السلام عليكم و الرحمه ..
اهداء لاخوي بو جاسم..
كيف تفحص السياره يوم بتشتريها ..
غير عن الفحص الاليكتروني لازم اتشيك على الاشياء التاليه بنفسك
1- وقفه السياره اتشوفها واقفه سيده مش هاه والله انهاز
2- افتح البونيت و خل حد يدعس ريس و اسمع صوت المكينه اذا سمعت صوت نقعات يعني يمكن في شي بسيط.
3- اقعد داخل و شوف حالت السياره من الداخل .. السقف.. المكيف.. الجلد.. اي شي مقشر.. الاليكترونيات.. حركه الكراسي حركه السكان إلخخ
4- جرب السياره في خط اللي تقدر توصل فيه لين سرعه 140 او 120 زين بعد يعني عشان تشوف تبديل القير سلس ولا فيه نتعه و صوت المكينه بعد
5- جيك على السياره انها مش غرقانه اذا كانت وارد يعني لو تشوف براغي اللي تحت السيت مصديه او الولاعه او يمكن البراغي مش كلها نفس الشكل معناته ان الريال مبدلهم.
6- انزل شوف الرنقات اصليات و لا لا .. الاصليات بتشوف عليهن حرف بارز مثل حرف الام m و منقوش على برع مثل الحروف اللي على بطاقه البنك..
7- افتح الربل مال البيبان و شوف اذا في قص و لا صبغه طايره اذا في اثار لحام او تصليح.
8- تعال عند كرسي المعاون ( اللي جنب السايق ) و شوف الحزام كم السنه المسجله عليه و روح جيك على البليته شوفهم نفس الشي ..
هذا بعض الاشياء اللي تقدر تفحصبها السياره و السموحه
و يا ريت اللي عنده خبره يدش و يخبرنا بعد لأني بالرغم من كل ها اكيد حد ايعرف عن الفحص اكثر
ماشاء الله علييكم
ماعليكم زود .. ماخليتولنا شي
نتريا جان حد عنده معلومات اضافيه
مشكورين
موضوع حلوووووووو فميزان حسناتكم يارب
ت
سلم يا خوي نوط بوخميس على تلبيتك للطلب … و عساها في ميزان حسناتك انشاء اللهيا اخوان انا طلبت من اخونا نوط بوخميس انه ينقل لنا خبرته و معرفته بالسيايير و يزاه الله الف خير ما قصر لأنه بالفعل النقاط الي ذكرها في غاية الأهميه عند شراء اي سياره و بالأخص النقاط الي ذكرها للسيايير الوارد كيف تكتشفها لو غرقانه أو لا .. ولازم الكل منا يكون عنده هالمعلومات لأنه تدرون الحراميه و النصابيين و الي ما يخافون الله كثير … الله يهديهم
ابا أضيف كم نقطه من واقع تجربه ….
1- للسيارات الأمريكيه بالذات … شغل المكيف و دوس فالسياره لين سرعة 100-120 (موب شرط من صفر- 100 عادي لو من 80- 120 بس زر عالسياره)… اذا فصل المكيف أو قام يطلع الهواء من الفتحه الأمامية الي تحت الزجاج على طول اعرف انه (فاكيوم) الهوا خربان … و يباله تصليح
2- لو السياره حديثه .. حاول تشوف الهيستوري مال السياره .. اذا تواجد دفتر التشييك حاول تتبع تواريخ السيرفس و قارن مع حالة السياره .. و خذ رقم الشاصي و روح الوكاله و طلع الهيستوري و قارن هل الدفتر مطابق للهيستوري الي فالوكاله … اذا مو مطابق اعرف انه ملعوب فالعداد ومنزل
ولو كانت سياره حديثه جدا … او من السيارات الغاليه وكان العداد قليل الكلومترات … اسأل عن الدفتر (دفتر التشييك) ولو ما تواجد الدفتر … هذا شي مثير للشك .. وروح شيك هيستوري السياره فالوكاله لأنه ممكن تكتشف بلاوي
صار معاي موقف .. لقيت سياره 2008 و ماشيه 9000 كيلو متر .. سألت الريال عن الدفتر قالي ضايع .. قلت له ما عليه ابا الملكيه بشيك فالوكاله ما طالع … عرفت السياره صاير فيها بلوه وهوّنت عنها
3- حاول تمشي فالسياره الي بتشتريها بقرقره (شارع ترابي) لمسافه بسيطه .. و شوف هل الموتر ناعم و لا فيه أصوات و خربطه … لو فيه اصوات و خربطه .. اعرف ان السياره يبالها شغل ميزانيه .. مثل البوشات أو الربلات و غيرها
4- من الضروري انك تسوق السياره عالخط السرعه ما بين 100-140 … لأن الخط يطلع بعض عيوب السياره لو فيها عيوب …
5- الليتات الأماميه لو لون الليت فارق عن الثاني يعني واحد مبين جديد وواحد قديم … ممكن تكون السياره مدعومه من جهة الليت الجديد .. لأنه مستحيل ليت يستهلك قبل ليت …
6- شيك كهربة السياره بالكامل من الداخل … أهم شي الكراسي و الفتحه … ولو فيها تلفزيون أو نفقيشن شغلهم .. لأنه مرات ما تطلع قنوات التلفزيون بالمره و ممكن يكون في عطل في قطعة الإرسال
هذا الي على بالي الحين و انشاء الله لي رجعة للموضوع ….
ويا ريت كل حد عنده معلومه يفيدنا فيها
و ربي يوفق الجميع*
يزاك الله خير .. وفي ميزان حسناتك ان شاء الله
وأضيف على كلام أخوي نوط بو خمس جراه الله خير ..
بالنسبة للشباب اللي ياخذون سيارات واردة ..
وخاصة الموديلات اللي تحت الـ2003
1)أول شي بطلوا البونيت ..اذا في رقلة ( اهتزاز ) فالمكينة ..إعرف في سلندر مب شغال ..
يعني ما ينفع
2)شوف اذا في أي ليت شغال فالطبلون اللي قدام ( عن العدادات) مثل الـ srs abs وغيره ..
3) لف السكان كامل عالطرفين ( يعني اقفله مرة يمين ومرة يسار ) وشوف اذا الـ rpm بدأ يرتفع وينزل ..إعرف في خلل فالمكينة..
4)ثبت الموتر ( حطه قير d ودوس عالريس والبريك مع بعض ) مب ريس كامل ..لا عالخفيف ..واذا بدأ الموتر يقطع ..بعد يكون خربان
5)فالخطوط < شغل المكيف أول بداية وانت واقف ( خله على أعلى درجة ) و دوس بالموتر وصله 140 -160
بعدين وقف ( بدون ما تبند المكيف ) وشوف الموتر هل في حركات ولا لا ..
6)بتكون عندك 48 ساعة تجرب فيها السيارة ..حاول قدر الإمكان انك تسوق أكثر الساعات ( يعني مب تسوق ساعة وتوقفه 9 ساعات)
7)جيك عالموتر من الداخل مثل ما ذكر الأخ ..
8)جيك عالترموستات اذا اوكي ولا لا ..
9)جيك عالتواير ( وخاصة الإسبير )
10)جيك عالمروحة والسير ( هل الدوران بطئ ولا طبيعي ..؟
11)بالنسبة للـ6 و8 سلندر ..دوس ريس كامل فالخط شو هل القيج يوصل الـ 140 عالبراد وبدون بذل جهد ..بيكون زين<ما أقول تمام
هاي 11 نقطة من عندي إضافة على اللي ذكره أخوي ..
والسموحة من صاحب الموضوع أخوي نوط بو خمس ..