السلام عليكم ورحمة الله وبركاته
شحالكم يالربع
وايد من الشباب يتخبروني عن مشاريع مربحه بس راس مالها ما تتعدى ال100 الف درهم وانا احترت وماعرفت بشو ارد
قلت الجأ لذوي الخبرة^__________^ وان شاءالله خير
واشكركم عاد لا تقرون بس ردو عشان نستفيد مب بس انا الكل يستفيد ان شاءالله وشكرا
مرحبا اخويه ExBiTioN
فكره حلوه .. وفي مشاريع واايد بـ 100000 واقل بعد .. وابشرك يبتلك مشروع كشك ذرة ويا دراسة الجدوى مع مشاريع وايد ودراسة الجدوى مالهم ..اتمنى الفايده للجميع
منقول
1. مشروع افكر فيه وماظن انه يكلف بس ابا رايكم يا هل المنتدى سواء بنت او ولد
في فترة من الفترات سافرت مع هلي الهند الوالد الله يرحمه كان مريض ووديناه يتعالج اهناك
كنت اشوف اهناك عربات يدزونها دز وفي هالعربات شي كميه كبيرة من الذرة ومغطاه بزجاج وراعي العربه يشوي الذره ع الفحم ويحط عليها خطه حاره واحياننا اشوفه يعصر عليها ليمون ويرش ملح طعمه حلو واشوف الناس كلها ملتمه عليه
اهني الذره هب مفور تنشوي شوي ع الفحم
المشروع بسيط بس لو انفكر فيه للحظة فبنقول المشروع يباله مكان فيه كثافه عدديه ع سبيل المثال في نص السوق او في حديقه او في مكان يترددون عليه الناس للنزها شرا المبزره في مدينة العين
باعتقادي مشروع يطلع ثروه وخاصه في فترة الويك آند
ماعرف بس يت الفكره ع بالي وقلت اخبركم بها وافيدكم ^__^
العفو اختي راعية الزين وشكرا على الرد شفت عدد القراء وصل لين 25 وماحد رد ورديتي انتي
يمكن البعض يقرا ويقول ماشي فايده من المشاريع الصغيرة ويمكن البعض ماعنده اهتمام بمشاريع راس مالها صغيره
بس ماظن الكل بدا من القمه اكيد المشاريع الصغيرة ساعدته للوصول للقمه وبغض النظر عن كلمه صغيرة وبراس مال صغير في النهايه هو مشروع والكل يستفيد منه
مهما كان تخصصه وفي اي مجال بس الواحد من فكره لفكره ومن خطوه لخطوه يوصل لاشياء يمكن ماكان يرفع نظره لها ومثل ماقلتي مابيقصرون وان شءاالله نستفيد واذا عندج شي اختي لاتترددين وحطيه وان شاءالله خير
وشكرا لج مرة ثانيه وسابعه
مشكوور اخويـه اكسبشن
ع هالطررح الراائع و ان شاء الله العرررب بيحطوون رايهن و يعممون هالاستفادة من المشاريع الصغيره
ربيــه يووفقكم يميييع
سلااميه عليييكووو
خويتكم
راعية الزين
قد تكون المشاريع لي يمكن انها تستوي براس مال قدره ما يتعدى المئة الف قليله ويمكن تكون من المشاريع الي ماعاد حد يفكر بها في زمنا ها نظرا للطفرة العقاريه لي قامت تمر بنا
بس يمكن فكره على فكرة ثانيه تسوي مشروع يديد سهل وما يباله كلفه
تعلمنا من اخونا نايف كيف نسوي مشروع بدون راس مال ودخله ممتاز وقد يكون خيالي وتعلمنا منه ومن الاعضاء ان الدخول بالمشروع بشكل قوي يساعد على نجاح المشروع
مشاريع براس مال لا تزيد عن 100 الف مممممممممممم ماعرف بس اكيد شي ويمكن شي اشياء او مشاريع تشوفونها بسيطه بس دخلها رائع وابسط مثال
كبينة الذرة مرة يت اشتري منها وجان اتخبر الفلبينيه قلت لها كم اطلعين في الشهر قالت لي 10000 درهم قلت لها نعم تتمصخرين قالت صدق بس ماعرفت كيف اتصرف في موضوع الكبينه بس بعدها في بالي
واشياء كثيرة يمكن الواحد يستفيد منها بس اتمنى الكل يشاركنا ولو بفكره بسيطه من عنده يمكن تفيدنا او تفيد حد من الاعضاء او نزيد عليها وتفيده هو شخصيا
وشكرا لكم ^___^
اكسبشن