أنا شخصيا أرى أن تبني هذا القرار من قبل المسؤولين يعتبر جزء مهم وفعال نحو حل مشكلة التركيبة السكانيه .
نحن وبحمدالله دولتنا تنعم بالخيرات ولا ينقصها شيء وحالنا أفضل بكثير من غيرنا في دول كثيرة …. فقط تنقصنا المبادرة ..
حمله لدعم الإنجاب مهمه … لماذا ؟
تعال نعمل مقارنة بسيطـــــــــــــــة ؟
عناصر المقارنة ( الأول ) مواطن متزوج منذ ثلاثين سنة أو اكثر كبير في السن ( كوالدي ووالدك ) انظر بكل بساطة ما شاء الله كم ولد أو بنت لديه .. ستجد بانه في على ألأقل ابنائه لا يقلون عن السبعة وربما اكثر وبعضهم ما شاء الله لديه ( 12 ) والبعض أكثر من ذلك … السبب بإختصار :
– بساطة الحياة خلال تلك الفترة .
– بساطة الاسعار سواء للمأكل والمشرب أو للمسكن .
– لا توجد رسوم معاملات في كل مكان .
– الحياة التعاونية بين الاقارب والجيران كانت قوية
– وجود بعض الدعم من قبل الحكومة لطلبة المدارس مثلاً كانت توزع الدفاتر ووجبات الفطور وقطع لتفصيل كنادير صيفية وأخرى شتوية مع تكلفة التفصيل مجاناً بدون أي رسوم .
– وغيرها من الامور الاخرى .
العنصر الثاني للمقارنة شاب مواطن متزوج حديثا او خلال العشر سنوات التي مضت .. ستجد أن 90% منهم لديه بالكثير ثلاثة ابناء أو أربعة إلا من رحم ربي فقد زاد عن الاربعة …. لماذا ؟
– لانه أصبح يفكر بان الحياة اصبحت صعبة وبذلك اصبح يحد من الانجاب .
– وأن الاسعار اصبحت جنونية ومرتفعة والحفاظات اصبحت تطلع العين لما يجي مولود جديد .
– ما كان بالمجان ايام زمان بخصوص المعاملات اصبحت اليوم تدفع عليه رسوم .
– الجار اصبح لا يعرف من هو جاره . والاقارب اكتفوا بالمسجات للتهنئة بالعيد أو لأي مناسبة اخرى .
– لا يوجد دعم مثل ايام زمان للطلبه … واصبحت المدارس تكوي الاهالي وتنزف جيوبهم حتى آخر يوم دراسي في السنة . احسب مشتريات طفل واحد في الابتدائية وستصل الى رقم خيالي .
بهذه المقارنة نرى بان معدل الانجاب قل كثيرا والاسباب كل المسؤوليين يعرفونها .. وهذا معناه بان عدد المواطنين في الزيادة قلت .. وعدد الاجانب في الزيادة ارتفعت .. والميزان اصبحت كفتيه غير متوازنتين .
فلذلك يجب أن تكون هنالك حملة وطنية لدعم الانجاب للمواطنين لتشجيعهم على زيادة أعداد المواليد ومن خلاله يزداد عدد المواطنين .
والدعم ممكن أن يكون في عدة أشكال مثلاً :
– رفع قيمة العلاوة الاجتماعية إلى 1.000 درهم .
– دعم الأم الموظفة من خلال تقديم ساعات رضاعة معقولة وتقليل عدد ساعات الدوام الرسمي عليها .. يعني إذا الريال دوامه يخلص الساعة 3 هي تخلص الساعة 2 . وكذلك في بداية الدوام يعطونها ساعة تتأخر عن الريال . ما فيها شيء هي الأم التي تربي الاجيال المواطنة فلابد من دعمها والوقوف بجانبها .
– دعم منتجات الاطفال وخاصة التي يحتاجها خلال الثلاث السنوات الاولى .. وذلك بالتنسيق مع الجمعيات التعاونية عبر إصدار بطاقة للمولود المواطن يستطيع والده الحصول على الخصم في حال شراءه منتجات أطفال كالحفاظات والحليب وغيره من الامور .
– إعطاء أولوية قصوى من قبل الحكومة للمواطن الشاب الذي عدد أبناءه خمسة او أكثر في موضوع الحصول على مسكن مناسب كمنحه
– تخفيض رسوم المعاملات في الدوائر الحكومية إلى النصف للمواطن كنوع من الامتياز له .
