كبتاتنا طفحت من الثياب و بعدين؟؟ دعوه للجميع

السلام عليكم و الرحمه

مساكم الله بالخير

خواتي و اخواني

هذي دعوه موجهه للجميع ..اتمنى منكم جميعا تاخذون ساعه من وقتكم عشان تتخلصوون من اغراضكم الزايده

شرات ما كلنا نشوف و نسمع في البث المباشر ان في ناس محتايه و موجودين بكثره ..ليش ما نتخذ خطوه ايجابيه لمساعدة مجتمعنا

و ياكثر الاغراض اللي عندنا مفروره في الكبتات و يا كثر اليديد اللي ما انلبس و لا مره ..و الا انلبس مره و الكل شافه و ما تبون تكررونه

اعرف ناس عندهم ثياب الدنيا و من غير الاحذيه و الشنط و القباضات و الاكسسوارات ..ناخذ و نعق ..بس يعيبنا شكله و عقب خليناه ..اللي مب مريح و اللي مب مناسب و اللي ما لقيناله مناسبه و نسيناه

خواتي و اخواني في ناس محتايين هالاشياء اللي انتو ما تستخدمونها ..و اعرف ان وايد منكم يتصدقون و ما يقصرووون ..بس حبيت اذكر الجميع اليوم..خذو هالخطوه الايجابيه و ارسمو ابتسامه على ويه انسان محتاج و العيد على الابواب

اتمنى اليوم و اليوم الجمعه تاخذون شوي من وقتكم..و تيبووون كيس عووود و تفتحون الكبت و تعقووون فيه كل الي ما تستخدمونه و كل اللي ما تحتايونه ..خفو على كبتاتكم شوي

و كلكم تعرفون بيوت ناس محتايين و الا منطقه قريبه منكم فيها ناس محتايين..شلو الاغراض و دقو الجرس عليهم و لا تتوقعون انهم بيقولون لا..بالعكس بتسعدونهم و ترسمون الفرحه على ويوه عيالهم

و اذا تستحون طرشو الدريول يودي الاغراض

و اتمنى من الجميع في هالموضوع افادتنا بمناطق في الامارات نقدر نطرشلهم هالاغراض

و ما ابا اقول جمعيات خيريه لان شرات ما تعرفون الجمعيات اغلبيتهم يبون بيزات و لو طرشتولهم ثياب تنعق في حوش الجمعيه و تدقها الشمس و لا حد ياخذها..طبعا ما اعمم ..لكن كم يسوى عمل الخير يوم روحك تقوم به و تشووف فرحة المحتايين بعيونك

قومو الحين و تحمسو للخير و لا تأجلون عمل اليوم الى الغد