم في المرابحة ..
خبرهم انك بتدفع 250.000 درهم دفعة اولى وهم بيخبرونك كم بيعطونك تمويل ..
وعلى أساس المبلغ تقدر تحدد شو تشتري من عقار …
ولا تخاف من ناحية الحلال والحرام فالله العالم بهالامر لكن المصارف الاسلامية عندها فتاوى بجواز التعاملات تبعهم …
لكن ياخوي نصيحة حاول باقصى جهد أنك تتجنب انك تبداء حياتك بالديون وحاول تقنع الاهل بانكم تسكنون فترة محددة مع اهلك لين تترتب امورك , وفكر في كلام الاخ أرباب لانة موضوع مهم للغاية …
والله يوفقك للخير والصالح ..
اخوي ليش ما تسأل عن فلل الريف
اتوقع الاسعار معقولة
وهو بنفس الوقت استثمار يعني ممكن تبيعه عقب كم سنة او تأجره
اعتقد عندهم فلل صغار ب مليون وميتين الف
وان شاء الله الاخوة يفيدونك
واللهم يسر له أمره وارزقه كل خير
السلام عليكم اخوي
شوف انا بكلمك من واقع تجربة
صعب تبدي حياتك بالديون خصوصا إنك مقبل على الزواج، يعني موضوع انك تبني بيت اشوفها صعبة شوي خصوصا في بوظبي، لو في الامارات الشمالية بقولك الوضع راح يختلف تماما
اقل نص ارض في بوظبي يمكن تحصلها في الشامخة بتكون حدود 700 الف، واذا بتبني ملحق بسيط ممكن يكلف 400 الف يعني خلنا انقول المبلغ الاجمالي مليون
ممكن مصرف مثل بوظبي الاسلامي يعطونك مليون قرض عن طريق تمويل الاسهم بس لازم تكون عندك رخصة تجارية والارباح 6.25 سنويا لين 13 سنة يعني لو حسبناها بتطلع الاقساط تقريبا 11618 درهم شهريا
ولا تنسى إنك بتحتاج مبلغ للتأثيث، وإن شاء الله الاخوان يفيدونك اكثر
اخوي هل بيت اهلك يتسع يعني واسع لسكن انته وزوجتك وهل شاورت اهلك ان اهل البنت فرضو عليك بيت لبنتهم ؟
هذه الامور عزيزي لازم يتفهمونها اهل البنت انته في اول الطريق ومن تتزوج ان شاء الله بتظهر لك ارض من الدولة وبعد كم سنة بيظهر لك القرض يعني الامور تاتي بلصبر
نصيحتي لك تبداء حياتك الزوجية بلديون
انا اعرف اكثر من 90% من الشباب الي تزوجو سكنت الحرمة في بيت اهلهم طبعاص قلت لك ان البيت يتسع لاكن ان يتم فرض عليك شرط مثل هذه غريبة .
بعض المرات الغاية من اسكان الزوجة في بيت الاهل له عدة فوائد وهيه اندماج الزوجة في بيت اهل زوجها اما من اول يوم في بيت بروحها عيل مع الايام ما بتي بيت اهلك وخذها مني
ارباب