طبعا اكيد سمعتوا بالحملة الي اطلقتها اذاعة الشارجة واللي اساءت بشكل كبير لصورة المواطن بطريقة غير مباشرة
انا مع اظهار صوت المواطن واحتجاجه على غلاء الاسعار لكن مب بهالشكل
بصراحة قمة المهزلة وسمعوا هالقصة
امس كنت واقف في محطة البترول وبالصدفة بجانبي كانت سيارة فيها شباب من جنسية بدون ماحدد
ومالاحظوني لاني كنت حاط مخفي
المهم كان ظحكهم مختلط مع صوت الراديو ..
في البداية ظنيت انهم فاتحين على برنامج فكاهي او شي من هالقبيل
لكن يوم اركز اكتشفت انها اذاعة الشارجة وفي واحد متصل يتكلم عالهوا انا على طول فتحت عالاذاعة
كان برنامج البث المباشر لاذاعة الشارجة وواحد متصل وبصراحة كان كلامه فضيحة بمعنى الكلمة
الريال متصل يشتكي على ان معاش التقاعد مايكفيه هو وعياله ماذكر عددهم…. ليش ما يكفيه؟؟؟
عياله يبغون يلبسون كنادير ب 250-300
عياله ماعندهم بيزات عشان يعبون بترول ويظهرون ويا ربعهم ويستانسون الخ… واخر شي ترك اسمه
ولسان حاله يقول اذا حد بيتبرع او يتصدق علي اسمي كذا ………. يعني بالعربي طرارة عالهوا
ووحدة متصلة تقول ان بنتها ماكملت الجامعه بسبب ان ربيعاتها في الجامعة يلبسون احسن عنها وانها محتاجة
اكيد سمعتوها لان المقطع انعاد اكثر من مرة .. على قولة المثل اللي مايشتري يتفرج
وشي وايد اتصالات على نفس المنوال
معقولة يا جماعة نفظح اعمارنا قدام الي يسوى واللي ما يسوى وبانفسنا
مب كان مفروض عالاذاعة المحترمة انها تكون اكثر انتقائية في الاتصالات وماتترك المجال لمثل هالنوع من الاتصالات
واذا حد بيشتكي عن حاله او وضعه فيكون فعلا محتاج مب مثل الحالات المذكورة
بذمتكم شو الانطباع الي بياخذه الي يسمع هالبرنامج عن الشعب الاماراتي؟؟؟؟
اترك لكم التعليق عن الموضوع واتمنى توقف هالمهزلة
والله انا الي فبطني وايد ..
انا لو يقبض الخط عندي .. صدقني بفضفض لين ماتطلع روحي ..
بقول شي مابى حد يزعل مني
منو مايلبس كندوره الحين ب250 و300 الاسعار مب هي نفس الاسعار قبل 10 سنوات او 15 سنه
منو ماتلبس عبايه قيمتها الحين 800 وطالع
ياخوي هذيل بعد لاننسى مواطنين ويبون يعيشون من خيرات بلادهم لكن للاسف ها الخير كله وين يروح .!!
محد بيرضاها على عياله يلبس اردى الانواع وارخص الاشياء
الام والاب في بعض المرات يبخلون على عمارهم عشان خاطر اعيالهم عشان يلبسونهم ويعلمونهم احسن تعليم .
خل الناس تفضفض واطلع الي بخواطرها .. والبرنامج مسواي حق هاي الامور وهاي المواضيع .
شيوخنا مب مقصرين الله يطول بعمارهم
لكن المسوولين
خل المسوولين يحسون بدمهم شوي . ويرحمون خلق الله عشان الله يرحمهم دنيا واخره .
السلام عليك اخي موضوعك جيد اخي العزيز ولكن مش مكانه في المنتديات وهو اكبر انتشار من الاذاعه والسموحه منك
خلهم يعبرون عمّا في بطونهم !
ولو أمعنت النظر لرأيت أن هؤلاء الذين تدّعي أنه (فضحونا) -وللأسف الشديد- إنما عبّروا بلسان (المقال) عن لسان (حال) الكثيرين !
السلام عليكم ورحمة الله وبركاته
أخي كاتب الموضوع تحيه لك وأشكرك على غيرتك على سمعة المواطن …
بالنسبة للشخص الي يبي يلبس أعياله ملابس كندورة ب250 أو 300 ويتكلم على الهوا بكل صراحة من المفروض يقطعون عليه الاتصال …
ولكن بالنسبة لمكالمة أم أحمد الي تقول طلعت بنتها من الجامعة علشان البنات يلبسون عنها … بكل صدق وأمانة هذه المرأة ما طلبت من حد عبر الأذاعة هي طلبت من ولي أمرها (( الشيخ خليفة والشيخ محمد والشيخ سلطان )) ولا طلبت من الناس وطلبت النظر في حالات الأرامل والمطلاقات .. فعلا حالتهم يرثى لها والله يعينهم على بلواهم …
والي ياها من الناس بمحض أرادتهم وما طلبت من حد …
مجرد رأي
اخووي انا ابراي الشخصي ال مشتكي ويقول انه يبغي يلبس اعياله
كنادير 250 درهم 350 هذيل طال عمرك مايستحون ع اعمارهم ومتعودين على شغلة الاشحاته..
اما شي البعض والله والله صدق هم محتاجين وشيوخنا مش عارفين ولا دارين عنهم شي …
المفروووض يكوون هناك ترتيب بالموضووع وقبل مايظهر اي موضووع على الهواء المفروض ينعرض الموضوع
تحت الهواء..ويتم تقيم وخلاف ينعرض…
يعني المواطنه الي كانت ترمس عن الغلا وتعطي بنتها درهم واحد الصبح والله انه كلامها يقطع القلب
والساكت عن الحق شيطان اخرس…