مشروع جديد

( وماهو ملخص ذلك الاعلان الذي حوله من موظف الى شخص يتحدث بالمشاريع) ؟
مجموعة من الخليجيين كل شخص منا جرب يتاجر في مشروع لوحده او مع شخص ثاني وكان صعب ان ينجح
فقرروا ان نجتمع كلنا ونبدأ اول مشروع مع بعض شركاء لا نعرف بعضنا بعضا ..
وباللهجة العامية اجاوب على سبب تجمعنا:
ـ الى متى بنظل موظفين؟
ـ والى متى ندش النت ونطلع على الفاضي ما نستفيد منه غير التشات والكلام الفاضي ومضيعيين اوقاتنا؟
ـ والى متى الواحد بيظل الواحد فينا تلعب عليه الشركات ومطلوب اقساط والحكومات مطنشه ؟
ـ والى متى الواحد فينا يحلم يكون غني وشكلنا بنموت وبنظل نحلم ..
ـ الشركات الكبيرة عبارة عن ايش؟ ناس جمعوا فلوس وحطوا مجلس ادارة يلعب بالشركة لعب وصارت شركة كبيرة وهم اغبى منهم مافيه … مضيعيين فلوس الناس ومدلعين نفسهم برواتب على كيف كيفك وتذاكرهم آخر دلع .. ، طيب ليش ما نكون احنا مجلس الادارة ، بس مافيه مساهمين نلعب عليهم ونبهدلهم ورانا ، لاننا احنا المساهمين واحنا الادارة ..

( وايش الفايدة من تجمعهم ) ؟
ـ يطلع راس المال علينا تقريبا ولا شئ .. يعني ما يكلف وجبة عشا ل3 او 4 اشخاص ..هذا اذا بلتزم بمبلغ شهري
ـ تكون الادارة علينا سهلة جدا .. لاننا اكثر من شخص
ـ ولاول مرة نستفيد من النت بصحيح ولو مرة بحياتنا ..

( وبأي مشروع سوف يبدأون ) ؟
لا يوجد احد يقرر ..
كل عضو اذا كان لديه مشروع عاجبه يطرحه ثم يتم عمل تصويت ثم يبدأوا المشروع اللي يفوز بالتصويت
حيث يقوموا بطرح المشاريع في قسم المشاريع في الرابط التالي

( هل تعتقد نفسك تصلح تدخل معهم وتشارك ) ؟
الجواب:
ـ كثير منا عندهم مشاريع ويحلمون يطبقونها ولا يقدرون ..
طيب مشروعك جيد صح؟
دش المنتدى وقول للاعضاء المشروع كذا كذا واقنعهم في مشروعك
واذا كان فعلا جيد راح يصوتون للمشروع وبتوفر على نفسك سنين تخطط كيف تنفذ المشروع
لان عندك 20 عضو وانت 21 .. كم بيكلف مشروعك 100 الف درهم
احسب 20 عضو ( نفرض انك قدرت تقنعهم بمشروعك ) اضرب في 5 الاف درهم .. خلال شهور تلقى مشروعك يتنفذ براس مال 100 الف

(طيب خسر المشروع) ؟
حصل خير العضو خسر 5000 درهم فقط والتجارة على الربح والخسارة وهم اساسا لما صوتوا لمشروعك ما كانوا يلعبون .. اقتنعوا برأيك وخسروا مبلغ بسيط .. وفعليا هم ما خسروا لكن تعلموا تجربة كبيرة من خسارتهم مقابل 5 الاف درهم فقط ..
لكن لو الواحد فينا بلش المشروع بنفسه
وخسر ال100 الف ، تلقاه بيقعد يعدل وضعه سنة او سنتين .. هذا اذا ما قالك ماراح ادخل في مشروع بعد اليوم.
هذا غير التعب اللي يتعبه
علشان كل شوي يكبس على الموظفين لا يكون يسرقون او ما يشتغلون بضمير
لكن لو فوق راسهم 30 عضو تلقى كل يوم متأكدين .. جايهم واحد ولا اثنين يشيك عليهم .. وما يجيك الدور الا بعد اسبوعين .
علشان يجيب زباين ويعمل دعاية لمحله

(ـ طيب ماعندك مشروع بس تحب التجارة .. وتحلم تصير غني بيوم من الايام ، صح) ؟
ادخل وشوف المشاريع وصوت للي يعجبك ونفذ مع الشباب وبتكون صاحب مشروع خلال شهرين ثلاثة

ـ طيب عندك فكرة خايف احد يسرقها من الاعضاء ..
خلك حافظها عندك ودش وشوف مشاريعهم وبعد ما يبدأ اول مشروع وتعرفهم عدل راح تتطمن لهم وتلقى نفسك تعرض عليهم فكرتك ..

(طيب، ايش راح استفيد انا متعب نفسي وجاي اقول اللي يبي يشترك حياه الله ) ؟

ـ اكيد بكون رئيس عليكم
او بخليكم تنفذون مشاريعي او مشروع في راسي
او بيكون لي نسبة عشان نسقت التجميع بينكم
ولالالالالالا شئ من هذا صحيح ………….
بيكون
حالي من حال اي شخص يشارك
انا عضو وهو عضو
يدفع 10 ادفع 10
يخسر 10 اخسر 10
يربح 100 اربح 100
ولا أي ميزة …
اللهم ميزة التعب …. اللي يبي ياخذها يتفضل …
احب التجارة ومو عاجبني حالي وحاب يكون حالي افضل مما هو عليه ..

