شو رايكم بهذ الاماكن المختارة لشهر العسل ،،،،،
ليلتين في كولا في فندق تريدز …
٣ ليال ف لنكاوي بفندق بيلانجي بارك رويال
٣ ليال في بيننانج بفندق باي فيو سادن
ليلتين في استراحة افاموسا في ملاكا
ليلتين في كولا في فندق تريدز .
ارجو من اصحاب الخبرة واللي سبق ومر بمثل هالتجارب افادتني ا.
2night (Traders hotel) in Kuala Lumpur
3 nights ( Pelangi Beach Parkroyal hotel) in Langkawi
3 nights (Bayview Sands Resort) in Penang
2 nights (A’Famosa Resort) in Malacca
2 nights (Traders hotel) in Kuala Lumpur
ارجو من اصحاب الخبرة واللي سبق ومر بمثل هالتجارب افادتني …
واذا تطلب الامر التعديل فيكون للاحسن …
طبعا انا رايح لشهر العسل مو للتسوف والتمشية ..
يا اخوي انا واحد مني كل سنه اكون في ماليزيا
اذا تبغي اشرح لك فالك طيب بس الكتابة ما تكفي وايد بصراحة ياليت تتواصل معاي على الموبايل
0508888204 وفالك طيب
انا يا خوي انصحك انك اتقسم الايام بين العاصمه وسكن في المالنيوم مكانه وايد حلو في شارع العرب والنص الباقي سير جنتج لانها منطقه حلوه صح مافيها غير مركز واحد لا كن مكان حلو ولا كن ما نصحك اتسير لنكاوي والجزر لانه حتى اكلهم اهناك تعبان وبتتعب وايد … وانته تقدر من العاصمه اتروح رحلات كل يوم روح مكانين ولا تفوت الشلا لات ومصنع الشوكولاتا وحديقه الفاموسا وحديقة الفراشات اماكن روعه
حياك أخوي العيسائي ….
جنتق من ضمن الخطة لانها قريبة من كوالا وبسيرلها ليووم كامل …
مشكور ……
الشموخ … مشكور يالغالي ع بادرتك الطيبة … بس نست أخبرك ان حجوزاتي كانت حق شهر ٦ … آبي أضمن
وبالعكس الجو في ماليزيا روووعه … وهادئة أكثر من تايلند … وسنغافوره …
تركيا .. نزلت لها الصيف الماضي … ويا صديقي .. بس ما عجبتني كثير … وحسيت شعبها متزمت نوعا ما …
—- تحياتي لك ودمت بووووود —-
اخوي الله يتمم لكم على خير ان شاءالله
انا عندي لكم ثلاث اقتراحات ولك حرية الاختيار ..
ماليزيا ماتصلح لشهر العسل لعدة اسباب
1-ماليزيا حلوه كطبيعه ولكن جوها جدا عادي يمكن احر من هنيه في هالوقت
انا سافرت لها في شهر 2 هالسنه وبصررراحه كانت حاره رغم ان البرد الكل كان يشتكي منه
2- السبب الثاني ان ماليزيا تناسب العوائل اكثر لانه اماكن الترفيه والالعاب عندهم وايد ولكنها ماتناسب
المعاريس اللي يحتاجون مكان هادئ ومافيه ناس وايد
الاقتراح الاول ..
في حالة قررت وعزمت على ماليزيا نصيحه يااخوي لاتكثر من التنقل بين الفنادق والاماكن لانه بتتعبون وايد وبتضيعون وقت في حط الشنط وشلها، الاستقرار للمعاريس اهم من أي شئ ثاني تحتاجون للسكينه والهدوء والجو الرومنسي ..
لهالسبب اذا سافرت اختار مكانين يكفيكم ومثل مااقترح الاخ عيماني احجز في جنتنج لانها المنطقه الابرد في ماليزيا واللي جوها غير عن بقية المناطق لانها تقع في مرتفع عالي
الاقتراح الثاني..
شووووو رايك في تركيا
جوها روووعه هالوقت غير متاحفها وقصورها الخيال وبصراحه ومن وجهة نظري ولاني شفت ماليزيا وتركيا
اقولك تركيا احلى بووايد والاسعار تقريبا متقاربه وطبعا انت صاحب القرار هذا مجرد اقتراح
….
والاقتراح الثالث
اتأجل أي سفر خارج البلاد وتقضيه هنيه
,وبإذن الله ماراح تندم
اول الايام تتجه لمسندم وهي بلاد في عمان تطل على مضيق هرمز
وهذا رابط بينفعك اكثر لاحسن فندق هناك وبصرراحه المكان حلو
Golden Tulip Khasab Hotel Resort | Photo Gallery
تحجز فيه وفي نفس الفندق يرتبون لك رحلات لجزر في البحر وبتشوف الدلافين على
الطبيعه المشهوره في هالمنطقه
الحلو في هالمكان انه مااتلاقى عرب وايد يعني بتاخذ راحتك وياعروسك ان شاءالله
2- فندق السلام في دبي ايكفيك يومين او ثلاث ايام
3- جزيرة فطيس في بووووظبي هي محميه طبيعيه وتحجز شاليه عالبحر المكان روووووعه
هالاماكن الثلاااث صدقني اخوي تغنيك عن أي بلد اتسافرله لشهر العسل
وخل السفر للصيف مثلا ..
وفي الاخير الراي رايك واسأل الله العظيم ان يبارك لكم في زواجكم ويجعله زواج الهنا
ويرزقكم الذريه الصالحه اللهم آآآآآآمين ..
والسموحه ..
يبالك تمر على جنتنج مكان حلو وبارد على مستوى الغيم واذا بتسكن هناك عندك فندق First world بتمر بأحلى الذكريات اللي ما تنسى ويا الحرمة