السلام عليكم ورحمة الله وبركاته

لا يخفى ع الكثير منكم لعبة Megatouch Aurora وهي من الاجهزه المعروفه عند
الاغلبيه باسم touch screen ” تتش سكرين ” وتنتشر في المقاهي وصالات
الالعاب.

واليوم احب اقدم فرصه لاخواني من المستثمرين اذا حابين يستثمرون مثل هالاجهزه وبعرفكم عليها اكثر:
*تعمل بالعملات وتتبرمج حيث تقبل العملات الاماراتيه فئة الدرهم والخمس والعشر والعشرين والخمسين.
*يوجد بداخلها عداد يحسب، وتفيد اذا استثمرت الاجهزه بأي صاله تضمن ان ما راح يصير اي غش
بالحسابات حيث انك من قرائتك للعداد تعرف كم كان الدخل.
*ثمن الجهاز يختلف حسب البايع لكن الاغلبيه يبيعون باسعار استغلاليه لان الجهاز جيمته الاصليه في
امريكا تقريبا 4500 دولار وهنا يبيعون الجهاز وبموديلات قديمه ونوعيات تقليديه على 25 الف
درهم وبالطبع السعر مبالغ فيه.

*الدخل يختلف حسب المكان، في المقاهي وصالات و مراكز الترفيه يتفقون مع اي مستثمر بنسبة
ارباح 40 % لمالك المركز و 60 % للمستثمر والاغلبيه يتفقون على نسبة 50 % اي
بالمناصفه للطرفين .

*اغلب اعطالها تكون الكترونيه تحتاج الى فرمته فقط. واعتقد اغلبنا يفقه للامور الالكترونيه واذا عن
شباب راس الخيمه زوروني بنادي الماسترز وبعلمكم كيف فرمتة الجهاز لان اغلب تجار الاجهزه
استغلاليين يضربون من ربعنا فوايد بتصليح الاعطال رغم انها عباره عن فرمته لا تبديل قطع غيار
ولا شي.

*اثنين من الشباب المواطنين يعطيهم العافيه استثمروا 8 اجهزه بصالتي في راس الخيمه لكل
شخص 4 اجهزه ونتقاسم الارباح مناصفه واسوء دخل كان 16 الف درهم لمجموع الاجهزه
الثمانيه شهرياً وباغلب الاحيان الدخل يفوق ال 20 الف والحمدلله.

*انصح الشباب باستثمار الاجهزه هذي عند معارفهم من اصحاب القهاوي و صالات الالعاب خاصه
المبتدئين ولا تستهينوا ابدا بالربح أو راس المال وتذكروا دايما ً انكم بمشاريعكم هذي تتجنبون امور
كثيره يتحملها صاحب اي استثمار او مشروع ثاني مثل :

فتح رخص تجاريه
فواتير الكهربا
ايجار وديكور المكان
رواتب الستاف ورسوم استقطابهم وعملهم
وغيرها الكثير…

*في مشاريع اقل راس مال لها هي : 100 الف وارباحها الشهريه 5000 درهم فقط وهي كثيره ولكن
مجال الالعاب هذي اذا وفرتوا صالات واماكن استيراتيجه لها و كانت ارباحكم 1000 درهم عن
الجهاز الواحد يعتبر مكسب مقارنه بالاستثمارات الثانيه.
*عندي مجال انزل بس جهازين بنادي الماسترز في راس الخيمه لاي مستثمر يرغب بشرط يكون
المستثمر من مواطني الدوله والاجهزه تكون
من نوعية Megatouch Aurora فقط ويعطيكم العافيه
للتواصل عبر الخاص

او بالمسجات اذا ع الموبايل

0507444761

اخوكم يوسف

18 thoughts on “فرص استثماريه للمبتدئين من شبابنا”

  2. أشكركم اخواني واخواتي على مروركم وتواصلكم سواء هنا او بالخاص او بالموبايل واتمنى
    لكم التوفيق واشكر اخواني العيناوي , القناص و طير الامارات وبخصوص استفساراتكم :

    اخوي الغالي خورفكاني
    ما ادري اي تفاصيل تبى ع الخاص المهم انت شو استفسارك راسلني
    وانا بجاوبك حاضرين يا اخوي

    والاخو مغرور بس معذور
    اعتقد اني تواصلت وياك بالموبايل وفسرت لك الامور اللي تحتاجها
    وبتصل بك مره ثانيه ان شاء الله قريب.

    اخوي مروان
    الجهاز فيه وايد العاب مادري كم بالضبط لكنها كثيره وعلى فكره حتى لو
    صار update ونزلت العاب احدث وموديلات يديده تقدر تبرمجها باجهزتك
    يعني مثل شغلة الكمبيوتر والوندوز وتقدر تزيد العاب او تحذف.
    بلد الصنع للجهاز اللي اقصده : امريكا والسعر بامريكا اعتقد 4500 دولار
    اما بالامارات تختلف الاسعار حسب البايع وقالوا لي عن وكيل للاسف ما وصلت له
    واسمه عيسى الشامسي ويمدحون اسعاره بس للاسف اكرر اني ما اعرف رقمه وبحاول
    اييب رقمه واتواصل وياه حيث ان اسعاره ب 20 الف اعتقد للجهاز الواحد حسب
    ماخبروني.
    اختي ام مايد

    اي مكان ترفيهي تقدرين تستثمرين الجهاز فيه حسب الاتفاق مع صاحب المكان واذا
    فكرتي تستثمرين ويصعب عليج المتابعه او توفير المكان انا حاضر بوفر لج براس الخيمه
    وبخلي الهندي عندي يتابع لان يعرف يبرمج ولو تعطينه اجر 100 درهم او 150 على
    متابعته ترى يستاهل.

  4. كم ثمن الجهاز الواحد أخوي يوسف

    وبالتوفيق انشاء الله

    ,

    *ثمن الجهاز يختلف حسب البايع لكن الاغلبيه يبيعون باسعار استغلاليه لان الجهاز جيمته الاصليه في
    امريكا تقريبا 4500 دولار وهنا يبيعون الجهاز وبموديلات قديمه ونوعيات تقليديه على 25 الف
    درهم وبالطبع السعر مبالغ فيه.

Comments are closed.