واتحدى شخص يلقى شركة تجي تقنعه يدفع فلوس ، وهم ماراح يستفيدون شئ .. او يقولون له تعال صير شريك
اقصاه بيقولك انت مساهم ولك مميزات ..

ولله الحمد كلنا حالنا من بعض لا صغير ولا كبير ولو يجي دكتور بالاقتصاد بيكون حاله من حالنا ولو يجي مليونير بيكون حاله من حالنا .. ولو يجي امير بيكون حاله من حالنا ..

(ايش مطلوب عشان الواحد يشترك ) ؟
ولا شئ
الشرط الاساسي تكون محب التجارة

(طيب هل راح نوقف على مشروع واحد) ؟
باذن الله طالما في ناس تحب التجارة وقلوبها صافية وعنده حماس تتاجر وتربح وتخسر وتعيش حياة التجار صحيح .. ما بنوقف الا نطبق كل ما براسنا من مشاريع .. لغاية ما يشبع الواحد من التجارة ويقول بس كافي ابي انسحب ..

( مثال بسيط وأخير) ؟
تخيل اخوك الصغير عمره 18 دخل وشارك معنا
وكان مطلوب منه يدفع 250 درهم شهريا .. ويكون صاحب سوبرماركت كبير

لان 250 درهم نضربها في 40 عضو مثلا .. بتكون النتيجة 10 الاف درهم
اللي هي ايجار السوبرماركت ورواتب الموظفين

(النتيجة) :
ـ بتلقى اخوك اصبح يعرف ايش اللي ينباع وايش اللي ما ينباع ايش اللي يمشي بالسوق وايش اللي ما يمشي يعني حتى لو تتركه لوحده يتاجر يكون عرف من وين يبدأ ..
ـ وبتلقى شركات الاغذية تحسب له حساب لانه من ملاك السوبر ماركت
ويدورون رضاه ..
ويجلس في المجلس تلقاه يسولف عن مواقفه مع التجار اللي ينزلون بضاعة عنده في السوبرماركت
وجاركم اللي عمره 60 سنة تغيرت نظرته لاخوك .. ويمكن يطلب منه يوظف له شخص في السوبرماركت ..
ووالدك … يكلمه بطريقة مختلفه .. بعد ما كان ينظر له انه ولد مراهق ما غير يضيع وقته وفلوسه ..
وبتلقى بجيبه كرت او كرتين اذا جا يكلم احد يقوله فلان الفلاني وعطاه كرته .. على اساس انو صاحب سوبرماركت وصاحب مكتب استيراد سيارات
(وتلقى اخوك يقول بقلبه لو يدرون هالناس اني تقريبا مو دافع شئ ما ضربوا لي تعظيم سلام )..

وتلقا اخوك جالس يفكر ايش اختار مشروع استيراد سيارات ولا نفتح مصنع ولو تسمع كلامه تضحك عليه تظن هذا انهبل
لكن الصحيح انه ماراح يدفع شئ تقريبا .. بمبلغ بسيط تلقاه بدأ يستورد سيارات من المانيا مثلا او بمبلغ بسيط تلقاه صار صاحب مصنع ..
لانه معاه 20 او 30 او 40 شخص يدفعون معاه ..
وبالفعل كلامه صحيح .. بيكون صاحب مصنع حتى لو كان معمل صغير لكنه اسمه مصنع ..

او تفتح الجريدة الصبح تلقى اعلان نصف صفحة وبالالوان بالصفحة الاولى .. اخوك يقراه ويبتسم ، وانت ما انت فاهم سر ابتسامته ..
لانه هو صاحب الاعلان اللي مفروض يكلف 20 الف درهم اخوك ما دفع منهم الا 500 او الف درهم ..
ولو انت حاطه لوحدك لمحل خاص فيك ..
كان قصيت الاعلان من الجريدة وبروزت الاعلان عشان تقول لعيالك اذا كبروا انا بيوم من الايام حطيت اعلان بالصفحة الاولى ..مساحته نصف صفحة …
بينما كمجموعة تلقى كل شهر نازل لنا اعلان او اثنين .. بمبلغ ما نحس فيه .. ولا نحس مأثر علينا ..

(طيب وين وصلنا لغاية الحين) ؟
ـ تعدينا المرحلة الاولى التجمع
ـ تعدينا طرح المشاريع واخترنا مشروع
ـ بادئين مناقشة المشروع اللي راح يتنفذ ( نحن هنا )
ـ يبقى علينا التنفيذ ..

ماهو اول مشروع تم اختياره؟
وكيف سننفذه؟
وماذا سنستفيد منه؟
وكيف نديره؟
والكثير من الأسئلة موجودة في الموقع …

والكلام كثير ولا اقول الا
رحم الله الفاروق الذي لخص كل هذا بكلمتان
بتفرقنا غلبتمونا وباجتماعنا غلبناكم ..

وسامحونا على الاخطاء الاملائية
واذا فكرانا بطريقة اكبر تخيلو شو راح يصير