السلام عليكم ورحمة الله وبركاته

وقال تعالى { ما أصاب من مصيبة في الأرض ولا في أنفسكم إلا في كتاب من قبل أن نبرأها }

مرحبا اخواني واخواتي ..

ابغي اجووف آرائكم فموضوع يخص واحد من الاهل ..

انا سويت اقتباس لرمسته وان شاء الله تساعدوونه

لوالد من 9 سنين انصاب بجلطة في الدماغ ووقف الدم عن الدماغ لمدة 15 دقيقة تم في غيبوبة لمدة شهر والحمدلله قام بس كان فاقد للذاكرة وما عنده قدرة الاستيعاب فالبداية كان هادي لكن بعد كم من سنة قام يضارب اللي حواليه ويشك فيهم في البداية كان بالكلام بعصبية وبعد فترة تحول سب وضرب وقام يهمل عمره وما يعتني بنظافته الشخصية وما يطيع ياخذ الادوية عشان الضغط

والدكتور قال مشكلة خلايا الدماغ اذا ماتن خلاص ما يرجعن ثاني مرة

والوالد يعاني من حالة انفصام في الشخصية من اللي صاب المخ

والعلاج اني اوديه المصحة العقلية (مستشفى المجانين) وصراحة انا ما اقدر اودي ابوي قلبي ما يطاوعني

وفيه مشكلتين :

الاولى انه يضرب وااايد واخاف يوصل الضرب لدرجة انه يعور حد من الخدامات وتشتكي عليه ويفرونه في السجن او لا قدر الله يسبب لحد عاهة

الثانية انه ما ياخذ دواه واخاف انه يزيد الضغط عنده ويرد يصيبه شي

وفي النهاية ضميري يعورني من الصوبين من نفسي لاني ما اقدر اسامح نفسي لو لا قدر الله استوى شي حق حد ولا بعد اني اودي ابوي المستشفى واخليه هناك

والحمد لله على كل حال ..
اللي يقدر يلاقي لنا حل لا يقصر .. ويزآكم الله خير الجزاء ..

بانتظار تفاعلكم

اختكم الغر الحشيم ..


__________________

29 thoughts on “مشورتكم … في حالة مرضية ..”

  1. اخواااني

    عاشق العين
    ,,

    الفيلسوف}~

    يزاكم الله خير ما تتخيلون كيف قدرتم تساعدونا بقصصكم ونصايحكم ربي يوفجكم دنيا واخرة ويشفي مرضاكم ومرضى المسلمين يارب

    ربي يجزيكم خير الجزاء .. والله يوفقكم دنيا وآخرة

    .
    .

    =)

    حمد محمد حمد

    تسلم يا خوية والله يشفي جميع مرضى المسلمين يارب ..
    حيآ الله يا خوية

  2. أنا سمعت طبيب أعشاب على إذاعه الشارجة ينصح بنقع لبان الذكر ويشرب الماي
    لمدة شهر وفي علاج بإذن الله لتنشيط خلاية المخ وتقوية الذاكرة

    بس الأفضل مراجعة دكتور مختص بهذه الأمور

    وأسأل الله العظيم رب العرش العظيم أن يشفيه ويشفي مرضى المسلمين -اللهم آمين

    يزاك الله خير يا خوية بوسلطان
    وان شاء الله بنخبرهم يسوون هالطريقة
    والله يشفي جميع مرضى المسلمين يارب ..
    .
    .

    الاخت uae_girl2000
    .
    .

    يزاج الله خير وبارك الله فيج على نقل الفتوى الشرعية

    ربي يجعلج دالة على الخير دوما =)

  3. اختي الغر الحشيم ..

    اول شي بقولج : اسأل مجرب و لا تسأل طبيب ..

    و مثل هالحاله بالظبط صارت عندنا و للحين موجوده عندنا في يدي الله يعطيه الصحه و العافيه

    يدي صابته جلطه و صار بالظبط نفس حالة الوالد اللي عندكم ..

    و المشكله الاكبر ان جسمه قوي و يقدر يغلبني انا و ابوي و عمومتي لما نبغي نغسله او انظّفه ..

    مثل هالحاله مالها علاج ..

    لكن لازم تحمدون ربكم لان عندكم باب للجنه .. و كنز من الحسنات من ورا هالشخص ..

    لازم عياله و بناته يسوون له ملحق فيه كل شي يبغيه ..

    انا بقولج نحن شو مسويين ليدي ..

    ملحق فيه غرفه لنومه .. طبعا مش سرير .. عـ الارض لانه بيطيح من السرير ..

    و غرفه ثانيه مثل حمام عزّج الله عشان تسبحونه فيها ..

    و لازم طبعاً تكون عنده شغاله او 2 عشان يعطونه اكله و ادويته .. صح هو ما بيطيع ياخذهن .. لكن الصبر مفتاح الفرج .. وكل ما عاند و تعبكم .. كل ما خذتو فيه اجر زياده إن شاء الله ..

    الحبوب ممكن تحطونها له في موز مثلا او سندويج ليّن ..

    او اطحنوها و تحطونها له في العصير او الماي ..

    اختي في النهايه تراه إنسان تعّب على العايله كلها .. حرام تحطونه في مستشفى الميانين ..

    اذا القدره الماديه موجوده عندكم .. سووله مثل هالملحق و بمواصفات تناسبه و لازم عياله يتعبون عليه كل يوم عشان يسبحونه و يبدلون عنه الحفاظات ( لانه اكيد ما بيقدر يسير الحمام )

    إذا بغيتي اي شي بخبرج .. لأنه نحن جي سوينا ويا يدي و كل عياله و احفاده كانو عنده و يسوون له كل شي و تحملناه لانه تحمّل الكل قبل ..

    يدي قبل كان يلعن و يشعن و يسب خلق الله و يصارخ و ما يقعد مكان و يعاند بكل شي لانه خلاص فقد الذاكره و خرّف ..

    الحين شوي الصحّه قلّت عنده و صار هادي ..

    الله يحفظ جميع آبائنا و امهاتنا ..

    و السموحه منج ..

  4. الله يصبركم ويشفي مرضاكم الصبر واحتساب الاجر
    كما قال تعالي في كتابه الكريم ,ان مع العسر يسرا,

Comments are closed.