ولف الحتحات لين ما يقولك الزمن هات

(ولف الحتحات لين ما يقولك الزمن هات ) مثل وحكمة في نفس الوقت يحثنا على ذخر المال

للايام اللي تحتاج منا انا ندفع وهذا شي اكيد انه في يوم من الايام حد بيحتاج

علاج او زواج او بناء بيت ومتطلبات الزمن وايده

معظم الناس اكيد عندهم الحل السريع والذهبي اللي هوه الاستدانه من البنوك

ولكن هذا مب حل كثر ما هو مصيبه بيتحمل عواقبها اكثر من شخص

يمكن يكون المستدين صاحب عايله ويتحمل عياله الدين من ناحية النقص

في اشياء كان متوفرة حقهم او سجن رب العاليلة في حالة العسر عن السداد

ولكن شو الحل….؟

مرة كنا في برزة نقاشية في هالموضوع وكان فيه اكثر من راي وتجارب مرت على الاخوان

تخلي الواحد يرد يفكر ويعيد حساباته لمواجهة مفاجآت الزمان

ومن الافكار الحلوه اللي عيبتني:

واحد يمع خوانه وكانوا سبعه وكلمهم في الموضوع واتفق وياهم على اساس دفع شهري ثابت للعايله ويسمونه صندوق العاليه ويكون الدفع من ميتين درهم البعض منهم اتحمس وطلب انه يكون الدفع اكثر ولكن صاحب الفكرة قال قليل دائم احسن من كثير منقطع
وتم الاتفاق بهالمبلغ ويقول انه استوى عنهدم راس مال ساعدهم في اشياء وايده

الثاني قال: نحن ستة اخوان نشتغل ما عندنا دفع ثابت لصندوق البيت ولكن اذا حد احتاج شي مثل يشتري سيارة او يتزوج والا علاج الكل يدفع دفعه الزامية خمسة الآف ومن عقب كل واحد يجود باللي عنده

الثالث قال: ما عندنا دفع شهري نحن اربعة اخوان وكل واحد منا ملزوم في السنة بخمسة آلاف درهم يدفعهم في اي وقت من السنة والحمدالله عندنا مبلغ محترم حتى مرات اذا حد بغا يتسلف من المبلغ ياخذ اللي يباه ويرده بشكل قصط شهري ويفتك من فوايد البنوك

هاي كمن تجربة لاخوان عرفوا كيف ينسقون بينهم لمواجهة متطلبات الزمان اتمنى انكم تستفيدون منها واذا عندكم تجارب في التكافل الاجتماعي اتمنى تخبرونا

واذا حد بيتكفل من المنتدى بفكرة انشاء صندوق تكافلي لاعضاء المنتدى وبدفع شهري ثابت انا اول واحد بشارك فيه وتكون اهدافه تكافليه اجتماعيه مثل مساعدة الاعضاء المشاركين في الصندوق في علاج او شراء سيارة او زواج وطبعا بشروط ….

وكلنا ثقة في المنتدى وادارته الكريمه