السلام عليكم ورحمة الله
شباب انا عندي استفسار بخصوص برج سكاي تاور الي بمدينة المرموقة على شارع الامارات بامارة عجمان
الي لاحظته انهم لين الحين ما بدأو بالانشاء .. اللهم انهم حاطين سور حديدي بس عسب يحددون مكان البرج وغير هذا ماشي …
وصارلي تقريبا 6 شهور اسألهم متى بيبدون يقولون الشهر الياي … ولين الحين بعدهم ما بدوا … مع العلم اني دافع لهم 110.000 والي هي 3 دفعات كل دفعه 5% من قيمة الشقة
اتمنى من الي ماخذين شقق بهالبرج يردون علي عسب اعرف وين وصلت له الامور … وحتى نقدر نتجمع ونوكل محامي يرد لنا بيزاتنا اذا كانوا ما بيبدون بالمشروع …. لانا بهالحالة متعلقين … لا انا لقينا بيزاتنا ولا انا حصلنا شقة
والسموحة على الاطالة وبانتظار ردودكم
سألتهم عن المطورين TRICON و RHolding
قالولي بعدهم ماسجلوا وان هم عاطين كل المطورين فرصه لين تاريخ 1/مايو/2009 ويوم سألته شو اللي بيستوي اذا ماسجلوا قالي بنعطيهم غرامه…
سألته يستوي اذا ماسجلوا عقب تاريخ 1/5 اني أطلب بيزاتي قال لا نحن بنجبرهم يسجلون ولكن حرام لازم نعطيهم فرصه (ماظنتي يقدرون) يعني بالعربي آخر شي يفكرون فيه هو رد فلوسنا
الغريب إني يوم سألته؟؟؟؟؟
واذا ماسجلوا وشردوا بالفلوس؟؟؟؟
بكل بساطه رد عليه وهو يضحك (طبعاً عليه) وقال اذا ماشردو قبل مابيشردون ألحين ومافي داعي تفكرين بالشين بس قلتله الحذر واجب قالي لاتحاتين
المهم….ما طلعت منه بفايده ولا شي يريح… ألحين مابيدنا شي إلا نتريا لين 1/5
السموحه طولت عليكم بس حبيت أشاركم اللي صار اليوم ويايه يمكن يفيد حد منكم
الله يعين الجميع
انا واخدة في المشروع من شركة راشد للعقارات بعجمان
و كنت بمكتبهم من يومين وكان رد الموظف هناك انهم ينتظروا حساب الثقه
تدري الطيب انا اقول لو ما دفعوا الضمان البنكي محد بيرد لنا فلوسنا يعني اعرف انك انسرقت
ترى الفلوس الي دفعناها مستحيل ما يكونون استثمروا فيها
100 بال100 دخلوبها بتجارت عقارات ولا اسهم وفي النهايه خسروها مع لازمه وما بقى منها الا القليل يعني ما يغطي شي من الي دفعناه
المهم نحن مصيرنا نتريا الضمان البنكي وبعدين انشاء الله بنفكر بطريقه تطلعنا من هاي الورطه
والله يستر من الياي
هلا ومرحبا اختي زعفرانه
الله يكون بعوننا حميعا … والله كلنا بالهوى سوا يا اختي
بس على حسب كلام التنظيم العقاري انه اذا اي حد مشتري شقة او مكتب او طوابق ان يوقف الدفعات على المشاريع الي لين الحين ما اصدروا لهم رخص .. لانه ما بيقدرون يطلعون رخصة الا اذا تم دفع 25% من قيمة المشروع كضمان للمشروع من قبل المطور
اما المشاريع الي شغاله فتستكمل الدفعات بشكل طبيعي دون توقف
طبعا المهلة الي عطو المطورين الي ما استصدروا رخص بناء لين شهر 5 يعني الشهر الياي … وخلال هالفترة اذا ما دفعوا لحساب الضمان بيلزمونهم انهم يردون فلوس الناس كلها وهذي طبعا من مسؤوليات التنظيم العقاري لدى اللامارة وبعدها الغاء المشروع
اما اذا تم الدفع خلال هذي الفترة فستستكمل الدفعات بعدها ويتم البدء بالمشاريع بعدها
على فكرة اختي زعفرانة ترى المشروع الي انتي داخلتنه من ضمن المشاريع الي ما عندهم رخصة
واتحملي يقولون لج ادفعي شي قبل شهر 5
الله يوفقنا جميعا ووالله اني اتمنى من كل قلبي انهم ما يدفون عسب يردون بيزاتنا والله ابرك من شلة النصابين