والحملة في حال تطبيقها شوف النتائج التي ستتحقق على ارض الواقع في نسبة زيادة المواليد خلال فترة أربع الى خمس سنوات .
انا اؤيد وبشـــــــده
خلاص نحن انرشحك الـ Coordinator للحمله
مخرج ///
للأمانه المجلس التنفيذي ناقش بعض هالافكار ووضع خطط تنفيذيه لها
متبقي فقط موافقة مجلس الوزراء ..
صراحة انا ضد فكرة تقليل ساعات الدوام للحريم
لان الحرمة اللي تشتغل بتكون شاغلة شاغر وظيفي ومتوقع منها انها تنتج واذا كان في تقصير من صوبها زملاؤها في العمل راح يتحملوا الضغط الناجم عنه
زين لو قسم فيه 30% حريم وكلهم حملوا شو بيستوي في الريايل
صراحة الحل انه يا اما الحرمة تشتغل او ما تشتغل بالمرة
يعني الريال اللي يبي حرمته تنجب له عيال وايد يقعدها في البيت ويتحمل مسؤولياته
ياخي والله لو بيدي اعطيك منصب كبير فالدولة
افكارك حلوة 
بالعكس انا اشجع ان الريال يتزوج من يوصل 20 سنه ولا يأخر سن الزواج بدون سبب !!
تعرفين عندي اخ لما كنا ندور له على عروس عمره 29 وكل مانخطب له وحده يقولون كبير عليها يعني تكون توها 20 او 21 او 19 ماترضى تاخذه لسنه !!! اغلب البنات يبن ريال متقارب بعمرهن يعني فرق بينهن وبينه 3 او 5 مب اكثر والافضل بالنسبه لهن يكون بنفس العمر !!!
وبعدين انا لمته وايد الله يهداه يعني بيكمل 30 سنه يوم يعرس لين ربي يرزقه بعيال ويفرح فيهم كم بيكون عمره ؟؟!! واذا ربي ما رزقه اول حياته بعيال وقعد كم سنه متى بيلحق يشوفهم ويكبرون قدام عينه ؟؟؟عشان جذا تشوفين بعض الاباء يمشون عدال عيالهم ماتقولين ابوهم !!1 يبين جنه اخوهم ويصير صديق لهم ويفهمهم اكثر من الشايب !!!
انا اشوف كثير من الشباب يبدون اشياء كماليه على اكمال نصف دينهم يعني اول مايشتغل يفكر بالسياره وبعدين السفر وبعدين يبا يستانس متى بيجمع لعرسه ؟؟!!!
بالنسبه لعيلتنا اول مايشتغل الشاب نبدا نحثه على العرس يشتري سياره بسعر مناسب وتسده مب لازم فشخره وديون ونرصصصصصصصه بهالجمعيات ونوفر له عشان يقدر يفتح بيت ويدفع حق العرس
والحمدلله كل عيالنا تزوجو بدون ديون وهذا دور الاهل لا تعودون عيالكم على الديون والبنوك اذا مامسك عمره من اول راتب ماراح يمسك عمره ويعرف يوفر ابدا
طبعا انا مب ضد الوناسه وانه يسافر وياخذ سياره ويستانس بكده وتعبه بس كل شي بحدود ولكل شي حد معين اما ان فلوسهم تروح كلها للديون وفي الصناعيه وعلى السفر والخربطه !!! هذا كله ما بينفعه
والعرس حصن واستقرار للشاب والشابه
جني استويت يدتكم وهذربت وايد ههههههههه
عزوف الشباب عن الزواج في سن مبكر
لأسباب كثيرة منها الدراسة وعدم قدرتهم على تحمل المسؤولية و تكوين أنفسهم
عندي اخ بيكمل الثلاثين لين الحين ما اتزوج لسبب انه كان عنده هدف يبا يوصله والحمدلله حقق هدفه وقدر يوصل لمكانه مرموقة في شغله ونفس الوقت يبا يكون نفسه (بيته زهب)
اعتقد السن المناسب للزواج بالنسبة للشاب هو فوق 25 لانه يكون ناضج راكز وعنده وعي والقدرة على تحمل المسؤولية