صلوا ع النبي .. اللهم صل وسلم وبارك على محمد وعلى أله وصحبه
يا إخوة ويا أخوات صدقوني صار لنا تقريبا شهرين نبا نقنع البنت أنها تقبل نشتري لها
( جوتي ) حذاء ( أعزكم الله وأكرمكم ) للمدرسة وما لقينا
ماأدري بصراحة هيه قرادة ولا حال معظم الناس المبتلين بعيال في المدارس الحكومية
وحتى دورنا وبحثنا في كل مولات بانكوك في الإجازة على هذا ( العلة )
وماقدرنا نلقاه حسب مواصفات التربية ليييين الله فرجها اليوم وقدرنا ( نصطاد)
أخر حبة متوفرة في الدنيا … والحمد لله
طبعا حظنا أفضل من غيرنا .. ولاحظنا أن كثير من الأهالي هلكانين يدورون لوازم
المدارس حسب شروط ومواصفات ومعجزات التربية والتعليم
السؤال : متى يقتنع ( بعض ) مديرات مدارس البنات أننا في القرن 21
متى بيودرون عنهم سالفة الشروط المشددة والملزمة في اللبس وطبعا ما أقصد المراييل
ولكن أقصد ليش الجوتي لازم يكون مطفي ما يلامع ولازم يكون بخيوط ربط ودلاغ أبيض مادري وين داره ..
ولازم يكون بمواصفات تشوفها هالمديرة وبدون أسباب مقنعة تلزم فيها جيش من الطالبات أو ممنوع دخول الصف !!!!
لنفرض أن في المدرسة 300 طالبة يعني ياويل الأهالي .. وعلى التجار توفير هذه البضاعةبهذه المواصفات وإلاّ …
ونشوف أزمة فعلية تحصل عند الأهالي والمحلات والكل متوتر
وحضرة المديرة ولالالالالا تحس ولا هامنها شي ؟!!!!
ماذكرته أعلاة مثال أنا كوني ولي أمر عشته وعاشته بنتي الصغيرة اللي ماقدرت تداوم يوم الأربعاءوالخميس بسبة هالجوتي الأزمة ..
وللتوضيح هذه طلبات كل سنة ومن نفس المدرسة والمديرة
يعني شو بيصير لو طلبوا لون موحد أكيد يكفي ؟
يا ترى متى بنفتك من هذه المشكلات المفتعلة بداية كل عام ..؟
متى بنرتاح من طلبات بعض المدارس الحكومية العجيبة ؟؟
وليش الحكومية بالذات ؟؟
وليش بس البنات ؟؟
باقي الدفاتر والجلادات والأقلام ودفاتر الرسم والألوان و…و ,,,
وخاصة الأدوات التي تجبر أولياء الأمور على الشراء من محلات معينة كل سنة ..
والله يعينا على شروطهم
نتمنى تدخل المسؤلين عن هالأمور ..
ورحمة الناس وتقدير معاناتهم أمور مطلوبة
اخوي بن سيف وانتو ليش تسمعون رمسة هالمديره..!
حضرتها هالمديره شوه بتسوي لو الطالبه مالبست جوتي بوربطة !!..
الكل يبا يتشرط وحط اوامر .. لكن يوم اشوف حد اوقفه عند حده يسطلب ..
انا ماشوف هالامور وتشريط في مدارس إمارتنا ـ ما اسمع عنها الا في مدارس بوظبي ! اذكر بنت عمي تقول انا ماروم اشل شنطة عليها باربي ممنووع !!!
———–
نصيحه شل ورقة قوانين المديرة المحترمة وسير مجلس بوظبي لتعليم ..
شكلك حاقد على المدرسات ^__^
شوف ياخوي انا بتكلم عن مدرستنا بكوني معلمة مديرتنا ماعمري سمعتها طلبت ( الجوتي لازم يكون مطفي ما يلامع ولازم يكون بخيوط ربط) أهم شي يكون اسود ومب كعب..
وإذا ماشرطنا على الطالبة صدقني راح اييون البنات بجواتي كعب وملونه ومفتوحه فالشدة مطلوبة ونفس القصة على المريول لازم يكون حسب مواصفات معينة لو نخلي الحبل مفتوح صدقني راح نشوف عجب وراح يصير المكان مب مدرسة إنما حديقة …( يعني تقدر تقول شرووط معقولة وليست تعجيزية)
بخصوص المدارس الخاصة اللي يقولك إنه مايطلبون طلبات غلطان المرايل تكون عندهم موحده ونفس الحاله بالجواتي وإذا صدف إنه مدرسة مب متقيدة صدقني تلاقي المدرسة فوضى وراح تلاقي طلاب لابسين على كيفهم…
أما بالنسبة لطلبات الدفاتر والملفات هاذي فعلا أضم صوتي لصوتك لأنه في معلمات الله يهديهن ويصلحهن يطلبن طلبات عجيبة مثل الملف لازم يكون عيناوي والدفتر لازم يكون سلك مقسم 5 اجزاء لون أخضر …. الخ
وغيرها من الطلبات اللي ماتخلص هاذي فعلا محتاجين أحد يوقف هالأسلوب صدقني والله تناقشت مع كثير من المعلمات على هاذي الطلبات كان ردهم وااحد ( إنا أبي كل شعبة بلون عشان أميز )
أنا من النوع لا احب اطلب ولا غيره أهم شي عندي دفتر وملف عادي حتى لو كان مستعمل لأني أعرف اولياء الامور عندهم أمور اخرى ومشغولين وفي ناس الله يستر عليهم موقادرين يوفروون حق عشاهم ..
الله يعينكم ياخوي
ويعين جميع الأهالي على هالطلبات
والي يقهر اكثر عيال الروضة يوم يردون وياهم لستة من الطلبات
حشى مب طلبات ياهل في الروضة!!!!!
حتى الكلينكس يطلبونه منهم
عيل شو دور التربية أتوفر لهم. ؟؟؟؟؟
خااااطبوا الادارة لعله يفيد
ياكرهي لهاالتزمت من بعض مديرات المدارس الله يهديهن
الله يعينكم أولياء الأمور ……….. ويعين الأيتام بكل مكان اللي
مب لاقين لاشنطة ولاجوتي لامع ولا مطفي والاخوات بعدهن بالطلبات
الصراحه ياخوي بن سيف هذا الإزمه سوت مصايب حق العالم
لي عيالهم في المدارس ماحد سلم من الأهالي كلهم مشتطين
بعيالهم يشرقوبهم ويغربوبهم في المحلات والسبب الطلبات لي ماتخلص
بيني وبينك دخلنا إعيالنا في مدارس خاصه وفتكينا من هالطلبات لي ماتخلص
الله يصبر هالعالم عليهم