مساكم الله بالخير صبايا و شباب
شرات ما تشوفووون العنوان!! و هذا ما حدث اليوم
سايره امر على ربيعتي بنشرب جاي
و قريب بيتهم شفت ياهل صغييييير برواوينه..طوله شبر و نص ..توه يمشي..و حافي و يمشي في نص الشارع…خفيت السرعه نزلت الدريشه ازقره
تم يطالعني ..و عقب شفت باكستاني يسقي الزرع قريب منه..قلت يمكن ابوه لان في هالفريج عوائل باكستانيين مأجرين و دوم عيالهم يلعبون في الفريج…
الموهيم سرت انا عشان اشل ربيعتي من بيتهم و اطالع ورا في منظرة السياره..و الا اشوف الولد بعييييييييييييد…سار يمشي بعيد..قلت اوووووويه ليكون هذا مب ولده…مستحيل ابو يخلي ولده و هو بيبي يمشي حافي في الشوارع
و اشل ربيعتي من بيتهم و نردله…وقفنا في نص الشارع..ربيعتي شلته…و تسأله انتوو منوووو ولد منووو شو اسمك ..و هووووو يناعر و لا عارفين ناخذ منه شي مفيد
في هذا الوقت حرمه وقفت بسيارتها عدالنا شافت الموقف..سألناها تعرفينه؟؟ قالت لا والله بس مب من عيال الباكستانيين؟؟ قلنالها لا شكله مواطن و ريحته خنينه…قالت و الله ما اعرف بس يوم بتلقون هله رمسووووهم و قولوهم وين لقيتوووه ..قلنا هالي بنسويه
سرنا صوب الباكستاني اللي يسقي الزرع قلناله هذا ولد منو؟؟ قال مادري انا اشوفه يراكض في الشوارع من مساعه ..و قال انا اول ما شفته في اول الشارع..يعني نفس المكان اللي انا شفته فيه
قلت حق ربيعتي عيل ماشي غير ان نتلي البيوت واحد واحد نسألهم
و يلا تدقديق جرسات و هرنات حق البيوت و الا يظهرلنا الدريول و الا تظهرلنا البشكاره ..و لا شي امل…قلت ماشي الا نخبر الشرطه
و بااعدين لمحنا بارقة امل ..يوم وحده من البشكارات قالت سيرو البيت اللي عدال البيت اللي حذانا جنه و الله اعلم ولدهم << عاد في هالزمن محد يعرف حد
قلنا اوووكي سرنا البيت اللي خبرونا عنه!!!! ظهرت لنا البشكاره..قلنالها هذا ولدكم؟؟ قالت لا هذا من ولد اخو ارباب..شي جذيه و بيته بعيد في السكه…يعني الولد يوم شفته كان يبعد عن بيت هله ما يقارب كيلو متر كامل او اكثر..ياهل توه يمشي؟؟؟ و لا حد افتكر و ظهر يدوره!!
قلنالها زقري باباه و الا ماماه خلنا نرمسهم…و نعطيهم شوي من الزين
خذت هي الولد و دشت و تمينا خاري نتريا…عقب ملينا قلنا هاييل ما بيون خلاص نسير عنهم..
و نحن رادين ريوس جان تي البشكاره..و تقول اونه ماما و بابا يقولون شكرا
انا و ربيعتي نطالع بعض؟؟ شكرا؟؟ شو شكرا
هاي شكرا وين بتصرفونها لو ولدكم خطفوه و الا دهسته سياره؟؟ عقب خل الشكرا تنفعكم
وايد عصبنا انا و ربيعتي قلنا ليكون يتحرونا بنقولهم عطونا بيزات و الا شي عشان حصلنا ولدهم
بدون تعليق على هالناس و الله..المفروض كنا نخبر الشرطه و نخليهم صدق يتمشكلون و يتوهجون عيل فارين ولدهم ما يدروبه يتالي في الشوارع ..المسافه اللي الولد قطعها و سار و رد في نفس الشارع على مشيه يباله مب اقل عن نص ساعه او اكثر..و هم خبر خير ما يدرون و لا افتكرووو حتى..و الا فارينه على البشكاره و مأمنين
مب فاهمه الموضوع و الله و صدق عصبت على اللامبالاه اللي هم فيها
المفروض يكون في الامارات سوشال سيرفسز شرات مال امريكا..الاسر اللي ما يهتمون في عيالهم لازم ياخذونهم عنهم
الله المستعان
ترا هالمفروض
المفروض الام دوم يتم قلبها ياكلها على عيالها و لازم تعرف مكانهم في كل دقيقه
هالولد هله قلوبهم ميته ..الله سلمه بس من السيارات الي يطوفن مسرعات
صدق برودة اعصاب
لو كان صاير له شي بعيد الشر جان
تموا يحطون على فلان وعلتان
بس هم اروحاهم مب مفتكرين فيه
الله يهديك ماصورتي الياهل
اخاف يطلع ولد واحد من الاعضاء
مشغول في المنتدى وولدة برع يحووط
بارك الله فيج أختي على هالموقف الراقي
والله أنا أنقهر لما أشوف الناس تاركيين أولادهم براا بالشارع
ولا خايفيين من شي
تراهم مايحسوون بالنعمة إلا إذا فقدوها
نحن ندعي الله يرزقنا بأولاد
وهم راميين أولادهم برااااا
طبعا البعض موب الكل
لا حول ولا قوة … يزاج الله خير … بس صدق يقهرون لو انا منج ما بعطيه البشكاره لين ما حد ثاني يطلعلي …
انا اخواني لو يلعبن ورا البيت وامي تزاقر عليهم ويقهرونها ما يردون عليها
على طوول تسير ادورهم في الشارع … واخر يطلعلها يضحكون هههه
عاد امي هاتي من الفتين والضرب