السلام عليكم ورحمه الله وبركاته
حبيت اغير شوي في اتيكيت المواضيع لاني شفت المنتدى ميت من فتره طويله ومب هو منتدانا الي نعرفه …
وان شاء الله موضوعي يحي شوي ويعطي طاقة وحيوية بس بدون جوانح 
كل واحد يدش ويقول لنا هو من أي جيل
مع حمد قلم ؟؟؟؟؟؟؟؟؟؟؟؟
والا
لبست هنـــــــــــــــــد حـــذااااء نــــــــــــــــــوره ؟؟؟؟
والا
الجيــــــــــــل الجـــــــديد؟؟؟
و شو تذكرون من دروس صف أول ابتدائي؟؟؟؟؟؟؟؟
………………
انا من جيل هند ونوره وحمد وسعيد^^
اممممممممممممم اذكر في نهاية كتاب العربي اناشيد
شجري شجري شجر السدر
سمح الظل وقت الحر
وله ورق ورق اخضر
وله نبق نبق احمر
كنت احب كتاب اللغه العربيه اللي لونه ابيض كتاب الخط( مب الاصفر) كانوا يعطونه لنا بصف اول ابتدائي^^
يا الهي يا الهي يامجيب الداعواتي
اجعل اليوم سعيداً وكثير البركات
يا الهي يا الهي يامجيب الداعواتي <— وحده اتكرر البيت <— الذاكره ميح
أيوه أيوه.
تيمعوا شياب و عيايز المنتدى.
موضوع أكثر من روعه و اللي مب عايبنه ما يلزمناااااش. عنده الـ back فوق عاليسار.
الا طيري الا طيري وغني ياعصفيري
غناء لحنه يشدو كألحان المزاميري
حد يذكر هالنشيد
وتذكرون بعد
يا الهي يا الهي يامجيب الداعواتي
منو فيكم من هالجيل
منو هند؟
احيد لبست نورة حذاء امها
انا من جيل “بطولات على ساحل الخليج ” كتاب القصص اللي لونه اخضر
وبعد اتذكر شي نشيد عن السدر والنبق
بس نسيت
وبعد نشيد يبتدي ب
بلادي بلادي بلادي لكِ حبي و فؤادي
بس نسيت التكمله
بس احلى شي لما ننشد
طلع البدر علينا من سنيات الوداعي
هههههههههه سنيات مب ثنيات الله يرحم مدرسات الرياضه خربو ابو اللغه
والله اياميتها كنا ننسخ وايد
لدرجه مره المدرسه نسختنا الدرس 10 مرات
تعبت كتبته مره وحده ورحت المكتبه
طبعته ، افتكرت ما بتيودني ما بتشوف اي فرق ، السالفه عدت على خير لان يومها بالذات ، اذكر كانت المدرسّه موقفتنا تبي اتجيك وله ايدّخلون ابنيه من الكويت ، ايام حرب الخليج ، المدرسّه اللتهت معها ،
اف رديتيني 18 سنه ورى ههههههههههههه
بسكوت نبيل !!
ماذكرهم كانوا يعطونا بسكوت نبيل.
اللي أذكره إنهم كانوا اييبون كافي (اللي هو شوكولاته ههه) عليه صورة فيل. أسميني كنت أموت عليه.
بس أذكر الفرّاشه اللي تييب الطشوش كانت أفريقيه طويله عريضه و شكلها يخوّف. هذا أسوأ مافي الموضوع.