عندي مشكلة مع المقاول و احب اسمع راي الاخوان الي عندهم خبره مع لواته المقاوليين
وقعت عقد الفيلا في نص شهر ثمانية و دفعت الدفعة الاولى و بالاتفاق مع المقاول على ان يصبر علي الى ان تدفن البلدية الارض في غضون شهرين
ولكن للاسف بلدية الشارقة الموقره طبعا تأخرت الى شهر 2, بعلم و سكوت المقاول (لم يطلب المقاول مني التعجيل بالدفن), و الي شجعني على الصبر على البلدية ان المقاول كان يبني بيت اخوي الملاصق لبيتي ببطئ شديد جدا (10 شهور للاساسات ؟!) وكان يشتغل يوم و يوقف ايام مع العلم ان اخوي ما عنده اي مشكلة مع الدفع. يعني الي فهمته ان المقاول فرحان ان ارضي غير جاهزه لان ببساطة ماعنده الايدي العاملة الكافية او عنده شغل في مواقع اخرى اهم.
المهم في شهر 2 لما الارض جهزت للبناء, قالي المقاول بعد ما راح للموقع و شاف الارض جاهزه, راحت عليك يا صاحبي, ليش ما دفنت من قبل الزيادات الجنونية و بعدين ما اقدر اتحمل اكثر من 20% من الزيادة في اسعار مواد البناء.
بصراحة, قلت امري لله راح ادفع زيادة مدام الحكومة ليس لها اي دخل في كبح الزيادة في اسعار مواد البناء و مساعده المواطنين, و قلت مدام زادو رواتبنا ما باليد حيله… ادفع
قلت للمقاول عطني السعر الجديد, يعني شوف كم مقدار الزيادة الحالية في موادالبناء مع السعر القديم وبعد المماطلة لاكثر من شهر و بعد طلوع روحي معاه, صدمني رده قال لي الزياده 700 الف مع الرأفة القصوى ولاني موقع عقد معاه في شهر 8 ودافع دفعة اولى؟؟؟؟؟!!!!!!!
العقد الاصلي 1.1 مليون و العقد الجديد 1.8 مليون؟؟! زيادة 64% على السعر الاصلي!
الحسره ملت قلبي و قلت يا ليت دفعت 50 الف و دفنت على حسابي وكنت وفرت 650 الف!!
حاولت اقنع المقاول ان السعر الجديد جدا مبالغ فيه ولكن لا حياة لمن تنادي, و طلبت من الاستشاري المساعده في اقناع المقاول و الى اليوم من شهر اثنين و المقاول يرفض التعاون حتى انه سافر وقالي لما ارجع…..
اعرف اني طولت عليكم ولكن احتاج نصايحكم ياهل الخير و شو رايكم ادفع 3 الاف درهم و ارفع عليه شكوى في البلدية للنظر في الموضوع …
السلام عليكم
اخوي اذا انته ذاكر في العقد انه يتريا حتى البلديه تدفن الارض عادي ما عليك اي شي بالعكس هو يتحمل فرقية السعر
اما اذا الشرط هذا غير مذكور في العقد المقاول بيكون معاه حق
وفي هذه الحاله الله يعينك
لازم انك ادور على عرض اسعار من اول وجديد بعدها تقدر تقرر تكمل وياه او مع غيره حسب فرق السعر
عموما البنيان ويع راس ونصيحه اخوي اي شي تباه من المقاول وثقه بالعقد عسب تضمن حقك والاستشاري دومه في صف المقاول لانك اخوي انته بتتعامل ويا الاستشاري مره وحده اما المقاول ينفذ اكثر عن مشروع وبيتعامل مع الاستشاري اكثر عن مره
بس المفروض الواحد قبل ليتعاقدمع اي مقاول يسأل عنه في البلديه هل عليه مشاكل مثل التاخير وغيره
الله يعينك اخوي ويسهل عليك وبالتوفيق
اشكر اخوي على النصيحة
الأخ المناضل
استمر في المفاوضات وحاول اتخلي الاستشاري في صفك
والله يعينك
اشكرك اخي الغالي على النصيحة
شوف عزيزي
الموضع له عدة جوانب . وانت لازم تحسبها صح . لان بصريح العبارة هذه الموضوع عبارة عن لعبة
اولا: انت موقع معاه عقد . والعقد اكيد موثق عند الاستشاري وعند البلدية والامور كلها فالسليم . يعني انت لو رحة واشتكيت علية . راح يكون هو الغلطان لانه ماخلص وما بدا في مشروعك
ثانيا : ياترى شو السبب الي خلاه يتاخر وما يبدأ بمشروعك . الجواب هني هو انت . او بمعنى اخر بلدية الشارقة . وفي هذه الحالة المقاول ما يتحمل تاخيرك وما يتحمل الغلاء الي صار . يعني في هذه النقطة المقاول معاة الحق .
يعني عزيزي موضوعك صعب شوي . والي انصحك فية من البداية انك ما تباشر بالشكوى قبل ما تجمع كل امورك . يعني انصحك انك تبحث عن مقاول آخر وتشوف سعرة كم وحاول توصل لاقل سعر فالسوق . وعقب تفكر فالشكوى . واذا الشكوى جت في صالحك كانت خير وبركة . واذا كانت ضدك . فعليك انك تقدم عرضك على المقاول . لانه بموجب العقد الجديد الي بـ مليون و8 مئة الف هذه يعني ان العقد القديم لاغي . ويحق لك ان تطالب بالدفعة الاولى , او ان المقاول يقبل بعرضك والي هو سعر السوق .
ونصيحة . لا تبين جدامة بانك سهل . خلك شديد . بس لا تستعمل اسلوب الصراخ والتهديد . خلك هادي وشديد بنفس الوقت
والله يعنك على بلواك
وبانتظار غيري يدلي بدلوة لنا