ياحامي الكلب!

السلام عليكم ورحمة الله وبركاته

قصيدة: ياحامي الكلب
لأخيكم سوّاح

“غزّه” وانا صاير اللي مسندٍ خدّه
في حضن كفّه وعينه دمعها حامي

ياشعلة الموت في الأطفال مشتده
وش ذنب الاطفال؟ ان الدين إسلامي؟؟!

يا منظر الطفل والنظرات مسوده
غيمٍ على غير دون امطار .. ياظامي

يا ناس أنا اللي حبيس الهد والهده
والذبح والقتل والترويع قدامي

عطشان أنا من زمان وطالب المَدّه
والماي ممنوع .. لكن شوفه إلزامي

أطفالي هناك كلٍّ تنبتر يدّه
والشجب صاير سلاح الجندي الرامي

ياصاحب الكلب .. عرّف كلبك وندّه
هو كلب صيدٍ او انه حارسٍ حامي

وياحامي الكلب يلعن كلبك وجَدّه
هو صاحب الكلب؟ أو هو كلبك السامي؟

ويا والد الطفل لي جثمانه ايشده
سامحني ارجوك .. عندي شغلٍ اعلامي

لي أخ عنده وليمه.. شوف! من قده!!
خبّرت عنه القريب ومبعد اقدامي

و ولد عمّي يغار وصدّته صدّه
يبغي يكون المعزّب دون الآنامي

زعلان مشتط كنّ الورث ماسده
والويْه مكشوف لو سوّاله الثامي

ويا أرملة صاحبي المجروح من مُدّه
داويت جرحه بنزف حروف أقلامي!

لاتحسبيني خذلته! بس لي جَدّه
تمنع خروجي .. كأني زايد اجرامي!

يا غزّة العز باب الريح بنسده
وارجو السموحه تراني أروي احلامي

يا نغزة الحر لي مغبون وترده
طاعة ولي الأمر والحكم إسلامي

وسلامتكم